ខេត្តព្រៃវែង ៖ ហេតុការណ៍ផ្ទុះអាវុធមួយបានកើតឡើង បណ្តាលឱ្យមន្ត្រីប៉ូលិសស្រុកបាភ្នំម្នាក់ រងរបួសយ៉ាងធ្ងន់ធ្ងរ ហើយត្រូវបានគេដឹកយកទៅសង្គ្រោះបន្ទាន់នៅមន្ទីរពេទ្យឯរាជធានីភ្នំពេញទាំងយប់។ ហេតុការណ៍នេះបានកើតឡើងកាលពីវេលាម៉ោង៧និង១៥នាទីយប់ថ្ងៃទី១០ ឧសភា នៅចំណុចផ្លូវក្រួសក្រហម ស្ថិតក្នុងភូមិត្រោក ឃុំរោងដំរី ស្រុកបាភ្នំ ខេត្តព្រៃវែង ។
ជនរងគ្រោះឈ្មោះ ផេន ភារិត ភេទប្រុស អាយុ៣៧ឆ្នាំ ជាមន្ត្រីនគរបាលស្រុកបាភ្នំ មានទីលំនៅក្នុងភូមិស្ពឺខាងកើត ឃុំស្ពឺ( ក) ស្រុកបាភ្នំ។
សមត្ថកិច្ចបានអោយដឹងថា ជុំវិញហេតុការណ៍បាញ់ប្រហារមន្ត្រីប៉ូលិសនេះ ពុំមាននរណាម្នាក់អាចបញ្ជាក់អោយបានច្បាស់អំពីមូលហេតុនៅឡើយទេ ហើយក៏មិនដឹងថាជនបង្កជានរណា និងមានគ្នាប៉ុន្មាននាក់នោះដែរ គេគ្រាន់តែដឹងថា មុនពេលកើតហេតុ ជនរងគ្រោះបានជិះម៉ូតូទៅអង្គុយចុចទូរសព្ទ័នៅកន្លែងកើតហេតុតែម្នាក់ឯង ហើយក្រោយមកក៏លឺស្នូរផ្ទុះអាវុធកើតឡើង ពេលដែលសមត្ថកិច្ចប៉ុស្តិ៍រដ្ឋបាលឃុំរោងដំរីទៅដល់កន្លែងកើតហេតុ ជនបង្កបានរត់គេចខ្លួនបាត់អស់ ឃើញតែជនរងគ្រោះដួលដេកនឹងដីតែម្នាក់ឯង ហើយនៅលើដងខ្លួនជនរងគ្រោះមានរបួស២កន្លែង គឺស្មាស្តាំនិងថ្គាម ដែលបញ្ជាក់ថា ជនរងគ្រោះត្រូវគេបាញ់ចំស្មា ហើយគ្រាប់កាំភ្លើងបានបុកធ្លុះចេញពីស្មាធ្លាយទៅចូលក្នុងថ្គាមបៀមគ្រាប់ជាប់ក្នុងថ្គាម ហើយជនរងគ្រោះត្រូវបានដឹកយកទៅព្យាបាលនៅមន្ទីរពេទ្យភ្លាមៗតែម្តង។
មន្ត្រីនគរបាលខេត្តព្រៃវែងបានបញ្ជាក់អោយដឹងផងដែរថា នៅវេលាម៉ោង៧ព្រឹក ថ្ងៃទី១១ ឧសភា គឺព្រឹកថ្ងៃបន្ទាប់ សមត្ថកិច្ចនគរបាលស្រុក និងខេត្តជាច្រើននាក់បានចុះទៅពិនិត្យទីតាំងកើតហេតុ និងបានរកឃើញសំបកឡតគ្រាប់កាំភ្លើងប្រភេទ K54 ចំនួន១គ្រាប់នៅកន្លែងនឹងកើតហេតុ ហើយក្រៅពីនោះគឺពុំឃើញមានអ្វីដែលជាតំរុយសោះឡើយ ហេតុនេះហើយទើបសមត្ថកិច្ចមិនអាចសន្និដ្ឋានបានថា ករណីផ្ទុះអាវុធនេះវាជារឿងគំនុំ ឬក៏ជាករណីអ្វីផ្សេងអោយប្រាកដនៅឡើយទេ ព្រោះពេលនេះជនរងគ្រោះកំពុងស្ថិតក្នុងការសង្គ្រោះ មិនទាន់អាចផ្តល់ចម្លើយបាននោះទេ៕
ចែករំលែកព័តមាននេះ