ខេត្តកណ្តាល ៖ ជនជួញដូរគ្រឿងញៀន២នាក់ក្នុងចំណោម៣នាក់ ហើយក្នុងនោះ២នាក់មានដីការចាប់ខ្លួនរបស់សាលាដំបូងខេត្តកណ្ដាលផងនោះ ត្រូវបានកម្លាំងនគរបាលស្រុកអង្គស្នួលសហការជាមួយកម្លាំងនគរបាលប៉ុស្តិ៍ទួលព្រិច និងប៉ុស្តិ៍ម្កាក់ធ្វើការចាប់ខ្លួន ព្រមទាំងដកហូតបានថ្នាំញៀនចំនួន៧កញ្ចប់ តម្លៃជាង៣លានរៀល រួមជាមួយអាវុធកែច្នៃចំនួន៤ដើមនិងសម្ភារៈមួយចំនួនទៀតផងដែរ។
ការចាប់ខ្លួននេះបានធ្វើឡើងកាលពីវេលាម៉ោង១១និង៣០នាទីព្រឹកថ្ងៃទី៥ ខែឧសភា ឆ្នាំ២០១៨ នៅតាមផ្លូវស្ថិតក្នុងភូមិច្រកក្រសាំង ឃុំទួលព្រិច ស្រុកអង្គស្នួល ខេត្តកណ្តាល ។
ជនសង្ស័យដែលត្រូវឃាត់ខ្លួននោះ ១-ឈ្មោះញឹម វុទ្ធ ហៅញ៉ន អាយុ៣៧ឆ្នាំ មានទីលំនៅបច្ចុប្បន្ននៅក្នុងភូមិវែង ឃុំម្កាក់ ស្រុកអង្គស្នួល ខេត្តកណ្តាល និង២-ឈ្មោះហោ ថេង អាយុ២៨ឆ្នាំ មុខរបរកម្មករសំណង់ មានទីលំនៅក្នុងភូមិអន្ទុងក្រវៀន ឃុំម្កាក់ ស្រុកអង្គស្នួល ខេត្តកណ្តាល ។ ចំណែកឯម្នាក់ទៀតដែលគេចខ្លួនបាត់ឈ្មោះកែវ ក្រូច មានទីលំនៅក្នុងភូមិវែង ឃុំម្កាក់ ស្រុកអង្គស្នួល ហើយជននេះក៏មានដីកាចាប់ខ្លួនពីសាលាដំបូងខេត្តកណ្ដាលដែរផង។
វត្ថុតាងដែលសមត្ថកិច្ចរកឃើញរួមមានថ្នាំញៀនចំនួន៧កញ្ចប់ ក្នុងនោះមានកញ្ចប់ធំ១កញ្ចប់, កញ្ចប់មធ្យម៤កញ្ចប់,និងកញ្ចប់តូច២កញ្ចប់ ។ ជញ្ជីងថ្លឹងថ្នាំញៀនចំនួន២គ្រឿង, អាវុធច្នៃបាញ់គ្រាប់កង់ចំនួន៤ដើម, ម៉ូតូចំនួន៣គ្រឿង រួមមានម៉ូតូម៉ាកហុងដា XR ពណ៏ខ្មៅ ពាក់ស្លាកលេខភ្នំពេញ 1BV-8317, ម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៧ពណ៍ខ្មៅ ពាក់ស្លាកលេខភ្នំពេញ 1DM-1448 និងម៉ូតូម៉ាកគ្រីសអង្គរ ពណ៍ក្រហម ពាក់ស្លាកលេខ យ-4524 ភព1 ។ ទូរសព្ឌ័ដៃម៉ាកណូគា១គ្រឿង រួមនិងឧបករណ៍សម្រាប់ប្រើប្រាស់និងវេចខ្ចប់គ្រឿងញៀនមួយចំនួនទៀត។
ព៍ត៌មានលម្អិតនឹងមានផ្សាយលើទំព័រកាសែតកោះសន្តិភាព
ចែករំលែកព័តមាននេះ