ខេត្តប៉ៃលិន ៖ គេសង្កេតឃើញនៅឆ្នាំ២០១៨នេះមានភ្លៀងធ្លាក់ច្រើនមិនត្រឹមតែធ្វើឱ្យដំណាំគ្រប់ប្រភេទនៅតាមចម្ការដុះលូតលាស់ប៉ុណ្ណោះទេ ថែមទាំងធ្វើឱ្យដើមរុក្ខជាតិដែលមាននៅតំបន់រមណីយដ្ឋានភ្នំយ៉ាត កំពុងតែបញ្ចេញពណ៌ខៀវស្រងាត់ងាយស្រួលក្នុងការទាក់ទាញចំណាប់អារម្មណ៍របស់ភ្ញៀវទេសចរឱ្យចូលទៅលេងកម្សាន្ត ។
ប្រជាពលរដ្ឋបានឱ្យដឹងថា រហូតមកដល់ពេលឥឡូវនេះព្រៃឈើនៅជុំវិញជើងភ្នំយ៉ាត និងលើកំពូលភ្នំយ៉ាត សុទ្ធតែខៀវខ្ចីស្រស់បំព្រង ហើយពេលមុនពិធីបុណ្យទានម្តងៗ ទាំងអ្នករស់នៅជិតឆ្ងាយឧស្សាហ៍ជិះម៉ូតូ និងបើកបររថយន្តឡើងទៅលេងកម្សាន្តនៅទីនោះឥតដាច់ ។ លើសពីនេះនៅជុំវិញភ្នំក៏មានផ្លូវចាក់បេតុងយ៉ាងល្អ នរណាៗក៏ចង់ទៅអង្គុយលេងនៅលើភ្នំកម្សាន្តសប្បាយ ជាពិសេសនៅពេលល្ងាចៗចុងសប្តាហ៍ អ្នកខ្លះនាំប្រពន្ធកូនទៅអង្គុយហូបនំចំណីដែលអាជីវករយកទៅដាក់លក់នៅកន្លែងវាលទំនាបចង្កេះភ្នំរហូតដល់ងងឹតបន្តិចទើបនាំគ្នាត្រឡប់ទៅផ្ទះវិញ ។
ប្រជាពលរដ្ឋបន្តទៀតថា ព្រៃឈើនៅតាមភ្នំផ្សេងៗក្នុងខេត្តត្រូវបានគេកាប់យកដីដាំដំណាំអស់ហើយ តែដោយឡែកនៅលើភ្នំយ៉ាតត្រូវបានព្រះសង្ឃក៏ដូចជា អាជ្ញាធរបានថែរក្សាដោយនាំគ្នាដាំបន្ថែមទៀតបានដុះលូតលាស់យ៉ាងល្អបង្កើតនូវទេសភាពស្រស់ស្អាត បើអ្នកនិយមលេងហ្វេសប៊ុកគេនាំគ្នាថតបង្ហោះមើលទៅគួរឱ្យចាប់អារម្មណ៍តែម្តង ។
ប៉ុន្តែនៅលើភ្នំយ៉ាតនេះក៏មិនសូវឃើញមានដើមឈើធំៗប៉ុន្មានដែរ ប្រហែលជាគេទើបនឹងដាំហើយ បើយើងនាំគ្នាថែរក្សារហូតដល់រុក្ខជាតិទាំងនោះលូតលាស់ធំៗល្អ ពិតជាទាក់ទាញភ្ញៀវទេសចរជាតិ និងអន្តរជាតិឱ្យចូលទៅលេងកម្សាន្តយ៉ាងច្រើនកុះករ ។ ក្នុងនោះក៏មានឈើប្រណិតខ្លះៗនៅលើកំពូលភ្នំ រីឯនៅតាមចង្កេះភ្នំឃើញមានតែព្រៃរបោះប៉ុណ្ណោះ ។
សូមបញ្ជាក់ថា កាលពីឆ្នាំមុននៅភាគខាងលិចភ្នំយ៉ាតអាជ្ញាធរបាននាំគ្នាយកកូនឈើជាច្រើនដូចជា បេង នាងនួន គ្រញូង និងកូនឈើផ្សេងៗជាច្រើនទៀតទៅដាំ ហើយរហូតមកដល់ពេលនេះប្រហែលជានៅសល់ខ្លះៗ ហើយបើគេនាំគ្នាថែរក្សាបានល្អនៅថ្ងៃខាងមុខនឹងមានម្លប់ឈើសម្រាប់ភ្ញៀវអង្គុយលេងកម្សាន្តក៏ដូចជាទាក់ទាញអាកាសធាតុឱ្យមានលំនឹងផងដែរ ៕
ចែករំលែកព័តមាននេះ