ខេត្តព្រៃវែង ៖ សមត្ថកិច្ច និងប្រជាពលរដ្ឋរាប់សិបនាក់បាននាំគ្នាជួយអន្តរាគមពន្លត់អគ្គីភ័យដែលកំពុងតែឆាបឆេះរោងបាយ និងផ្ទះក្បឿងមួយខ្នងដែលម្ចាស់ទើបតែសាងសង់រួចថ្មីៗអស់ទឹកប្រាក់ជាង២ម៉ឺនដុល្លារ ។ ហេតុការណ៍នេះបានកើតឡើងកាលពីវេលាម៉ោង៤និង៣០នាទីល្ងាច ថ្ងៃទី៦ ខែឧសភា ឆ្នាំ២០១៨ នៅភូមិខ្នារ ឃុំព្រៃទឹង ស្រុកស៊ីធរកណ្តាល ខេត្តព្រៃវែង ។ ផ្ទះដែលត្រូវអគ្គីភ័យឆាបឆេះនេះជាប្រភេទផ្ទះឈើប្រក់ក្បឿងទំហំ៨ម៉ែត្រគុណ៩ម៉ែត្រ មានម្ចាស់ឈ្មោះ ប៉ូ យ៉យ ភេទស្រី អាយុ៤៤ឆ្នាំ ។
សមត្ថកិច្ចប៉ូស្តិ៍រដ្ឋបាលឃុំព្រៃទឹងបានឱ្យដឹងថា អគ្គីភ័យនេះកើតឡើងដោយសារតែភាពខ្ជីខ្ជាររបស់ម្ចាស់ផ្ទះខ្លួនឯងគឺនៅមុនពេលកើតហេតុម្ចាស់ផ្ទះបានដាំបាយនៅក្នុងរោងបាយដែលធ្វើនៅជាប់ពីក្រោយផ្ទះតែម្តង ពេលបាយពុះស្ត្រីជាម្ចាស់ផ្ទះបានលើកបាយជញ្ជាត់ រួចដាក់ឆ្នាំងទៅលើចង្ក្រានវិញ ហើយក៏ដកអូសដែលកំពុងឆេះនៅក្នុងចង្ក្រានចេញមកក្រៅទុកចោលនៅមុខចង្ក្រានដោយមិនបានពន្លត់ភ្លើងនោះទេ រួចក៏ចេញទៅអង្គុយលេងនៅផ្ទះអ្នកជិតខាងបាត់ លុះមួយសន្ទុះក្រោយមកក៏មានអគ្គីភ័យកើតឡើងតែម្តង ។
ប្រភពដដែលនេះបានបន្តទៀតថា ពេលភ្លើងចាប់ឆេះរោងបាយពីដំបូងគ្មានអ្នកណាបានដឹងនោះទេ រហូតទាល់តែភ្លើងឆេះពេញបន្ទុក និងចេញអណ្តាតភ្លើងសន្ធោសន្ធៅ ទើបម្ចាស់ផ្ទះ និងអ្នកស្រុកបានឃើញហើយក៏រាយការណ៍ប្រាប់សមត្ថកិច្ចឱ្យជួយអន្តរាគមភ្លាមៗ ប៉ុន្តែដោយពីដំបូងពុំមានឧបករណ៍ពន្លត់គ្រប់គ្រាន់ទើបធ្វើឱ្យអណ្តាតភ្លើងឆាបឆេះអស់រោងបាយទាំងស្រុង ហើយក៏រាលដាលដល់ផ្ទះខាងមុខទៀត ប៉ុន្តែដោយមានការអន្តរាគមពីលោកស្នងការខេត្តបានបញ្ជាឱ្យរថយន្តពន្លត់អគ្គីភ័យចំនួន៣គ្រឿងទៅជួយបាញ់ទឹកពន្លត់អស់ចំនួន២រថយន្ត ទើបធ្វើឱ្យអគ្គីភ័យត្រូវបានរលត់ទាំងស្រុងនៅវេលាម៉ោង៦ល្ងាចថ្ងៃដដែល ដោយឆេះផ្ទះក្បឿងខាងមុខអស់តែជាង៥០ភាគរយប៉ុណ្ណោះ ។
ទ្រព្យសម្បត្តិដែលរងការខូចខាតនៅក្នុងគ្រោះអគ្គីភ័យនេះមានដូចជា ទូរទស្សន៌១គ្រឿង, ទូដាក់ខោអាវ១ និងខោអាវមួយចំនួន ម៉ាស៊ីនដេ២គ្រឿង និងលុយក្នុងទូចំនួន១៨៥០ដុល្លារ រោងបាយមួយ និងឆេះផ្ទះមួយចំហៀងខាងក្រោយ គិតជាទឹកប្រាក់សរុបអស់ចំនួនប្រមាណជា១៨៧៦០ដុល្លារ ៕
ចែករំលែកព័តមាននេះ