ខេត្តពោធិ៍សាត់ ៖ កាលពីយប់ថ្ងៃទី០១ ខែមេសា ឆ្នាំ២០១៨ ម៉ូតូបុកម៉ូតូស្លាប់០៣នាក់ មិនទាន់ទាំងធ្វើបុណ្យចប់ស្រួលបួលផង ស្រាប់តែនៅយប់ថ្ងៃទី០៣ ខែនេះ ម៉ូតូបុកគោយន្ដស្លាប់០២នាក់ទៀត…
ខេត្តពោធិ៍សាត់ ៖ កាលពីយប់ថ្ងៃទី០១ ខែមេសា ឆ្នាំ២០១៨ ម៉ូតូបុកម៉ូតូស្លាប់០៣នាក់ មិនទាន់ទាំងធ្វើបុណ្យចប់ស្រួលបួលផង ស្រាប់តែនៅយប់ថ្ងៃទី០៣ ខែនេះ ម៉ូតូបុកគោយន្ដស្លាប់០២នាក់ទៀត នៅស្រុកក្រគរ ពិតជាសាហាវខ្លាំងណាស់ ។ ករណីគ្រោះថ្នាក់ចរាចរណ៍លើកទីមួយកើតឡើងនៅចន្លោះគីឡូម៉ែតលេខ១៥៥ ១៥៦ ស្ថិតក្នុងភូមិប៉ប៉ិត ឃុំអន្លង់ត្នោត ហើយលើកទី២នេះកើតឡើងចន្លោះគីឡូម៉ែត្រលេខ១៦៤ ១៦៥ ស្ថិតក្នុងភូមិក្រាំងធំ ឃុំអូរសណ្តាន់ ស្រុកក្រគរ ។
សមត្ថកិច្ចឲ្យដឹងថា គ្រោះថ្នាក់ចរាចរណ៍នេះបង្កឡើងដោយម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខពោធិ៍សាត់ 1E-0169 ជិះគ្នាពីរនាក់ក្នុងទិសដៅពីកើតទៅលិច ។ ទៅដល់ចំណុចកើតហេតុបានបុកគោយន្តកន្ត្រៃចំពីក្រោយយ៉ាងពេញទំហឹង បណ្តាលឲ្យស្លាប់ទាំង០២នាក់នៅនឹងកន្លែងកើតហេតុ ។
ក្រោយកើតហេតុអ្នកបើកបរគោយន្តកន្ត្រៃមិនស្គាល់អត្តសញ្ញាណបានបើករត់គេចខ្លួនបាត់ស្រមោល ។ ចំណែកជនរងគ្រោះត្រូវបានគេស្គាល់ឈ្មោះ យ៉ា ភេទប្រុស អាយុ២៤ឆ្នាំ នៅខេត្តកំពង់ឆ្នាំង (ជាអ្នកបើកម៉ូតូ) និងម្នាក់ទៀតរួមដំណើរឈ្មោះ អឿន អាយុ២២ឆ្នាំ ភេទប្រុស មានទីលំនៅឃុំប្រាសាទ ស្រុកកំពង់ត្របែក ខេត្តព្រៃវែង ។
សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះបណ្ដាលមកពីអ្នកបើក ម៉ូតូលឿនពេលយប់អាចស្រវឹងស្រាទៀតផង ចំណែកគោយន្ដពុំមានបិទចំណាំងផ្លាតជាសញ្ញានោះទេ ។ បន្ទាប់ពីការស្រាវជ្រាវឃើញហើយ សមត្ថកិច្ចបានប្រគល់សព និងម៉ូតូទៅឲ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណី ៕
ចែករំលែកព័តមាននេះ