រាជធានីភ្នំពេញ ៖ ស្ត្រីចំណាស់ម្នាក់ចេញពីហូបការបានដើរឆ្លងផ្លូវត្រឡប់ទៅផ្ទះវិញ ក៏ត្រូវនារីវ័យក្មេងម្នាក់បានជិះម៉ូតូគេចពីរថយន្តជ្រុលទៅបុកបណ្តាលឲ្យស្ត្រីរូបនោះរងរបួសធ្ងន់ កាលពីវេលាម៉ោង១០យប់ ថ្ងៃទី៣ ខែឧសភា ឆ្នាំ២០១៨ ទល់មុខ និងមន្ទីពហុព្យាបាល ហុងអ៊ិន ផ្លូវមុនីរ៉េត សង្កាត់បឹងសាឡាង ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញស្ត្រីចំណាស់ម្នាក់ចេញពីញុំាការបានដើរឆ្លងកាត់ទទឹងផ្លូវព្រះមុនីរ៉េត ក្នុងទិសដៅពីត្បូងទៅជើង ខណៈពេលដើរឆ្លងដល់ពាក់កណ្តាលផ្លូវ ក៏ស្រាប់តែមាននារីវ័យក្មេងម្នាក់ ជិះម៉ូតូម៉ាកគុបជ្រុង សេ៩០ ពណ៌ទឹកប៊ិច ពាក់ស្លាកលេខ កណ្តាល1H -8222 ធ្វើដំណើរតាមផ្លូវព្រះមុនីរ៉េត ក្នុងល្បឿនលឿន រួចហើយបានគេច នឹងរថយន្តមិនចាំម៉ាក១គ្រឿង ដែលធ្វើដំណើរស្របទិសគ្នា ក៏ជ្រុលទៅបុកនឹងស្ត្រីដែលកំពុងតែដើរឆ្លងផ្លូវយ៉ាងពេញទំហឹង បណ្តាលឲ្យស្ត្រីរូបនោះដួលបោកក្បាលទៅថ្នល់ហូរឈាមសន្លប់ស្តូកស្តឹង ។ ភ្លាមនោះដែរ ជនរងគ្រោះត្រូវបានរថយន្តសង្គ្រោះជួយមកដឹកយកទៅសង្គ្រោះ នៅមន្ទីរពហុព្យាបាល ហុងអ៊ិន ។
ដោយឡែកខាងម៉ូតូបង្កវិញ អ្នកបើកម៉ូតូរងរបួសដាច់មុខ និងរលាត់ដៃរលាត់ជើងតិចតួច ត្រូវបានក្រុមគ្រួសារបានមកដឹកព្យាបាលរបួសនៅមន្ទីរពេទ្យ ចំណែកម៉ូតូរងការខូចខាត បែកស្តុបខាងឆ្វេង បន្តិចបន្តួច ។
បើតាមសម្តីបងប្អូនស្ត្រីរងគ្រោះបានឲ្យដឹងថា ជនរងគ្រោះទើបតែចេញមកពីហូបការបងប្អូន ហើយត្រូវបានបងប្អូនដឹកតាមរថយន្តជូនមកផ្ទះ តែដាក់នៅផ្លូវខាងស្តាំដៃ ឲ្យស្ត្រីរងគ្រោះដើរឆ្លងផ្លូវទៅផ្ទះ ទើបជួបគ្រោះថ្នាក់បែបនេះ ។
ក្រោយពេលកើតហេតុ សមត្ថកិច្ចមូលដ្ឋាន និងជំនាញបានចុះទៅកន្លែងកើតហេតុ រួចហើយក៏បានធ្វើការវាស់វែងយកម៉ូតូទៅរក្សារទុកនៅអធិការដ្ឋានខណ្ឌទួលគោក ដើម្បីរង់ចាំធ្វើការដោះស្រាយ ៕
ចែករំលែកព័តមាននេះ