ខេត្តព្រៃវែង ៖ សមត្ថកិច្ចស្រុកពាមជរបានចាប់ឃាត់យុវជនម្នាក់ និងកសាងសំណុំរឿងបញ្ជូនទៅកាន់សាលាដំបូងខេត្ត បន្ទាប់ពីយុវជនរូបនោះបានធ្វើសកម្មភាពកាប់ប្រហារទៅលើយុវជនម្នាក់ទៀត ដែលត្រូវជាប្អូនជីដូនមួយ បណ្តាលអោយរងរបួសចំនួន២កន្លែង។ ហេតុការណ៍នេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី២…
ខេត្តព្រៃវែង ៖ សមត្ថកិច្ចស្រុកពាមជរបានចាប់ឃាត់យុវជនម្នាក់ និងកសាងសំណុំរឿងបញ្ជូនទៅកាន់សាលាដំបូងខេត្ត បន្ទាប់ពីយុវជនរូបនោះបានធ្វើសកម្មភាពកាប់ប្រហារទៅលើយុវជនម្នាក់ទៀត ដែលត្រូវជាប្អូនជីដូនមួយ បណ្តាលអោយរងរបួសចំនួន២កន្លែង។
ហេតុការណ៍នេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី២ ឧសភា នៅ ចំណុចភូមិឈើទាល ឃុំឫស្សីស្រុក ស្រុកពាមជរ ខេត្តព្រៃវែង ដែលជនរងគ្រោះ ឈ្មោះ ជឹង រិទ្ធី ភេទប្រុស អាយុ២២ឆ្នាំ ចំណែកជនបង្កឈ្មោះ ជឹង ឌុយ ភេទប្រុស អាយុ២៥ឆ្នាំ អ្នកទាំង២មានទីលំនៅក្នុងភូមិកើតហេតុ។
លោកវរៈសេនីយ៍ទោ ជា ហេង អធិការនគរបាលស្រុកពាមជរ បានអោយដឹងថា មុនពេលកើតហេតុ ជនរងគ្រោះ និងជនបង្ក ព្រមទាំងបងប្អូន២-៣នាក់ទៀតបានផឹកស៊ីជាមួយគ្នាតាំងពីក្បាលព្រលប់ លុះពេលផឹក
យូរៗទៅ អ្នកផ្សេងគេស្រវឹងក៏នាំគ្នាទៅដេកអស់ នៅសល់តែជនបង្កនិងជនរងគ្រោះ ដែលជាបងប្អូនជីដូនមួយនឹងគ្នានៅផឹកបន្ត។
លោកអធិការបញ្ជាក់ទៀតថា លុះផឹកបានមួយសន្ទុះ គឺនៅវេលាម៉ោង១០និង៣០នាទីយប់ក៏អស់ស្រាលែងមានអីផឹកបន្តទៀត ហើយជនរងគ្រោះ និងជនបង្កបានប្រកែកគ្នារឿងទៅទិញស្រាថែមយកមកផឹកទៀត ប៉ុន្តែអ្នកទាំង២សុទ្ធតែប្រកែកមិនទៅទិញរៀងៗខ្លួន លុះពេលប្រកែកគ្នាយូរៗទៅ ក៏កើតទៅជាទំនាស់ ហើយក៏ឈានដល់ការប្រើអំពើហិង្សា ដោយជនបង្កឈ្មោះ ជឹង ឌុយ បានយកកាំបិតប៉័ងតោកាប់ទៅលើជនរងគ្រោះ ជឹង រិទ្ធី ត្រូវចំគល់កចំនួន២កន្លែងបណ្តាលអោយដាច់រយះ ហូរឈាមពេញខ្លួន។
ក្រោយពីកើតហេតុភ្លាម ក៏មានការភ្ញាក់ផ្អើលដល់បងប្អូនជិតខាងនាំគ្នាចេញមកចាប់ឃាត់ និងរាយការណ៍ដល់សមត្ថកិច្ច ចុះទៅឃាត់ខ្លួនជនបង្កនាំយកទៅកាន់ប៉ុស្តិ៍រដ្ឋបាល ចាត់ការទៅតាមនិតិវិធី ចំណែកជនរងគ្រោះត្រូវបានគ្រួសារ នាំយកទៅព្យាបាលរបួសភ្លាមៗ នៅឯប្រទេសវៀតណាម៕
ចែករំលែកព័តមាននេះ