ខេត្តកំពង់ចាម ៖ ទោះបីជាប្រមុខរាជរដ្ឋាភិបាលកម្ពុជា ត្រូវបានដកហូតផ្សារបឹងកុក ស្ថិតនៅក្នុងសង្កាត់ កំពង់ចាម ក្រុងកំពង់ចាម ឲ្យស្ថិតនៅក្រោមការគ្រប់គ្រង់របស់រដ្ឋវិញយ៉ាងណាក្តី ក៏ក្រុមអ្នកទារភាស៊ី នូវតែបង្កព្យុះភ្លៀងដោយទារភាស៊ីលើសសៀវភៅបន្ទុកដដែល។…
ខេត្តកំពង់ចាម ៖ ទោះបីជាប្រមុខរាជរដ្ឋាភិបាលកម្ពុជា ត្រូវបានដកហូតផ្សារបឹងកុក ស្ថិតនៅក្នុងសង្កាត់
កំពង់ចាម ក្រុងកំពង់ចាម ឲ្យស្ថិតនៅក្រោមការគ្រប់គ្រង់របស់រដ្ឋវិញយ៉ាងណាក្តី ក៏ក្រុមអ្នកទារភាស៊ី
នូវតែបង្កព្យុះភ្លៀងដោយទារភាស៊ីលើសសៀវភៅបន្ទុកដដែល។ ជាមួយនោះការលក់ដូរដោយបាន
ដាក់ហៀរសឹងតែពាក់កណ្តាលថ្នល់ ដោយបានបង្កឲ្យកកស្ទះចរាចរណ៍រាល់ព្រឹកថែមទៀតផង។
អាជីវករលក់បន្លែម្នាក់ប្រាប់ឲ្យដឹងនៅព្រឹកថ្ងៃទី០៣ ឧសភា ២០១៨ថា កាលពីមុនគាត់លក់នៅផ្នែក
ខាងលើជាមួយនឹងអ្នកផ្សេងៗទៀតជាច្រើននាក់ ហើយភាស៊ីវិញត្រូវបង់១.០០០រៀល ក្រោយពីផ្សារ
ត្រូវបានថ្នាក់លើឲ្យយកមកនៅក្រោមការគ្រប់គ្រងដោយរដ្ឋវិញ ។ ក៏មានការចាប់ឆ្នោតយកកន្លែងលក់
ដូរតែមានអាជីវករខ្លះបាននាំគ្នាមកដាក់លក់នៅចិញ្ចើមថ្នល់ និងបានបិទផ្លូវធ្វើឲ្យមនុស្សមិនអាចចូល
ទៅកន្លែងគ្រែលក់ដូររបស់គាត់កើត។
ដោយសារតែលក់ដូរមិនដាច់នោះ ក៏រើកន្លែងមកលក់ដូរនៅចិញ្ចើមផ្លូវដូចគេឯងដែរ។ ហើយគ្រែជាច្រើនមិនមានអាជីវករលក់ដូរនោះទេ ត្រូវបានទុកចោលនាំគ្នាមកលក់នៅតាមចិញ្ចើមថ្នល់អស់ ហើយភាស៊ីវិញគាត់បង់តែ៥០០រៀល។ អាជីវករឈ្មោះ គឹម ស្រ៊ាង ភេទស្រី អាយុ៦៥ឆ្នាំ លក់បន្លែប្រាប់ថា កាលពីមុនគាត់ធ្លាប់ធ្វើចម្ការ តែដោយចាស់ទៅហើយនោះ កម្លាំងចុះ ខ្សោយផងក៏បានងាកមកលក់បន្លែនៅផ្សារបឹងកុក លើផ្លូវថ្នល់ពីមុនភាស៊ីបង់២.០០០រៀល ក្នុងនោះមានអនាម័យ ថ្លៃដី ពេលដែលផ្សារគ្រប់គ្រងដោយឯកជន តែមកដល់សព្វថ្ងៃក្រោមការ គ្រប់គ្រប់ដោយរដ្ឋវិញគេយកតែ៥០០រៀលទេ។ ហើយក្នុង១ថ្ងៃគាត់អាចទទួលប្រាក់ចំណេញប្រមាណ ជា២០.០០០រៀល គ្រាន់នឹងដោះស្រាយជីវភាពគ្រួសារ ត្រូវតែប្រឹងលក់ដូរព្រោះរាល់ថ្ងៃគេហៅបុណ្យ និងការច្រើន។
អ្នកលក់នំឆូយប្រាប់ថា ក្នុងមួយព្រឹកកាលពីមុនត្រូវបង់ភាស៊ី១.០០០រៀល សម្រាប់នំដាក់លក់ក្នុង១ថាសនោះ តែមកដល់សព្វថ្ងៃត្រូវបង់ឲ្យភាស៊ីតែ៥០០រៀល ដោយមិនមានការលើកលែងនោះទេ។ លោក ចាន់ ផល្លី អភិបាលក្រុងកំពង់ចាម ប្រាប់ឲ្យដឹងដែរថា ផ្សារបឹងកុកកំពុងតែស្ថិតនៅក្នុងអន្តរកាល ដោយក្រសួងហិរញ្ញវត្ថុគិតគូរធ្វើសំណងផលប៉ះពាល់ ឲ្យអ្នកវិនិយោគផ្សារបឹងកុកចេញ ដើម្បីឲ្យគណៈអាជីវករចូលទៅគ្រប់គ្រង។ សម្រាប់តម្លៃលៃភាស៊ី ម៉ូតូវិញមិនឲ្យយក១.០០០រៀលនោះទេ គឺឲ្យយកតែ៥០០រៀល ចំណែកអ្នកលក់នំ១កញ្ច្រែងឬថាសនោះ មិនត្រូវឲ្យបង់ភាស៊ីទេ ហើយអ្នកណាដែលទៅទារលុយនោះគឺពិតជាទង្វើខុសច្បាស់ហើយ៕
ចែករំលែកព័តមាននេះ