អំណោយមនុស្សធម៌ជូនដល់ពលរដ្ឋ ដែលរងគ្រោះរលំផ្ទះដោយខ្យល់កន្ត្រាក់
- សៀមរាប
ខេត្តសៀមរាប ៖ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប និងសហការី…
ខេត្តសៀមរាប ៖ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការ សាខាកាកបាទក្រហមកម្ពុជា ខេត្តសៀមរាប និងសហការី បានអញ្ជើញជួបសំណេះសំណាល និងនាំយកអំណោយមនុស្សធម៌ នាថ្ងៃពុធ ១០រោច ខែពិសាខ ឆ្នាំច សំរឹទ្ធិ ព.ស២៥៦២ ត្រូវនឹងថ្ងៃទី៩ ខែឧសភា ឆ្នាំ២០១៨ ជូនប្រជាពលរដ្ឋរងគ្រោះរលំផ្ទះ ដោយខ្យល់កន្ត្រាក់កាលពីល្ងាចថ្ងៃទី៨ ខែឧសភា ឆ្នាំ២០១៨ ចំនួន១គ្រួសារ នៅភូមិដូនក្រសាំងរលើង សង្កាត់សៀមរាប ក្រុងសៀមរាប។
មានប្រសាសន៍នាឱកាសនោះ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការ សាខាកាកបាទក្រហមកម្ពុជា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាលោកបណ្ឌិត ឃឹម ប៊ុនសុង ប្រធានគណៈ កម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។
លោកជំទាវក៏បានបន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី មិនសមល្មមនឹងការខាតបង់របស់ក្រុមគ្រួសារ តែក៏អាចជួយសម្រាលទុក្ខបាក បានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដូចដែលបានលើកឡើងថា កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោលឡើយ។
សូមបញ្ជាក់ផងដែរថា អំណោយមនុស្សធម៌ ដែលបានយកទៅផ្ដល់ជូននាពេលនេះរួមមាន៖ មុង១ ផួយ១ សារុង១ ក្រមា១ កន្ទេល១ តង់១ អង្ករ១០០គីឡូក្រាម មី១កេស និងថវិកា៤សែនរៀល។ ជាមួយគ្នានេះដែរអនុសាខាក្រុងសៀមរាប បានឧបត្ថម្ភបន្ថែម អង្ករ៥០គីឡូក្រាម មី២កេស ទឹក២យួរ សាប៊ូ១ធុង ៤លីត្រ និងថវិកា១សែនរៀល៕
ចែករំលែកព័តមាននេះ