ខេត្តកំពង់ឆ្នាំង ៖ ដើមឈើមួយដើមមានអាយុកាលរាប់ពាន់ឆ្នាំត្រូវបាន អ្នកភូមិសំរោងសែន ឃុំសំរោងសែន ស្រុកកំពង់លែង កាលពីជាង៥ឆ្នាំមុនមានជំនឿមានបារមីសក្តិសិទ្ធិ ហើយនាំគ្នាគោរពបូជារហូតដល់សព្វថ្ងៃ។ បច្ចុប្បន្នដើមឈើនេះត្រូវប្រជាពលរដ្ឋជឿថា ជាដងទង់ តែខ្លះថា ជាដងក្តោងសំពៅនោះ កំពុងរក្សាទុក នៅក្នុងវត្តសំរោងសែន។
ចៅអធិការវត្តសំរោងសែនព្រះនាម យឺន យ៉ាន់ ព្រះជន្ម២៨ព្រះវស្សា មានថេរដិកាថា ព្រះអង្គទើបមកកាន់វត្តសំរោងសែននេះជាង៣ឆ្នាំប៉ុណ្ណោះ មិនសូវដឹងពីប្រវត្តិដើមឈើមួយនោះទេ គ្រាន់តែដឹងថា សព្វថ្ងៃមានប្រជាពលរដ្ឋមកគោរពបូជា និងបែរបន់តាមជំនឿ ហើយខ្លះថា សក្តិសិទ្ធិ ហើយក៏បានមកថ្វាយភ្លេងពិណពាទ្យ ដើម្បីលាមាត់លា.ក។ ចំពោះដើមឈើនោះ ព្រះអង្គថា មិនដឹងជាដើមអ្វី និងជាអ្វីនោះទេ តែឮអ្នកស្រុកថា ជាដើមថ្កុលមាស ខ្លះថា ជាដងក្តោងសំពៅ ហើយខ្លះថា ជាដងទង់ និងខ្លះទៀតថា មានប្រវែងជាង៣០ម៉ែត្រ មិនប្រាកដថា ជាអ្វីឱ្យច្បាស់នោះទេ ។
ដោយឡែកលោក សុខ ធួក ប្រធានមន្ទីរវប្បធម៌ និងវិចិត្តសិល្បៈខេត្តបញ្ជាក់ថា ដើមឈើនោះត្រូវបានប្រទះឃើញក្នុងបឹងធំមួយនៅភូមិសំរោងសែនកាលពីជាង៥ឆ្នាំមុន កាលណោះបន្ទាប់ពីក្តៅខ្លាំងបឹងបួរបានរីងគោកអស់ ហើយប្រជាពលរដ្ឋពេលជីកដីក្នុងបឹងនោះក៏ប្រទះឃើញដើមឈើនោះមានប្រវែង៣៣ម៉ែត្រ រួចយកមករក្សទុកក្នុងវត្ត។
ក្រោយមកស្រាវជ្រាវដឹងថា ដើមឈើនោះ គឺជាដងទង់ ព្រោះខ្មែរយើងកាលជំនាន់នោះពេលមានជំនឿលើអ្វីមួយតែងតែបែរបន់នៅគល់ដងទង់នោះ គេឃើញបំណែកកុលាលភាជជាច្រើន មានន័យថា ជាកន្លែងសក្ការៈបូជាដែលខ្មែរយើងជឿថាជាបារមីសក្តិសិទ្ធិ ម្យ៉ាងវិញទៀតដងទង់ដែលមានទំហំធំ និងវែងបែបនេះ រួមទាំងភស្តុតាងដែលនៅនិងគល់ដងទង់នោះផង គឺបញ្ជាក់ថា របស់ទាំងនោះមិនអាចរសាត់មកពីឆ្ងាយណាទេ មានកន្លែងណានៅកន្លែងនោះ ។ លោកក៏បានបញ្ជាក់ថា ដើមឈើដែលយើងសន្មត់ថា ជាដងទង់នោះ គឺជាដើមឈើទាលមិនមែនដើមថ្កុលមាសអីនោះទេ ហើយក៏មិនមែនជាដងក្តោងសំពៅអីនោះដែរ ។
ចែករំលែកព័តមាននេះ