ខេត្តមណ្ឌលគិរី ៖ លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីបានឲ្យដឹងថា អ្នកភូមិចំនួន៨៤នាក់ រស់នៅឃុំស្រែឈូក ស្រុកកែវសីមា ដែលកើតមានបញ្ហាសុខភាពបង្ករឲ្យមានការភ្ញាក់ផ្អើលកាលពីព្រឹកថ្ងៃទី៩…
ខេត្តមណ្ឌលគិរី ៖ លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីបានឲ្យដឹងថា អ្នកភូមិចំនួន៨៤នាក់ រស់នៅឃុំស្រែឈូក ស្រុកកែវសីមា ដែលកើតមានបញ្ហាសុខភាពបង្ករឲ្យមានការភ្ញាក់ផ្អើលកាលពីព្រឹកថ្ងៃទី៩ រហូតដល់ល្ងាចថ្ងៃទី១០ បានធូរស្រាលនឹងជាសះស្បើយ១០០% ហើយបានវិញត្រឡប់ទៅលំនៅឋានរៀងៗខ្លួនវិញ នាព្រឹកថ្ងៃទី១១ ឧសភា ២០១៨ ដោយគ្មានមនុស្សណាម្នាក់បាត់បង់ជីវិតឡើយ។ ចំណែកក្រសួងសុខាភិបាល នៅកាលពីល្ងាចថ្ងៃទី១០ ឧសភា បានចេញសេចក្តីប្រកាសព័ត៌មាន ដែលមានខ្លឹមសារថា នៅព្រឹកថ្ងៃទី១០ ឧសភា ២០១៨ តាមរយៈនៃការអង្កេតស្រាវជ្រាវដោយក្រុមកាងារឆ្លើយតបបន្ទាន់ គឺមានករណីអ្នកជំងឺមកពីភូមិខាងលើសម្រាកព្យាបាលនៅមន្ទីរពេទ្យស្រុកស្នួល ខេត្តក្រចេះ ចំនួន២៦ករណី(ស្រី១០នាក់) ហើយក្នុងករណីដែលមកសម្រាកពេទ្យជាករណីសង្ស័យថាជំងឺផ្តាសាយធំ និងមានសភាពស្រាលដែលពួកគាត់បានចេញត្រឡប់ទៅមូលដ្ឋានវិញ ក្រោយពីទទួលបានការព្យាបាល២ទៅ៣ម៉ោង។
រហូតមកដល់ម៉ោង០៥ល្ងាច ថ្ងៃទី១០ ឧសភា ក្រុមគ្រូពេទ្យនៃមន្ទីរ សុខាភិបាល បានចុះពិនិត្យ និងព្យាបាលជំងឺដល់ភូមិខាងលើចំនួន៥៨នាក់(ស្រី៣០នាក់)។ ចំនួនអ្នកជំងឺដែលមក ពិនិត្យព្យាបាលសរុប៨៤នាក់(ស្រី៤៧នាក់) ដែលក្នុងចំនួននេះមានតែចំនួន១១នាក់ (ស្រី០៧នាក់)ទេ ដែលមានរោគ សញ្ញាជាជំងឺផ្តាសាយធំ រីឯអ្នកជំងឺចំនួន៧៣នាក់ គាត់មានអារម្មណ៍ខ្លាចនឹងព្រឹត្តិការណ៍នៅភូមិអាលោច ក្នុងខេត្តក្រចេះ ទើបមានស្ថានភាពបែបជាស្រ៊ឺត(Panic attack)ផង និងមានបញ្ហាសុខភាពផង ដូចជាឈឺក្បាល រាគតិចតួច ឈឺពោះ ឬគ្រាន់តែវិលមុខ ឬទន់ ដៃទន់ជើងអស់កម្លាំងជាដើម។ ហើយអ្នកមានរោគសញ្ញាទាំងនេះមិនមាន រកឃើញរោគសញ្ញា ពុលទឹកនោះឡើយ។
នៅក្នុងសេចក្តីប្រកាសព័ត៌មាននោះដែរ ក្រសួងបានណែនាំវិធានការបង្ការកុំឲ្យឆ្លងជំងឺឆ្លងផងដែរ គឺ ១,អ្នកដែលមានជំងឺផ្តាសាយត្រូវពាក់ម៉ាស់ ឬក្រមាស្អាតនៅមាត់ និងឧស្សហ៍លាងដៃនឹងសាប៊ូ ដើម្បីចៀសវាងឆ្លងទៅ សមាជិកគ្រួសារ ២,អ្នកជំងឺផ្តាសាយ ពេលក្អក ឬកណ្តាស់ ត្រូវយកកន្សែង ឬក្រមាខ្ទប់មាត់ ហើយហាមដាច់ខាត កុំក្អកដាក់បាតដៃ ដែលអាចឆ្លងទៅអ្នកដទៃបាន តាមរយៈការចាប់ដៃជាដើម ៣,នៅឲ្យឆ្ងាយពីអ្នកជំងឺយ៉ាងតិច០១ម៉ែត្រ ៤,ត្រូវលាងដៃនឹងសាប៊ូមុន ឬក្រោយពេលហូបបាយ និងបន្ទោបង់ ៥,លាងសម្អាតបន្លែផ្លែឈើមុនបរិភោគ ៦,សម្អាតសម្ភារប្រើប្រាស់សម្រាប់ចម្អិនម្ហូបអាហារឲ្យបានត្រឹមត្រូវ ៧,ចម្អិនអាហារឲ្យបានឆ្អិនល្អសាច់ សត្វស្លាប និងស៊ុត ៨,ទុកដាក់ចំណីអាហារឆ្អិន និងឆៅឆ្ងាយដាច់ពីគ្នាជាដើម ប្រសិនមានអាការៈខុសប្លែកពីធម្មតាសូមទៅស្វែងរកការព្យាបាលនៅមណ្ឌលសុខភាព ឬមន្ទីរពេទ្យដែលនៅជិតផ្ទះបំផុត៕
ចែករំលែកព័តមាននេះ