រាជធានីភ្នំពេញ ៖ ស្ត្រីម្នាក់ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតស្រាល រាជធានីភ្នំពេញ ចាប់ខ្លួនកាលពីថ្ងៃទី២ ឧសភា ២០១៨ តាមដីកាបង្គាប់ឲ្យចាប់ខ្លួន និងឃុំខ្លួនរបស់លោក អ៊ី…
រាជធានីភ្នំពេញ ៖ ស្ត្រីម្នាក់ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតស្រាល រាជធានីភ្នំពេញ ចាប់ខ្លួនកាលពីថ្ងៃទី២ ឧសភា ២០១៨ តាមដីកាបង្គាប់ឲ្យចាប់ខ្លួន និងឃុំខ្លួនរបស់លោក អ៊ី ថាវរៈ ចៅក្រមស៊ើបសួរសាលាដំបូងរាជធានីភ្នំពេញ ពាក់ព័ន្ធករណីចេញមូលប្បទានបត្រអត់សាច់ប្រាក់ (សែកស្អុយ) លើទឹកប្រាក់ចំនួន ៤.០០០ ដុល្លារអាមេរិក។ ស្ត្រីជាប់សង្ស័យឈ្មោះ សួស សិលា អាយុ៤៤ឆ្នាំ មានទីលំនៅផ្ទះលេខ២៥០ ផ្លូវលេខ១០១ ភូមិ.សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
តាមដីកាបង្គាប់ឲ្យចាប់ខ្លួន និងឃុំខ្លួនលេខ១៩៦ ត.ងធន ចុះថ្ងៃទី២៣ មីនា ២០១៨ របស់ចៅក្រមស៊ើបសួរបានបញ្ជាក់ថា ស្ត្រីឈ្មោះ សួស សិលា ជាប់ចោទពីបទ.ចេញមូលប្បទានបត្រ គ្មានសាច់ប្រាក់ ប្រព្រឹត្តនៅរាជធានីភ្នំពេញ កាលពីថ្ងៃទី០៧ កញ្ញា ២០១៣ បទល្មើសនេះដែលត្រូវ ផ្តន្ទាទោសតាមបញ្ញត្តមាត្រា២៣១ នៃច្បាប់ស្តីពីឧបករណ៍ជួញដូរបាន និងប្រតិបត្តិការទូទាត់សងប្រាក់។ បង្គាប់ទៅសមត្ថកិច្ចឲ្យឃុំខ្លួនដាក់ពន្ធនាគារព្រៃស(ម១) ជាបណ្តោះអាសន្ន រហូតដល់មានសេចក្តីសម្រេចផ្សេង។ ក្រោយពីចាប់ខ្លួនស្ត្រីជាប់សង្ស័យត្រូវបានសមត្ថកិច្ច នាំទៅជូនចៅក្រមស៊ើបសួរ តាមដីកាបង្គាប់ឲ្យចាប់ខ្លួន និងឃុំខ្លួននោះ៕
ចែករំលែកព័តមាននេះ