ខេត្តបន្ទាយមានជ័យ ៖ សមត្ថកិច្ចចម្រុះថៃបានធ្វើការឃាត់រថយន្តមួយគ្រឿងឆែកឆេរឃើញពលករខ្មែរ១៣នាក់ ក្នុងនោះមានមេខ្យល់ម្នាក់ផងដែរ កាលពីព្រឹកថ្ងៃទី៥ ខែឧសភា ឆ្នាំ២០១៨ នៅក្នុងស្រុកអារញ្ញ ខេត្តស្រះកែវ ប្រទេសថៃ ។ នេះបើតាមប្រភពព័ត៌មានដែលគេបង្ហោះចែកចាយគ្នាតាមប្រព័ន្ធវ៉សអាប់ ។
ពលករទាំង១៣នាក់នេះ ត្រូវបានគេដឹកតាមរថយន្តមួយគ្រឿង ពណ៌ប្រផេះ ពាក់ស្លាកលេខថៃ 5300 ហើយគ្របស្បៃជិត ។ ប្រភពថា ក្រៅពីពលករទាំង១៣នាក់ សមត្ថកិច្ចថៃក៏បានធ្វើការឃាត់ខ្លួនអ្នកបើកបររថយន្តជាជនជាតិថៃម្នាក់ ឈ្មោះអាំង ផនសាងណារៀង ភេទប្រុស អាយុ៣៨ឆ្នាំ មានទីលំនៅស្រុកព្រុំបុរី ។
ប្រភពថា ក្រោយសមត្ថកិច្ចថៃតាមប្រម៉ាញ់ឃាត់បានរថយន្តនោះធ្វើការបើកតង់ត្រួតពិនិត្យ ស្រាប់តែឃើញពលករដេកត្រៀបត្រារដូករណែលដូចគេដឹកសត្វ ហើយក្នុងកាប៊ីនរថយន្តគេញាត់ពលករចូលអង្គុយបញ្ច្រៀតគ្នា ដូចកាតំអីចឹង ។
យោងការសួរនាំសមត្ថកិច្ចថៃថា ក្នុងចំណោមខ្មែរ១៣នាក់ គឺមានមេខ្យល់ម្នាក់ ហើយអ្នកបើកបរ និងមេខ្យល់នោះ គឺត្រូវមានទោស ព្រោះម្នាក់ជាអ្នកដឹកជញ្ជូនពលករឲ្យគេចពីចំណុចត្រួតពិនិត្យរបស់សមត្ថកិច្ច ឯមេខ្យល់ជាអ្នកនាំមនុស្សឆ្លងព្រំដែនចូលប្រទេសគេ ដោយគ្មានច្បាប់អនុញ្ញាតិ ។ យ៉ាងណាក៏ដោយពលករទាំងនេះគេមិនទាន់ស្គាល់អត្តសញ្ញាណនៅឡើយទេ គឺស្គាល់តែម្នាក់ដែលជាប់ចោទជាមេខ្យល់ គឺឈ្មោះលូន ភេទប្រុស អាយុ៤៥ឆ្នាំ ។
ជុំវិញករណីខាងលើកោះសន្តិភាពមិនអាចទាក់ទងសុំការបំភ្លឺពីលោកហ៊ុនសារឿនអគ្គកុងស៊ុលខ្មែរប្រចាំស្រុកអារញ្ញខេត្តស្រះកែវបានទេ ព្រោះទូរស័ព្ទមិនអាចទាក់ទងបាន ។
ដោយឡែកមន្ត្រីការិយាល័យទំនងព្រំដែនកម្ពុជា-ថៃប្រចាំច្រកទ្វារអន្តរជាតិប៉ោយប៉ែតម្នាក់ប្រាប់តាមទូរស័ព្ទនៅរសៀលថ្ងៃទី៦នេះថា បញ្ហាខាងលើខាងលោកមិនទាន់បានដឹងនៅឡើយទេ ។ យ៉ាងណាក៏ដោយលោកថា ករណីខាងលើវាកើតឡើងជាញឹកញាប់មកហើយ និងជាករណីដដែលៗពោលពេលខ្លះសមត្ថកិច្ចថៃស្ទាក់ចាប់បានពេលពលករកំពុងត្រូវបានគេដឹកតាមម៉ូតូក៏មានដែរ ។
គួរបញ្ជាក់ថាថ្មីៗនេះក៏មានពលករខុសច្បាប់ជួបគ្រោះថ្នាក់ចរាចរស្លាប់២របួសជាច្រើននាក់ដោយសារក្រឡាប់រថយន្តនៅខេត្តឆាក់ឆឺន ហើយករណីទាំងនេះគ្មានអ្នកទទួលខុសត្រូវឡើយ ហើយរាល់ការលួចឆ្លងដែនបច្ចុប្បន្ន គឺកើតឡើងនៅពេលយប់ បើសួរសមត្ថកិច្ចតែងតែបដិសេធដរាបណាពលករជួបបញ្ហាដូចករណីខាងលើៗទើបបែកធ្លាយ ៕
ចែករំលែកព័តមាននេះ