ខេត្តកំពង់ឆ្នាំង ៖ ភ្លៀងនិងខ្យល់កន្ត្រាក់បានធ្វើអោយដើមឈើជាច្រើនដើមបានបាក់រលំមកលើផ្លូវបង្កការស្ទះចរាចរណ៍លើផ្លូវជាតិលេខ៥រយៈពេលខ្លី ។ ហេតុការណ៍នេះបានកើតឡើងកាលពីវេលាម៉ោង៥និង១០នាទីល្ងាចថ្ងៃទី៧ ខែឧសភា ឆ្នាំ២០១៨ ក្នុងឃុំចំនួន២ ក្នុងស្រុកបរិបូរណ៌ ។
លោក ឃួន សៅរុំ អភិបាលស្រុកបរិបូរណ៌បានអោយដឹងថា ភ្លៀងនិងខ្យល់កន្ត្រាក់បានរំលំដើមឈើមកលើផ្លូវជាតិលេខ៥ ចាប់ពីភូមិផ្សារ ឃុំផ្សារ ដល់ភូមិស្រះកែវ ឃុំមេលំ អស់ចំនួន២៤ដើម បណ្តាលឱ្យស្ទះចរាចរណ៍រយៈពេលខ្លី ។ ពេលនោះលោកបានដឹកនាំកម្លាំងសមត្ថកិច្ចនិង អាជ្ញាធរភូមិឃុំ ព្រមទាំងប្រជាពលរដ្ឋចេញធ្វើសកម្មភាពអារ និងកាត់ដើមឈើជាកង់ៗ បន្ទាប់មកយកត្រាក់ទ័រ រុញចេញអោយផុតពីផ្លូវ ដើម្បីសម្រួលការស្ទះចរាចរណ៍ ជូនអ្នកធ្វើដំណើរអោយទាន់ពេលវេលា ។
លោកបានបន្តថា ចំពោះហេតុការណ៍ ភ្លៀងនិងខ្យល់កន្ត្រាក់កាលពីល្ងាចថ្ងៃទី៧ ខែឧសភា ក្នុងស្រុកបរិបូរណ៍ នោះក៍នៅមានការខូចខាតផ្ទះប្រជាពលរដ្ឋជាច្រើនខ្នងផងដែរ ហើយអាជ្ញាធរមូលដ្ឋានកំពុងស្រង់ស្ថិតិ ។
អាជ្ញាធរខេត្តធ្លាប់បានអំពាវនាវដល់ប្រជាពលរដ្ឋ សូមមេត្តាប្រុងប្រយត្ន័ចំពោះភ្លៀងនិងខ្យល់ ដែលតែងតែកើតឡើងក្នុងរដូវវស្សាជារៀងរាល់ឆ្នាំ ៕
ចែករំលែកព័តមាននេះ