ខេត្តត្បូងឃ្មុំ ៖ ម៉ូតូ២គ្រឿងបានបុកគ្នាពេញទំហឹង បណ្តាលឱ្យបុរសម្នាក់បាក់កស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង១១និង៣០នាទីយប់ថ្ងៃទី៣ ឧសភា ២០១៨ ត្រង់ចំណុចភូមិជើងឡង សង្កាត់សួង ក្រុងសួង។
ជនរងគ្រោះឈ្មោះ សេង អូន ជាមន្ត្រីប៉ុស្តិ៍រដ្ឋបាលសង្កាត់វិហារហ្លួង ។
លោកវរសេនីយ៏ត្រី ឆៃ សុខុន អធិការរងនគរបាលក្រុងសួង ទទួលផែនសណា្តប់ធ្នាប់ បានឱ្យដឹងថា នៅល្ងាចថ្ងៃកើតហេតុ មន្ត្រីប៉ុស្តិ៍រដ្ឋបាលរងគ្រោះខាងលើបានទៅចូលរួមពិធីមង្គលការគេ លុះមកដល់ពេលយប់បានជិះម៉ូតូម៉ាកហ្ស៊ូមម័រ ក្នុងទិសដៅពីលិចមកកើតស្របពេលមកដល់ចំណុចខាងក៏បុកម៉ូតូមួយគ្រឿងទៀត បណ្តាលឲ្យស្លាប់ភ្លាមៗតែម្តង ។
លោកអធិការរងបានបន្តថា ចំណែកភាគីម្ខាងទៀតដោយបានជិះត្រឹមត្រូវតាមគន្លងផ្លូវរបស់គេ បណ្តាលឲ្យរងរបួសស្រាលផងដែរ ។ ក្រោយពេលកើតហេតុ ពលរដ្ឋរាយការណ៏មកសមត្ថកិច្ច និងបានចាត់ឲ្យកម្លាំងនគរបាលចរាចរណ៍ចុះទៅពិនិត្យដល់កន្លែងកើតហេតុធ្វើការវាស់វែង ព្រមទាំងនាំយកម៉ូតូទាំង២គ្រឿងមករក្សាទុកនៅអធិការដ្ឋាននគរបាលក្រុងសួង ដើម្បីដើម្បីរង់ចាំដោះស្រាយទៅតាមច្បាប់ ។
សពត្រូវបានសមត្ថកិច្ចដឹកតាមរថយន្តមកកាន់លំនៅឋានក្នុងភូមិទី៦ សង្កាត់វាលវង់ ក្រុងកំពង់ចាម ដើម្បីធ្វើបុណ្យតាមប្រពៃណីផងដែរ ៕
ចែករំលែកព័តមាននេះ