ខេត្តព្រៃវែង ៖ សាលាឆទានគឺជាកន្លែងដែលប្រជាពលរដ្ឋក្នុងសហគមន៍ ក៏ដូចជាសប្បុរសជន ក្នុងនិងក្រៅប្រទេស បានរួមគ្នាសាងសង់ឡើងនៅក្បែដងផ្លូវទុកសំរាប់ឲ្យបងប្អូនប្រជាពលរដ្ឋជិតឆ្ងាយ ដែលបានធ្វើដំណើរឆ្លងកាត់ ចូលសម្រាកបំបាត់ការនឿយហត់ និងគេចពីភ្លៀងខ្យល់ផងដែរ។ សំរាប់ខេត្តព្រៃវែង…
ខេត្តព្រៃវែង ៖ សាលាឆទានគឺជាកន្លែងដែលប្រជាពលរដ្ឋក្នុងសហគមន៍ ក៏ដូចជាសប្បុរសជន ក្នុងនិងក្រៅប្រទេស បានរួមគ្នាសាងសង់ឡើងនៅក្បែដងផ្លូវទុកសំរាប់ឲ្យបងប្អូនប្រជាពលរដ្ឋជិតឆ្ងាយ ដែលបានធ្វើដំណើរឆ្លងកាត់ ចូលសម្រាកបំបាត់ការនឿយហត់ និងគេចពីភ្លៀងខ្យល់ផងដែរ។
សំរាប់ខេត្តព្រៃវែង គេឃើញមានសាលាឆទាននៅតាមដងផ្លូវស្ទើគ្រប់ឃុំស្រុកទាំងអស់ទូទាំងខេត្ត ដោយសាលាខ្លះសាងសង់អំពីថ្មប្រក់ក្បឿង និងខ្លះទៀតសាងសង់អំពីឈើប្រក់ក្បឿង ប៉ុន្តែបច្ចុប្បន្នសាលាឆទានទាំងនោះ មានសភាពចាស់ទ្រុឌទ្រោម និងកន្លែងខ្លះបានរលំដួលបាក់បែកអស់ទៅហើយ ដោយសារតែកត្តាធម្មជាតិផង និងដោយសារតែពុំមានអ្នកថែរក្សាការពារផង។
លោកតា ផាន់ វ៉ាន់ ព្រឹទ្ធាចារ្យនៅឃុំកញ្ចំ ស្រុកពារាំង ខេត្តព្រៃវែង បានមានប្រសាសន៍ថា ដូនតាខ្មែរមានទំលាប់សាងសង់សាលាឆទាននៅតាមដងផ្លូវ ព្រោះវាផ្តល់នូវអត្ថប្រយោជន៌ដ៏ច្រើនសម្បូរបែប ពិសេសសំរាប់បងប្អូនអ្នកដំណើរដែលមកពីទីជិតឆ្ងាយ ប៉ុន្តែបច្ចុប្បន្ននេះគេហាក់ដូចជាមិនសូវមានការចាប់អារម្មណ៍ ក្នុងការសាងសង់សាលាឆទាននេះទេ មិនតែប៉ុណ្ណោះសាលាឆទានដែលមានស្រាប់ ក៏មិនមានការយកចិត្តទុកដាក់ថែរក្សា និងការពារដែរ ដោយបណ្តោយអោយសាលាឆទានទាំងនោះ ចាស់ទ្រុឌទ្រោម និងដួលរលំបាក់បែកអស់ម្តងមួយៗ រហូតមកដល់ពេលនេះគេស្ទើតែលែងឃើញវត្តមានសាលាឆទាន នៅតាមដងផ្លូវទៅហើយ។
ដោយឡែកក្រុមអ្នកដំណើរមួយចំនួនបានលើកឡើងថា បើមានសាលាឆទាននៅតាមដងផ្លូវគឺជាការប្រសើរណាស់ ព្រោះពួកគាត់អាចឈប់សំរាប់បំបាត់ការនឿយហត់ ក្នុងពេលធ្វើដំណើរ និងបានជាកន្លែងអង្គុយទទួលទានចំណីអាហារផ្សេងៗផងដែរ ហើយអ្វីដែលកាន់តែល្អប្រសើរទៀតនោះ អាជ្ញាធរគួរតែរៀបចំអោយមានជាធុងសំរាមយ៉ាងតិច១ នៅតាមសាលាឆទានទាំងនោះផងដែរ ដើម្បីកុំអោយបងប្អូនក្រុមអ្នកដំណើរ ទទួលហើយបោះចោលសំរាមពាសវាលពាសកាល នាំអោយបាត់បង់សោភណ្ឌ័ភាព និងប៉ះពាល់ដល់បរិស្ថានទៀតផង៕
ចែករំលែកព័តមាននេះ