ខេត្តមណ្ឌលគិរី ៖ អាជ្ញាធរបានរាយការណ៍ថា យ៉ាងហោចណាស់មានមនុស្សប្រុសស្រីក្មេងចាស់ជាង៨០នាក់ រស់នៅឃុំស្រែឈូក ត្រូវបានបញ្ជូនទៅសង្គ្រោះបន្ទាន់នៅតាមមន្ទីរពេទ្យនានា ក្នុងស្រុកស្នួល ខេត្ត ក្រចេះ តាំងពីល្ងាចថ្ងៃទី៩…
ខេត្តមណ្ឌលគិរី ៖ អាជ្ញាធរបានរាយការណ៍ថា យ៉ាងហោចណាស់មានមនុស្សប្រុសស្រីក្មេងចាស់ជាង៨០នាក់ រស់នៅឃុំស្រែឈូក ត្រូវបានបញ្ជូនទៅសង្គ្រោះបន្ទាន់នៅតាមមន្ទីរពេទ្យនានា ក្នុងស្រុកស្នួល ខេត្ត ក្រចេះ តាំងពីល្ងាចថ្ងៃទី៩ ឧសភា រហូតដល់រសៀលថ្ងៃទី១០ ឧសភា ២០១៨ ក្រោយពួកគាត់មានអាការក្អួតចង្អោរ រាករូស វិលមុខ និងអស់កម្លាំង ដែលសង្ស័យបណ្តាលមកពីពុលសារធាតុគីមីក្នុងទឹក ។
លោក ស៊ុន ប៊ុនធឿន អធិការនគរបាលស្រុកកែវសីមាបានឱ្យដឹងថា នៅវេលាម៉ោងប្រមាណ៩ព្រឹក ថ្ងៃទី៩ ឧសភា លោកបានទទួលព័ត៌មានពីនាយប៉ុស្តិ៍រដ្ឋបាលស្រែឈូកថា មានអ្នកភូមិចំនួន១៤នាក់ មានអាការពុលថ្នាំ ។ បន្ទាប់ពីដឹងព័ត៌មាននេះភ្លាម លោកបានចុះទៅពិនិត្យទីតាំងកើតហេតុដោយផ្ទាល់ និងបាននាំយកអ្នកជំងឺទៅសម្រាកព្យាបាលនៅមន្ទីរពេទ្យបង្អែកស្រុកស្នួល ខេត្តក្រចេះ ដែលនៅកៀកនឹងភូមិកើត ហេតុ ។ លោកអធិការបានឱ្យដឹងទៀតថា ចំនួនអ្នករងគ្រោះដោយអាការក្អួតចង្អោរ រាក វិលមុខ និងអស់ កម្លាំងនោះ បានបន្តកើនឡើងរហូតដល់៣៤នាក់ គិតត្រឹមវេលាម៉ោង៩ព្រឹកថ្ងៃទី១០ ឧសភា ។ ទោះជាយ៉ាងណា ប្រជាពលរដ្ឋមួយចំនួនបានធូរស្រាលវិញ ក្រោយទទួលបានការព្យាបាលពីសំណាក់គ្រូពេទ្យ និងបានវិលត្រឡប់ទៅផ្ទះខ្លះៗហើយ ។
ចំពោះសភាពការណ៍ជាក់ស្តែង ក្នុងឃុំស្រែព្រះ តាមការឱ្យដឹងពីលោក នួន សារ៉ន អភិបាលស្រុកកែវសីមាបានប្រាប់ថា គិតត្រឹមវេលាម៉ោង១រសៀលថ្ងៃទី១០ ឧសភា ស្ថានភាពអ្នកជំងឺ ដែលមិនទាន់ដឹងបណ្តាលមកពីមូលហេតុអ្វីនោះបានបន្តកើនឡើងយ៉ាងគំហុកពី៣៤នាក់ ទៅ៨០នាក់ ដែលតម្រូវឱ្យក្រុមគ្រូពេទ្យត្រូវយករថយន្តសង្គ្រោះបីគ្រឿង និងរថយន្តរបស់អ្នកភូមិជាច្រើនគ្រឿងទៀត ដឹកអ្នកជំងឺទៅមន្ទីរពេទ្យ ដើម្បីសង្គ្រោះ ។ ទោះជាយ៉ាងណា ត្រឹមម៉ោង៣រសៀលថ្ងៃទី១០ ឧសភា គេនៅមិនទាន់ទទួលបានការបញ្ជាក់ពីអាជ្ញាធរ ពិសេសពីមន្ទីរសុខាភិបាលខេត្តមណ្ឌលគិរីនៅឡើយទេ ពីមូលហេតុដែលបណ្តាលឱ្យអ្នកភូមិជិត១០០នាក់ រងនូវអាការជំងឺដូចៗគ្នាខាងលើនេះ ។
បើតាមក្រុមគ្រូពេទ្យនៃមន្ទីរសុខាភិបាលបានបញ្ជាក់ថា ក្រោយការសាកសួរជនរងគ្រោះ ពួកគាត់ប្រាប់ស្រដៀងគ្នាថា មុនពេលកើតហេតុ គឺពួកគាត់បានបរិភោគទឹកដែលមានខ្លះជាទឹកអណ្តូង និងទឹកអូរ តែគេនៅមិនទាន់អាចសន្និដ្ឋានថា ជាករណីពុលទឹកនោះទេ ត្រូវរង់ចាំលទ្ធផលវិភាគរបស់ក្រុមអ្នកជំនាញសិន ។
ប្រភពនានាបាននិយាយថា ករណីខាងលើអាចបណ្តាលមកពីកង្វះអនាម័យរបស់អ្នកភូមិហូបទឹកឆៅ ឬទឹកដែលមានប្រភពមិនច្បាស់លាស់ ព្រោះរដូវនេះជារដូវភ្លៀង មានការដាំដុះដំណាំ និងការប្រើប្រាស់នូវប្រភេទថ្នាំគីមីគ្រប់ប្រភេទ ដើម្បីការពារសត្វល្អិត ឬថ្នាំបង្កើនជីវជាតិ និងថ្នាំកម្ចាត់ស្មៅជាដើម ដែលផលិតផលទាំងនេះសុទ្ធសឹងមានលាយសារធាតុគីមីក្នុងកម្រិតខ្ពស់ ។
ប្រភពបន្តថា គេតែងសង្កេតឃើញប្រជាកសិករមួយចំនួនធំ ក្រោយពីបាញ់ថ្នាំគីមីទាំងនោះលើដំណាំរួច ភាគច្រើនពួកគាត់មិនសូវយកចិត្តទុកដាក់ ឬវេចខ្ចប់សំបកដបថ្នាំឱ្យបានត្រឹមត្រូវទេ ពោលគឺគាត់បោះចោលពាសវាលពាសកាល ស្របពេលរដូវភ្លៀងធ្លាក់ចូលមកដល់អាចមានសំបកដបខ្លះពុកផុយ លេចធ្លាយសារធាតុគីមីលាយឡំជាមួយទឹកភ្លៀងហូរចូលទៅក្នុងប្រភពទឹកដែលអ្នកភូមិប្រើប្រាស់ក៏បណ្តាលឱ្យមានអាការជំងឺដូចគ្នារាប់សិបនាក់បែបនេះ ។ យ៉ាងណាក៏ដោយការលើកឡើងបែបនេះគ្រាន់តែជាការសន្និដ្ឋានក្រៅផ្លូវការមួយប៉ុណ្ណោះ គឺមានតែរង់ចាំសមត្ថកិច្ច និងមន្ត្រីជំនាញស្រាវជ្រាវស៊ើបអង្កេតជាក់ស្តែងទើបដឹងការពិត ។ លោក ស្វាយ សំអ៊ាង អភិបាលខេត្តមណ្ឌលគិរីនៅល្ងាចថ្ងៃទី១០ បានដឹកនាំក្រុមគ្រូពេទ្យបន្ថែមចុះទៅតំបន់កើតហេតុ ដើម្បីពិនិត្យនិងជួយសង្គ្រោះដល់អ្នកភូមិដែលកំពុងជួបបញ្ហាសុខភាពទាំងនោះ ។
សូមបញ្ជាក់ថា តំបន់ឃុំស្រែឈូក ស្រុកកែវសីមា ដែលកំពុងផ្ទុះនូវស្ថានភាពពុលនេះ មានចម្ងាយពីទីរួមខេត្តមណ្ឌលគិរីប្រមាណ១៦០គីឡូម៉ែត្រ ស្ថិតក្នុងដែនជម្រកការពារសត្វព្រៃកែវសីមា ដោយត្រូវធ្វើដំណើរវាងតាមផ្លូវស្រុកស្នួល ខេត្តក្រចេះ ទើបអាចចូលទៅដល់ឃុំស្រែឈូក ហើយនៅរដូវវស្សាបែបនេះ ផ្លូវធ្វើដំណើរចូលទៅតំបន់នោះពិបាកខ្លាំងណាស់ ។ បច្ចុប្បន្ន ឃុំមួយនេះនៅមិនទាន់មានទឹកស្អាតប្រើប្រាស់នៅឡើយ ដោយអ្នកភូមិអាស្រ័យលើទឹកអណ្តូងស្នប់ អណ្តូងជីក និងទឹកអូរ ឬព្រែកដែលហូរកាត់ភូមិប៉ុណ្ណោះ ។
ចែករំលែកព័តមាននេះ