ខេត្តមណ្ឌលគិរី ៖ ដោយមានការឯកភាពពីរដ្ឋមន្ត្រីក្រសួងបរិស្ថាន មន្ទីរបរិស្ថានខេត្តមណ្ឌលគិរីបានបង្កើនកសិដ្ឋានចិញ្ចឹមជ្រូកបែបធម្មជាតិ១កន្លែង ស្ថិតនៅដែនជម្រកសត្វព្រៃភ្នំណាមលៀ ក្នុងគោលបំណងជួយលើកស្ទួយជីវភាពរបស់ប្រជាពលរដ្ឋនៅក្នុងសហគមន៍ និងជាការទាក់ទាញភ្ញៀវទេសចរមកទស្សនាផងដែរ ។ ប្រធានមន្ទីរបរិស្ថានខេត្តមណ្ឌលគិរី លោក…
ខេត្តមណ្ឌលគិរី ៖ ដោយមានការឯកភាពពីរដ្ឋមន្ត្រីក្រសួងបរិស្ថាន មន្ទីរបរិស្ថានខេត្តមណ្ឌលគិរីបានបង្កើនកសិដ្ឋានចិញ្ចឹមជ្រូកបែបធម្មជាតិ១កន្លែង ស្ថិតនៅដែនជម្រកសត្វព្រៃភ្នំណាមលៀ ក្នុងគោលបំណងជួយលើកស្ទួយជីវភាពរបស់ប្រជាពលរដ្ឋនៅក្នុងសហគមន៍ និងជាការទាក់ទាញភ្ញៀវទេសចរមកទស្សនាផងដែរ ។
ប្រធានមន្ទីរបរិស្ថានខេត្តមណ្ឌលគិរី លោក កែវ សុភគ៌ បានឲ្យដឹងថា ការបង្កើតកសិដ្ឋានចិញ្ចឹមជ្រូកនេះ នឹងជួយដល់ជីវភាពរបស់ប្រជាសហគមន៍បានយ៉ាងប្រសើរ ហើយក៏បម្រើឲ្យវិស័យទេសចរណ៍ផងដែរ ដោយសារទីផ្សារជ្រូកជនជាតិ មានតម្រូវការ និងតម្លៃខ្ពស់នាពេលបច្ចុប្បន្ននេះ ។
លោក កែវ សុភគ៌ មានប្រសាសន៍ថា ៖«យើងទទួលបានការឯកភាព និងគោលការណ៍ពីលោករដ្ឋមន្ត្រីក្រសួងបរិស្ថាន ហើយនៅថ្ងៃខាងមុខ មន្ទីរមានផែនការពង្រីកការចិញ្ចឹមជ្រូក សម្រាប់ដែនជម្រកសត្វព្រៃទាំង៥នៅក្នុងខេត្ត និងសហគមន៍ » ។
នាយកដែនជម្រកសត្វព្រៃភ្នំណាមលៀ លោក វុធ សារុំ បានឲ្យដឹងកាលពីថ្ងៃទី៤ ឧសភា កន្លងមកថា នាពេលឆាប់ៗខាងមុខនេះ ដែនជម្រកសត្វព្រៃភ្នំណាមលៀ នឹងមានកសិដ្ឋានចិញ្ចឹមជ្រូកធម្មជាតិមួយ ដោយមានការថែទាំពីមន្ត្រីឧទ្យានុរក្ស ដើម្បីជួយលើកស្ទួយកម្រិតជីវភាពរស់នៅរបស់សហគមន៍តំបន់ការពារធម្មជាតិ ដែលមានការជួយជ្រោមជ្រែងពីក្រសួងបរិស្ថាន ។
លោក វុធ សារុំ បន្តថា ៖« ដែនជម្រកសត្វព្រៃភ្នំណាមលៀ ពិតជារីករាយចំពោះគម្រោងចិញ្ចឹមជ្រូកពូជនេះ ហើយមន្ដ្រីឧទ្យានុរក្សក៏បានប្តេជ្ញាចូលរួមអនុវត្តឱ្យបានជោគជ័យសំដៅបង្កើនប្រាក់ចំណូលក្នុងគ្រួសារ និងជីវភាពប្រចាំថ្ងៃរបស់មន្ត្រីឧទ្យានុរក្ស ព្រមទាំងជួយលើកស្ទួយកម្រិតជីវភាពរបស់ប្រជាសហគមន៍រស់នៅក្នុងតំបន់នោះផងដែរ » ។
លោកបញ្ជាក់ថា ៖« បន្ទាប់ពីក្រុមការងារក្រសួងបរិស្ថានបានចុះសិក្សាលទ្ធភាពជ្រើសរើសទីតាំងផលិតកូនជ្រូកពូជជនជាតិភាគតិចរួចមក ក្រុមការងារបានសម្រេចយកស្នាក់ការអភិរក្សនៃដែនជម្រកសត្វព្រៃភ្នំណាមលៀ ធ្វើជាទីតាំង ដែលស្ថិតក្នុងស្រុកពេជ្រាដា ខេត្តមណ្ឌល
គិរី »៕
ចែករំលែកព័តមាននេះ