ខេត្តព្រៃវែង ៖ ប្រជាពលរដ្ឋនៅតំបន់អ្នកលឿង ក្នុងស្រុកពាមរក៍ បានស្នើសុំអោយអាជ្ញាធរ មានវិធានការទប់ស្កាត់ ចំពោះក្រុមរថយន្តដឹកខ្សាច់ធំៗ ដែលកំពុងធ្វើសកម្មភាពបំផ្លាញផ្លូវ ក្នុងឃុំព្រែកខ្សាយ (…
ខេត្តព្រៃវែង ៖ ប្រជាពលរដ្ឋនៅតំបន់អ្នកលឿង ក្នុងស្រុកពាមរក៍ បានស្នើសុំអោយអាជ្ញាធរ មានវិធានការទប់ស្កាត់ ចំពោះក្រុមរថយន្តដឹកខ្សាច់ធំៗ ដែលកំពុងធ្វើសកម្មភាពបំផ្លាញផ្លូវ ក្នុងឃុំព្រែកខ្សាយ ( ខ )។
ប្រជាពលរដ្ឋ បានអោយដឹងថា ក្រុមរថយន្តដឹកខ្សាច់ទាំងនោះមានគ្រប់ខ្នាតទាំងអស់ តាំងពីខ្នាតតូចរហូតដល់ធំ ប៉ុន្តែប្រភេទភ្លៅ៥កង់១០ និងប្រភេទយីឌុប មានច្រើនជាងគេគឺចាប់ពី២០ទៅ៣០គ្រឿង ហើយសកម្មភាពនៃការដឹកជញ្ជូនខ្សាច់នេះ ចាប់ផ្តើមដឹកតាំងពីម៉ោង៤ព្រឹក រហូតដល់ម៉ោង៨យប់ជារៀងរាល់ថ្ងៃ។
ប្រភពដដែលនេះបានបញ្ជាក់ប្រាប់ថា ការសំរុកដឹកជញ្ជូនខ្សាច់របស់ក្រុមឈ្មួញ ឆ្លងកាត់ឃុំព្រែកខ្សាយ ( ខ ) ក្នុងស្រុកពាមរក៍នេះ កើតមានច្រើនខែមកហើយ ប៉ុន្តែកាលពីមុនដោយសារជារដូវប្រាំងមិនមានភ្លៀង ទើបផ្លូវមិនសូវខូច គ្រាន់តែហុយ តែក៏ប៉ះពាល់ដល់សុខភាពប្រជាពលរដ្ឋដែរ ប៉ុន្តែប៉ុន្មានថ្ងៃមកនេះ ដោយសារតែមេឃធ្លាក់ភ្លៀងញឹកញាប់ ធ្វើអោយទឹកដក់លើផ្លូវ ហើយពេលរថយន្តដឹកខ្សាច់ធំៗទាំងនោះ បើកឆ្លងកាត់ ក៏ធ្វើអោយផ្លូវបែកភក់ល្បាប់ និងផុងស្រុតទៅជាជង្ហុកធំៗ បង្កការលំបាកយ៉ាងខ្លាំងដល់ការធ្វើដំណើរ របស់បងប្អូនប្រជាពលរដ្ឋ ហើយបញ្ហានេះគេមិនដែលឃើញខាងអាជ្ញាធរមូលដ្ឋាន ចេញមានវិធានការទប់ស្កាត់នោះទេ។
ប្រជាពលរដ្ឋបានអះអាងថា ចំពោះក្រុមរថយន្តដឹកខ្សាច់ទាំងនោះ បើនៅតែបណ្តែតបណ្តោយបែបនេះតទៅទៀត ផ្លូវក្នុងឃុំព្រែកខ្សាយ ( ខ ) ឃុំអ្នកលឿង ស្រុកពាមរក៍ និងឃុំព្រែកក្របៅ ស្រុកពាមជរ ច្បាស់ជាខូចខ្ទេចអស់មិនខាន ដូច្នេះហើយទើបពួកគាត់សំណូមពរអោយអាជ្ញាធរជួយមានវិធានការទប់ស្កាត់ផង។
ឆ្លើយតបចំពោះបញ្ហានេះ ត្រូវបានលោកស្រី សេង ទៀង អភិបាលស្រុកពាមរក៍ បញ្ជាក់អោយដឹងកាលពីព្រឹកមិញនេះថា បញ្ហានេះខាងអាជ្ញាធរឃុំនិងស្រុកបានដឹងហើយ ។ លោកស្រីបានចាត់អោយលោកមេឃុំ ទាក់ទងហៅខាងក្រុមរថយន្តទាំងនោះ ព្រមទាំងម្ចាស់ដេប៉ូលក់ខ្សាច់ទាំងអស់ អោយធ្វើកិច្ចសន្យា បញ្ឈប់ការដឹកជញ្ជូនខុសលក្ខណៈបច្ចេកទេស ក៏ដូចជាការដឹកលើសទំងន់ផងដែរ។ ជាមួយគ្នានេះ ក៏បានស្នើសុំអោយក្រុមរថយន្តទាំងនោះ ជួយជួសជុលផ្លូវដែលខូច ដោយការចាក់ដីកាយបង្ហាប់អោយបានស្មើល្អឡើងវិញ ដើម្បីកុំអោយប៉ះពាល់ និងបង្កការលំបាកដល់បងប្អូនប្រជាពលរដ្ឋតទៅទៀត ប៉ុន្តែដោយសារប៉ុន្មានថ្ងៃនេះមានការងររវល់ច្រើន ទើបចំណាត់ការនេះមិនទាន់បានអនុវត្ត តែលោកស្រីអះអាងថា លោកស្រីនិងជំរុញការងារនេះអោយបានលឿនបំផុត ក្នុងរយៈពេល២-៣ថ្ងៃនេះ ៕
ចែករំលែកព័តមាននេះ