ខេត្តមណ្ឌលគិរី ៖ កំណាត់ផ្លូវជាតិលេខ៧៦ត្រូវបានបិទអស់រយៈពេលខ្លី ក្រោយពីមានសកម្មភាពម្ចាស់រថយន្តរត់ឈ្នួលបានប្រមូលផ្តុំគ្នា យករថយន្តបិទផ្លូវមុខសង្កាត់រដ្ឋបាលព្រៃឈើស្រែព្រះ-ចុងផ្លាស់ កាលពីម៉ោង១០ព្រឹក ថ្ងៃទី៩ ឧសភា ២០១៨ ក្នុងភូមិអូរអាម ឃុំស្រែខ្ទុម ស្រុកកែវសីមា។
ប្រភពពីម្ចាស់រថយន្តរត់ឈ្នួលបាននិយាយថា សព្វថ្ងៃដោយមិនសម្បូរអ្នកដំណើរជិះ ពួកគេបានដឹកឈើទ្វារនឹងជំនៀឈើបន្តិចបន្តួចដើម្បីលក់បានរួចសោហ៊ុយខ្លះ តែត្រូវបានលោក ស្រ៊ុន ឈួន នាយសង្កាត់រដ្ឋបាលព្រៃឈើស្រែព្រះ-ចុងផ្លាស់ ទារលុយច្រើនៗពេកទើបបង្ខំចិត្តនាំគ្នា ឈប់ចតស្ងៀមនៅមុខសង្កាត់រដ្ឋបាលព្រៃឈើស្រែព្រះ-ចុងផ្លាស់ ដើម្បីឲ្យអាជ្ញាធរជួយដោះស្រាយ ។
ប្រភពបន្តទៀតថា ទោះបីជាពួកគាត់ដឹកទ្វារដែលកែច្នៃចេញពី សិប្បកម្មលក្ខណៈគ្រួសារក្នុងស្រុកពេជ្រាដាខុសច្បាប់ក៏ដោយ ប៉ុន្តែទំហំនៃបទល្មើសរបស់ពួកគាត់ គប្បីលោកមេព្រៃកុំយកថ្លៃរត់ផ្លូវដល់ទៅ២០ដុល្លារពេក ព្រោះមានសមត្ថកិច្ចច្រើនណាស់នៅតាមផ្លូវមិនមែនមានតែមួយកន្លែងនោះទេ។
ក្រុមម្ចាស់រថយន្តរត់ឈ្នួលបានចោទថា កន្លងមកលោកនាយផ្នែករដ្ឋបាលព្រៃឈើកែវសីមា និងសង្កាត់រដ្ឋបាលព្រៃឈើស្រែព្រះ-ចុងផ្លាស់ តែងតែប្រដេញរថយន្តដឹកទ្វារបង្អូច របស់ពួកគាត់ ខ្លះចាប់បាន ខ្លះរត់រួច ដេញពេញផ្លូវ អាក្រក់មើលណាស់ ។ នៅពេលចាប់បានគឺតម្រូវឲ្យអូសចូលស្នាក់ការផ្នែកឬសង្កាត់ ហើយមេព្រៃទាំងពីរនាក់តែងយកផ្លូវច្បាប់មកនិយាយដើម្បីគំរាមយកលុយរាប់រយពាន់ដុល្លារ ទើបដោះលែងរថយន្តវិញ ដោយបញ្ជាក់ថា ពិន័យអន្តរកាលរយៈពេលឆាប់។
បន្ទាប់ពីមានការសម្របសម្រួលពីអាជ្ញាធរ ក្រុមប្រជាពលរដ្ឋរកស៊ីរថយន្តរត់ឈ្នួលបានបំបែកគ្នាវិញនៅវេលាម៉ោង១០នឹង៤៣នាទី ថ្ងៃដដែល ហើយចរាចរណ៏លើកំណាត់ផ្លូវជាតិលេខ៧៦ក៏បានបើកវិញជាធម្មតា ។ ដោយអាជ្ញាធរបានសន្យានឹងយកករណីនេះទៅប្រជុំពិភាក្សា ដើម្បីរកដំណោះស្រាយបន្ត។
ទោះជាយ៉ាងណា អ្នកយកព័ត៌មានមិនអាចសុំការបំភ្លឺពីលោកស្រ៊ុន ឈួន នាយសង្កាត់រដ្ឋបាលព្រៃឈើស្រែព្រះ-ចុងផ្លាស់បានទេ នៅកន្លែងកើតហេតុ ព្រោះលោករវល់គេចមុខពីអ្នកតវ៉ា ។ ចំណែកលោក ជុយ សុឃាង នាយផ្នែករដ្ឋបាលព្រៃឈើកែវសីមា ត្រូវជាមេកើយរបស់លោក ស្រ៊ុន ឈួន ក៏មិនអាចសុំការបំភ្លឺបានដែរ គិតត្រឹមវេលាម៉ោង២នឹង៣០នាទី រសៀលថ្ងៃទី៩ ឧសភា ៕
ចែករំលែកព័តមាននេះ