ខេត្តព្រះវិហារ ៖ សហគមន៍ព្រៃឈើភ្នំដែកចំបក់ហោះ ពីមុនពុំសូវមានអ្នកស្គាល់ និងចាប់អារម្មណ៍ទៅលេងកម្សាន្តទេ ។ តំបន់នេះមិនត្រឹមតែសម្បូរទៅដោយព្រៃឈើ សត្វព្រៃប៉ុណ្ណោះទេ តែក៏ជាតំបន់អេកូទេសចរណ៍ធម្មជាតិដ៏ស្រស់ស្អាតថែមទៀត ។ ក្នុងរយៈពេលប៉ុន្មានឆ្នាំចុងក្រោយនេះ តំបន់អេកូទេសចរណ៍ធម្មជាតិ ភ្នំដែកចំបក់ហោះនេះ កំពុងទាក់ទាញការចាប់អារម្មណ៍អ្នកទេសចរជាតិ និងអន្តរជាតិទៅលេងកម្សាន្ត ។
តំបន់អេកូទេសចរណ៍ធម្មជាតិចំបក់ហោះភ្នំដែកមានទីតាំងស្ថិតក្នុងភូមិភ្នំដែក ឃុំរមណីយ៍ ស្រុករវៀង ខេត្តព្រះវិហារ ។ ភ្ញៀវទេសចរអាចទៅលេងកម្សាន្ត បានងាយស្រួល នៅចន្លោះខែធ្នូ ដល់មីនា ។ ភ្ញៀវទេសចរភាគច្រើន ជាភ្ញៀវជាតិ ដោយឡែកភ្ញៀវអន្តរជាតិ នៅមានតិចតួចនៅឡើយ ។
លោកឃា សុខជា ប្រធានសហគមន៍ព្រៃឈើភ្នំដែកចំបក់ហោះ និងជាបណ្តាញសហគមន៍ព្រៃឈើខេត្តព្រះវិហារឲ្យដឹងកាលពីពេល ថ្មីៗកន្លងមកថា តំបន់ទេសចរណ៍ធម្មជាតិមួយនេះបង្កើតឡើងតាំងពីឆ្នាំ២០០០មកម្ល៉េះ គ្រប់គ្រងការពារ ថែរក្សា ដោយសហគមន៍ព្រៃឈើភ្នំដែកចំបក់ហោះ ទទួលស្គាល់ដោយក្រសួងកសិកម្ម រុក្ខាប្រមាញ់ និងនេសាទ ។ ភាពទាក់ទាញនៅក្នុងតំបន់ទេសចរណ៍ធម្មជាតិនេះសម្រាប់ភ្ញៀវទេសចរដែលចូលទៅលេងកម្សាន្តមានដូចជា ទេសភាពព្រៃឈើធម្មជាតិបៃតង សត្វព្រៃជាច្រើនប្រភេទ រួមទាំងកន្លែងកម្សាន្ត ជិះខ្សែរ៉ក យោលទោង ឡើងដើមឈើ ដើរលើស្ពានអាកាស ឡើងលើភ្នំ និងកន្លែងកម្សាន្តជាច្រើន នៅលើផ្ទៃដីប្រមាណជាង២៥ហិតា ។
ជាទូទៅភ្ញៀវដែលចូលទៅលេងកម្សាន្តនៅទីនោះលក្ខណៈជាក្រុម ដោយស្នាក់នៅទីនោះផ្ទាល់តែម្តង ។ ក្រុមខ្លះស្នាក់នៅ២ថ្ងៃ ឬ៧ថ្ងៃទាំងភ្ញៀវជាតិ និងអន្តរជាតិ ។ ចំពោះតម្លៃសមរម្យទៅតាមសេវាកម្មដែលភ្ញៀវចង់បាន ។ សម្រាប់អ្នករស់នៅក្បែរតំបន់នោះអាចចូលលេងបានជារៀងរាល់ថ្ងៃ ។
នៅពេលខាងមុខសហគមន៍ព្រៃឈើភ្នំដែកចំបក់ហោះ នឹងរៀបចំលក់សំបុត្រ ក្នុងតម្លៃសមរម្យ សម្រាប់ភ្ញៀវទេសចរចូលទស្សនាកម្សាន្ត តំបន់អេកូទេសចរណ៍ធម្មជាតិមួយនេះ ដើម្បីបានចំណូលការពារ និងអភិរក្ស ព្រៃឈើបន្ត ។
លោកពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ បានលើក ឡើងថា ក្រៅពីការងារថែទាំ ការពារ អភិរក្សព្រៃឈើនេះ ដើម្បីឲ្យសហគមន៍ព្រៃឈើ ក៏ដូចជា សមាជិកសហគមន៍ព្រៃឈើមានប្រាក់ចំណូលប្រចាំថ្ងៃ មន្ត្រីជំនាញនឹងសិក្សាតំបន់សហគមន៍ ព្រៃឈើបន្ថែមទៀតសម្រាប់បង្កើតឲ្យទៅជាតំបន់អេកូទេសចរណ៍ធម្មជាតិ នៅក្នុងសហគមន៍ព្រៃឈើ ដែលមានសក្តានុពល ដើម្បីទាក់ទាញ ឲ្យភ្ញៀវទៅកម្សាន្ត ហើយបានប្រាក់ចំណូលពីការផ្តល់សេវា ផ្សេងៗជូនភ្ញៀវទេសចរនៅទីនោះ។
លោកឆាយ ប៊ុណ្ណា ជាភ្ញៀវទេសចរពីរាជធានីភ្នំពេញ ដែលទៅលេងកម្សាន្តនៅទីនោះបានសម្តែងអារម្មណ៍រំភើបរីករាយយ៉ាងខ្លាំង ខណៈដែលលោកដឹកនាំក្រុមការងាររបស់លោកទៅទស្សនកិច្ចនៅតំបន់អេកូទេសចរណ៍សហគមន៍ព្រៃឈើភ្នំដែកចំបក់ហោះ នៃខេត្តព្រះវិហារ ។ លោកសរសើរទេសភាពធម្មជាតិមានភាពស្រស់បំព្រង បូករួមទាំងខ្យល់អាកាសធម្មជាតិ ពិតៗ ជាពិសេសនោះ ភ្ញៀវទេសចរអាចមើលឃើញសត្វព្រៃមួយចំនួននៅក្នុងតំបន់នោះដោយផ្ទាល់ភ្នែក ។ ចំពោះសេវាកម្មរបស់សហគមន៍ព្រៃឈើនៅទីនោះ ក៏អាចទទួលយកបានទាំងការស្នាក់នៅ ការហូបចុក និងតម្លៃសមរម្យអាចទទួលយកបាន ។
យោងតាមតួលេខរបស់សហគមន៍ព្រៃឈើចំបក់ហោះភ្នំដែក ក្នុងឆ្នាំ២០១៧បង្ហាញថា ភ្ញៀវទេសចរជាតិ និងអន្តរជាតិ ដែលទៅលេងកម្សាន្តនៅសហគមន៍ព្រៃឈើ មានចំនួនជិត១៤០០នាក់ ក្នុងនោះភ្ញៀវអន្តរជាតិ មានប្រមាណ៤០០នាក់ ។ តួលេខនេះមានការកើនឡើង បន្តិចម្តងៗ ពី១ឆ្នាំទៅ១ឆ្នាំ ៕
ចែករំលែកព័តមាននេះ