ខេត្តកំពង់ឆ្នាំង ៖ ផ្លូវក្រាលកៅស៊ូក្នុងខេត្ត១ខ្សែ ដែលរងការខូចខាតដោយសាររថយន្តធុនធំដឹកថ្មបំផ្លាញអស់រយៈពេលជាង៣ឆ្នាំមកហើយនោះ នៅមិនទាន់ត្រូវបានជួសជុលឱ្យដូចដើមវិញនៅឡើយទេ បើទោះជាខាងរដ្ឋបាលសាលាខេត្ត ធ្លាប់បានចាប់ឃាត់ក្រុមរថយន្តដែលដឹកបំផ្លាញផ្លូវនេះយ៉ាងណាក្តី ។ កាលនោះខាងសាលាខេត្តផ្តល់ដំណឹងថា ក្រុមហ៊ុនបានធ្វើកិច្ចសន្យាជួសជុលផ្លូវនោះវិញ ប៉ុន្តែរហូតមកដល់ពេលនេះផ្លូវនៅមិនទាន់បានជួសជុលវិញនៅឡើយទេ ធ្វើឱ្យអ្នកធ្វើដំណើរតាមដងផ្លូវខាងលើ អ្នកណាក៏ត្អូញត្អែរពីការលំបាកដែរ ពិសេសអ្នករស់នៅតាមដងផ្លូវនេះតែម្តង ។
សូមរំឭកថា ផ្លូវក្រាលកៅស៊ូ១ខ្សែបែកចេញពីផ្លូវជាតិលេខ៥ ត្រង់ចំណុចមន្ទីរអប់រំយុវជន និងកីឡាខេត្តថ្មីចូលទៅភូមិធម្មយុត្ត រួចចេញទៅក្រោយរបងស៊ីម៉ាក់ ឆ្លងកាត់មុខសាលារៀនកាណាន បត់ឡើងទៅផ្លូវ លេខ ៥៣ ដែលមានប្រវែងជាង៣គីឡូម៉ែត្រ ត្រូវបានអាជ្ញាធរខេត្តជំនាន់លោក ទូច ម៉ារីម ជាអភិ បាល ខេត្ត កសាងដោយក្រាលកៅស៊ូយ៉ាងស្អាត ប្រជាពលរដ្ឋរីករាយសប្បាយចិត្តគ្រប់គ្នា ពិសេសអ្នករស់នៅតាមដងផ្លូវដែលធ្លាប់តែជាដីក្រហម ពេលមកបានផ្លូវក្រាលកៅស៊ូយ៉ាងស្អាតបែបនេះ ។ប៉ុន្តែមិនទាន់បានប៉ុន្មានផង ស្រាប់តែមានក្រុមហ៊ុនដឹកថ្មមួយ ដែលមានរថយន្តចំណុះចាប់ពី៦០តោនទៅ៧០តោន ដឹកថ្មពីភ្នំក្នុងឃុំពង្រ ឡើងតាមផ្លូវលេខ៥៣ រួចដឹកតាមផ្លូវកៅស៊ូដែលស្ថាបនាដោយអាជ្ញាធរខេត្ត ដើម្បីដឹកចេញមកផ្លូវជាតិលេខ៥ រួចបន្តចុះទៅមាត់ទន្លេចំណុចភូមិព្រែកសាលា ឃុំទឹកហូត ស្រុករលាប្អៀរ ដើម្បីដាក់ចូលសាឡង់ដឹកបន្តទៅរាជធានីភ្នំពេញ ។
ពេលធ្វើសកម្មភាពដែលបំផ្លាញផ្លូវដោយក្រុមហ៊ុនដឹកថ្មខាងលើ ក៏មានការចុះផ្សាយតាមប្រព័ន្ធផ្សព្វផ្សាយនានា បន្ទាប់មកក៏ឃើញសមត្ថកិច្ចចម្រុះមាន ថ្នាក់ខេត្ត និងថ្នាក់ក្រសួងចាប់ឃាត់រថយន្តខាងលើ១លើកជា២លើកដែរ ដើម្បីឱ្យសងផ្លូវដែលរងការខូចខាត ។ កាលណោះចាប់បាន១ថ្ងៃឬ២ថ្ងៃ ក៏ឃើញដោះលែងទៅវិញ ហើយឮថាភាគីក្រុមហ៊ុនបានធ្វើកិច្ចសន្យាជួសជុលសងផ្លូវនោះវិញ ។ ប៉ុន្តែមកដល់ពេលនេះ ផ្លូវដែលកសាងអស់រាប់លានដុល្លារ ហើយត្រូវបំផា្លញដោយក្រុមហ៊ុនដឹកថ្មនៅមិនទាន់ឃើញបានសងសំណង ឬជួសជុលយ៉ាងណានោះទេ ហើយផ្លូវកន្លែងខ្លះបានក្លាយជាត្រពាំង ថ្លុកអស់ទៅហើយ ធ្វើឱ្យប្រជាពលរដ្ឋត្អូញត្អែរពីការលំបាកនេះគ្រប់ៗគ្នា ។
ពាក់ព័ន្ធនឹងការខូចខាតផ្លូវក្រាលកៅស៊ូក្នុងខេត្តអស់តម្លៃសន្ធឹកសន្ធាប់ មិនទាន់មានការជួសជុលសងបែបនេះ លោក កែវ ពៅ ប្រធានមន្ទីរសាធារណការនិងដឹកជញ្ជូនខេត្ត បានបញ្ជាក់ថា ផ្លូវមួយខ្យែខាងលើនេះកសាងដោយអាជ្ញាធរខេត្ត ដោយសហការជាមួយក្រុមហ៊ុន ឈន សារ៉ាណេ កាលពីជំនាន់លោក ទូច ម៉ារីម ជាអភិបាលខេត្ត ។ ក្រោយពីផ្លូវនេះខូចខាត ឃើញខាងអាជ្ញាធរខេត្តគិតគូរពីការជួសជុលឡើងវិញដែរ ដោយកំពុងទាក់ទងជាមួយក្រុម ឈន សារ៉ាណេ ជួសជុលឡើងវិញ ។ ប៉ុន្តែដោយខេត្តកំពង់ឆ្នាំង កំពុងមមាញឹកអភិវឌ្ឍន៍ច្រាំងទន្លេផ្សារក្រោម ទើបបំបែរការងារនេះមកសម្រុកធ្វើច្រាំងទន្លេសិន ហេតុនេះការជួសជុលផ្លូវនោះឡើងវិញមានការយឺតយ៉ាវអាចនៅឆ្នាំក្រោយៗទៀត ។
លោកប្រធានមន្ទីរបញ្ជាក់ថា ផ្លូវក្នុងខេត្ត -ក្រុងទាំងអស់ ខាងខេត្ត-ក្រុងជាអ្នកកសាងនិងថែទាំ ដោយខេត្តម្ចាស់ការចង់រកដៃគូកសាង ឬដេញថ្លៃយ៉ាងណា ជារឿងរបស់ខេត្ត ។ ចំណែកខាងមន្ទីរសាធារណការ ជាអ្នកជួសជុល កសាងតែផ្លូវជាតិ និងផ្លូវមានលេខប៉ុណ្ណោះ ។ ទោះជាយ៉ាងនេះក្តី មានមតិលើកឡើងថាពេលក្រុមហ៊ុនដឹកថ្មកំពុងបំផ្លាញផ្លូវ មានក្រុមចម្រុះចុះចាប់ញឹកញាប់ណាស់ ហើយបានឮត្រឹមតែសន្យាជួសជុល កសាងឡើងវិញប៉ុណ្ណោះ ។ប៉ុន្តែមកដល់ពេលនេះ ផ្លូវបានកា្លយជាថ្លុក ត្រពាំងអស់ទៅហើយ មិនទាន់ឃើញក្រុមហ៊ុនជួសជុលសងឡើយហើយក៏ស្ងាត់ឈឹង ៕
ចែករំលែកព័តមាននេះ