រាជធានីភ្នំពេញ ៖ លោក ឌូដ អេរិកសុន(Doung Ericksen) សមាជិកព្រឹទ្ធសភាអាមេរិកបានថ្លែងថា លោកគ្រោងនឹងដឹកនាំគណៈប្រតិភូចូលសង្កេតការណ៍បោះឆ្នោតខែកក្កដាខាងមុខ។ ព្រឹទ្ធសមាជិកសភារដ្ឋវ៉ាស៊ីនតោន សហរដ្ឋអាមេរិក បានថ្លែងកាលពីថ្ងៃទី៩ ឧសភា ពេលដែលលោក សម្តែងការគួរសមជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស នៅទីស្តីការ ក្រសួង។ លោក មាស គឹមសេង អ្នកនាំពាក្យនាំក្រសួងការបរទេស បានថ្លែងប្រាប់អ្នកសារព័ត៌មានថា លោក Doung Ericsen បានជម្រាបជូនលោកទេសរដ្ឋមន្ត្រីពីជំហររបស់អាមេរិកដោយបានវាយតម្លៃខ្ពស់ ពីសមិទ្ធផលដែលកម្ពុជាទទួលបានទាំងផ្នែកនយោបាយ និងសេដ្ឋកិច្ចរីកចម្រើនយ៉ាងច្រើន។ លោកថា នេះជាទស្សនកិច្ចលើកទី២របស់លោកមកកាន់ប្រទេសកម្ពុជា។ លោកបានលើកឡើងទៀតថា កម្ពុជាបានរៀបចំការបោះឆ្នោតបានល្អកាលពីឆ្នាំ២០១៧កន្លងទៅនេះ។
តាមរយៈនយោបាយឈ្នះឈ្នះ របស់កម្ពុជាគ្មានប្រទេសណាដូចកម្ពុជាទេ។ ជាពិសេសប្រមុខរដ្ឋាភិបាលកម្ពុជា បានបញ្ចប់សង្គ្រាម មិនដូចប្រទេសមជ្ឈឹមបូព៌ាមួយចំនួនដូចជា អ៊ីរ៉ាក់ ស៊ីរី។ លោកបានលើកឡើងថា នៅពេលត្រឡប់ទៅ អាមេរិកវិញលោកនឹងជម្រាបជូនដល់អ្នកវិនិយោគ ពាណិជ្ជករបានកាន់កម្ពុជាបន្ថែមទៀត។ លោកបានលើកឡើងថា៖”កម្ពុជានៅពេលនេះមានការអភិវឌ្ឍន៍រីកចម្រើនជាង កាលពីដំណើរទស្សនកិច្ច លើកទី១ កាលពីឆ្នាំ២០១៦”។ លោកថា ដោយសារកម្ពុជាមានការរៀបចំការបោះឆ្នោត ខាងមុខនេះ លោកនឹងមកកម្ពុជាម្តងធ្វើការសង្កេតការណ៍ផងដែរ។ លោកបញ្ជាក់ថា”ខ្ញុំចង់ឃើញកម្ពុជា និងអាមេរិកមានទំនាក់ទំនងល្អជាមួយគ្នា”។
លោកបានបញ្ជាក់ថា លោកសង្ឃឹមថា តាមរយៈគោលនយោបាយថ្មីរបស់លោកប្រធានាធិបតីដូណាល់ត្រាំ បានបញ្ជាក់ថា ”អាមេរិកគោរពអធិបតេយ្យប្រទេសនានា”។ លោកសង្ឃឹមថា តាមរយៈគោលនយោបាយនេះថា កម្ពុជានឹងអាមេរិកមានទំនាក់ទំនងកាន់តែល្អបន្ថែមទៀត។ លោកទេសរដ្ឋមន្ត្រី ប្រាក់ សុខុន បានបញ្ជាក់ពីសន្តិភាពរបស់កម្ពុជាដែលមិនអាចកាត់ថ្លៃបានដោយសារតែនយោបាយឈ្នះឈ្នះរបស់សម្តេចតេជោ ហ៊ុន សែន។ លោកបានបញ្ជាក់ពីការរៀបចំខ្លួនរបស់កម្ពុជា ក្នុងការបោះឆ្នោតជ្រើសតាំង សមាជិកសភាខែកក្កដា។ លោកទេសរដ្ឋមន្ត្រីបានបន្តថា កម្ពុជាសូមអរគុណចំពោះអាមេរិកដែលបាន ផ្តល់ជំនួយនានាដល់កម្ពុជានាពេលកន្លងមក។ នៅពេលថ្មីនេះអាមេរិកបានបន្តនូវការធ្វើការ អនុគ្រោះពន្ធ(GSP) លើទំនិញដែលនាំពីកម្ពុជាទៅអាមេរិករយៈពេល៣ឆ្នាំបន្តទៀត៕
ចែករំលែកព័តមាននេះ