ខេត្តព្រៃវែង ៖ ប្រព័ន្ធធារាសាស្ត្រវ៉ៃកូជំហានទី២ ដែលសាងសង់ឡើងកាត់ខេត្តព្រៃវែង និងស្វាយរៀង ដែលបានចាប់ផ្តើមដំណើរការសាងសង់ កាលពីខែកក្កដា ឆ្នាំ២០១៧ រហូតមកដល់ពេលនេះ សម្រេចបានប្រមាណជាង៤៥%ហើយ។
គម្រោងសាងសង់ប្រព័ន្ធធារាសាស្ត្រដ៏មានសក្តានុពលនេះបានចាប់ផ្តើមបើកការដ្ឋានសាងសង់កាលពីថ្ងៃទី២៨ ខែកក្កដា ឆ្នាំ២០១៧ រហូតមកដល់ពេលនេះមានរយៈពេលជាង៩ខែមកហើយ ហើយបើតាមផែនការ គំរោងសាងសង់ប្រពន្ធ័ធារាសាស្ត្រវ៉ៃកូជំហ៊ានទី២នេះគ្រោងនឹងបញ្ចប់ការសាងសង់នៅក្នុងរយៈពេលប្រមាណជា៥២ខែ។ ប្រព័ន្ធធារាសាស្ត្រវ៉ៃកូជំហ៊ាន២នេះ ត្រូវបានសាងសង់ឡើងដោយតភ្ជាប់ពីទន្លេតូចក្នុងស្រុកកំពង់ត្របែក ខេត្តព្រៃវែង ឆ្ពោះចាក់ទៅដល់ទន្លេវ៉ៃកូ ដែលនៅកណ្តាលក្រុងស្វាយរៀង។
មន្ត្រីជំនាញនៃមន្ទីរអភិវឌ្ឍន៌ជនបទខេត្តព្រៃវែងបានអោយកោះសន្តិភាពដឹងថា បច្ចុប្បន្ននេះ សកម្មភាពសាងសង់ប្រព័ន្ធធារាសាស្ត្រនេះ កំពុងមមាញឹកខ្លាំងណាស់ ដោយក្រុមហ៊ុនដែលទទួលម៉ៅការសាងសង់ បានដាក់គ្រឿងចក្រប្រមាណជាង៤០០គ្រឿង ដើម្បីពន្លឿនការសាងសង់ ឲ្យឆាប់រួចរាល់ទៅតាមការគ្រោង
ទុក។ ហើយបើតាមការរំពឹងទុក ប្រព័ន្ធធារាសាស្ត្រវ៉ៃកូជំហានទី២នេះ នឹងផ្តល់ទឹកស្រោចស្រពលើផ្ទៃដីបង្កបង្កើនផលស្រូវរដូវវស្សារបស់ប្រជាពលរដ្ឋ នៅក្នុងខេត្តព្រៃវែង និងស្វាយរៀង បានប្រមាណជិត១០ម៉ឺន
ហិកតា ព្រមទាំងស្រូវប្រាំងជិត២៥០០០ហិកតាទៀតផងដែរ។
គួរបញ្ជាក់ផងដែរថា សកម្មភាពសាងសង់នៅក្នុងគំរោងទី២ ដែលកំពុងអនុវត្តនៅពេលនេះ រួមមាន ៖ ជីកព្រែក២ខ្សែសរុបប្រវែង១៤,៦គីឡូម៉ែត្រ សាងសង់ប្រឡាយមេ៤ខ្សែសរុបប្រវែង៥៩,៥គីឡូម៉ែត្រ សាងសង់ទំនប់សណ្តប្រវែង៤១,៥គីឡូម៉ែត្រ សង់សំណង់បង្ហៀរទឹក១កន្លែង សំណង់ស្ទាក់ទឹក៦កន្លែង និងសំណង់សម្រួលចរន្តទឹក៨កន្លែង សាងសង់ស្ថានីយបូមទឹកចំនួន៤កន្លែង និងសំណង់លូទឹក៣២កន្លែង អនុវត្តគម្រោងដោយក្រុមហ៊ុន Guangdong Foreign Construction Co., Ltd នៃសាធារណរដ្ឋប្រជាមានិតចិន។
ក្រោយពេលបញ្ចប់ការសាងសង់ទាំងស្រុង នៅឆ្នាំ២០២១ខាងមុខ ប្រព័ន្ធធារាសាស្ត្រទន្លេវ៉ៃកូ ទាំងពីរជំហាន (ជំហានទី១ និងជំហានទី២) មានសក្តានុពលដែលអាចផ្តល់ទឹកស្រោចស្រពស្រូវរដូវវស្សា និងស្រូវរដូវប្រាំង លើផ្ទៃដីសរុបប្រមាណជា៣០ម៉ឺនហិកតា នៅក្នុងខេត្តព្រៃវែង ស្វាយរៀង កំពង់ចាម និងមួយភាគទៀតនៅខេត្តត្បូងឃ្មុំ នេះបើយោងតាម លោក ជុំ សុភី ប្រធានមន្ទីរអភិវឌ្ឍន៌ជនបទ ខេត្តព្រៃវែង បញ្ជាក់ឲ្យដឹងកាលពីព្រឹកមិញនេះ៕
ចែករំលែកព័តមាននេះ