ខេត្តមណ្ឌលគិរី ៖ សេចក្តីរាយការណ៍ឱ្យដឹងថា នារីវ័យក្មេងជនជាតិដើមភាគតិចម្នាក់បានទៅប្តឹងនគរបាលទាំងកណ្តាលយប់ ក្រោយរួចផុតពីរណ្តៅមរណៈក្រោមស្នាដៃបុរសជាគូសង្សានឹងគ្នា ដែលករណីមនុស្សឃាតនេះ កើតឡើងនៅចំណុចលើភ្នំដោះក្រមុំ ស្ថិតក្នុងភូមិឡៅការ សង្កាត់សុខដុម ក្រុងសែនមនោរម្យ កាលពីម៉ោងប្រមាណ០១ និង៣០នាទីរំលងអធ្រាត្រ ឈានចូលថ្ងៃទី០៧ ឧសភា នេះ ។
លោក កាន់ ពេញ អធិការនគរបាលក្រុងសែនមនោរម្យបានឱ្យដឹងថា នារីរងគ្រោះឈ្មោះញ៉ារ៉ា ស្រីនាង អាយុ២៣ឆ្នាំ ជាជនជាតិព្នង មានទីលំនៅក្នុងក្រុងសែនមនោរម្យ ដោយនាងបានរៀបរាប់ថា ជនសង្ស័យ ឈ្មោះ ឆុំ ដាវីត អាយុ២៦ឆ្នាំ ជាជាងកែច្នៃគ្រឿងសង្ហារឹមនៅស្រុកកោះញែក ទីលំនៅភូមិដូង ឃុំតារ៉ុង ស្រុកព្រៃឈរខេត្តកំពង់ចាម ស្នាក់នៅផ្ទះបងប្អូននៅក្នុងភូមិចំការតែ សង្កាត់ស្ពានមានជ័យ ដែលជាសង្សានឹងគ្នារយៈពេលជិត១ឆ្នាំហើយ ។
បើតាមនារីរងគ្រោះបានប្រាប់សមត្ថកិច្ចថា កាលពីវេលាម៉ោង១០យប់ (ថ្ងៃកើតហេតុ) ជនសង្ស័យបានហៅតាមទូរស័ព្ទឱ្យទៅជួប ។ ពេលនោះ ជនសង្ស័យបានយកម៉ូតូនាងទៅផ្លូវច្រកចូលភ្នំដោះក្រមុំ ពេលទៅដល់លើភ្នំដោះក្រមុំ ជនសង្ស័យក៏បានសុំបែកពីខ្លួន (ជនរងគ្រោះ) តែនាងមិនព្រម ក៏កើតការខ្វែងគំនិតគ្នា ពេលនោះនារីរងគ្រោះបានយំរហូតអស់កម្លាំង និងមានអាការៈឈឺពោះ ក៏ដេកទៅនឹងដីតែម្តង ។ លុះដល់ម៉ោង១ និង៣0នាទីរំលងអធ្រាត ឈានចូលថ្ងៃទី0៧ ឧសភា ក្រោយដឹងខ្លួនវិញ ជនសង្ស័យបានបបួលនាងត្រលប់ទៅផ្ទះ តែនារីរងគ្រោះថា ចាំខ្លួនបាត់ឈឺពោះសិន ។ បន្តិចក្រោយមក ជនសង្ស័យជាសង្សារ ក៏បានយកខ្សែកាតាប ពណ៌ខ្មៅ ប្រវែង៥៤សង់ទីម៉ែត្រមករឹត.កនាងសន្លប់បាត់ ហើយជនសង្ស័យក៏បានដឹកយកទៅបោះចោលនៅកន្លែងទីលានចាក់សំរាម ស្ថិតក្នុងភូមិឡៅការ សង្កាត់សុខដុម ក្រុងសែនមនោរម្យ ដើម្បីបំបាត់ដាន ។
លោក សូ សុវណ្ណ ស្នងការរងនគរបាលខេត្តបានឲ្យដឹងថា នៅម៉ោងប្រមាណជា៥ទៀបភ្លឺថ្ងៃទី០៧ ឧសភា ២០១៨ សមត្ថកិច្ចឃាត់បានជនសង្ស័យតាមបណ្តឹងរបស់នារីរងគ្រោះ ។ លោកស្នងការរងបន្តថា ក្រោយការឃាត់ខ្លួនជនសង្ស័យសារភាពថា ខ្លួនពិតជាបានយកខ្សែកាតាបរឹត.ក ជនរងគ្រោះពេលនាងសន្លប់និងដឹកទៅចោលនៅគំនរសំរាមមែន ។
ចែករំលែកព័តមាននេះ