ទួរគី ៖ តាមប្រភពព័ត៌មាន Oddity Central បានឲ្យដឹងថា អ្នកគាំទ្រក្លិបបាល់ទាត់ម្នាក់បានជាប់នៅកាសែតទំព័រមុខ ដោយសារតែទង្វើនឹកស្មានមិនដល់របស់គេ ធ្វើចំពោះក្លិបដែលខ្លួនស្រឡាញ់។
អ្នកគាំទ្រក្លិបបាល់ទាត់ Denizlispor របស់ទួរគី លោក Ali Demirkaya អាយុ៣៧ឆ្នាំ បានជួលឡានស្ទូចឲ្យស្ទូចរូបលោកឡើងទៅលើ ដើម្បីមើលការប្រកួតបាល់ពីចម្ងាយ។ លោកធ្វើបែបនេះ ដោយសារតែលោកត្រូវបានគេហាមមិនឲ្យចូលកីឡដ្ឋានប្រកួតបាល់។ នេះក៏ដោយសារតែការធ្វើខុសឆ្គងបទបម្រាមកាលពីឆ្នាំ២០១៥។ ទោះបីជាគេហាមលោកមិនឲ្យចូលមើលផ្ទាល់ក៏ដោយ ក៏លោកនៅឆ្លៀតគាំទ្រក្លិបរបស់លោកស្រឡាញ់ពីលើអាកាសដែរ។
ទង្វើរបស់លោកបានធ្វើឲ្យព័ត៌មានជាច្រើនចុះផ្សាយពីរូបលោក។ លោកសុខចិត្តចំណាយប្រាក់ជួលឡានស្ទូចជាងរយដុល្លារ ដើម្បីអាចផ្តល់កម្លាំងចិត្តដល់ក្លិប Denizlispor។ តែគេឃើញថា នៅមិនយូរប៉ុន្មានប៉ូលិសក៏បានមកដល់ទីតាំង ហើយបញ្ឈប់សកម្មភាពចម្លែកខុសគេរបស់លោក។ គេមិនដឹងទេថា តើប៉ូលិសបានផាកពិន័យដែរឬអត់?
តើមានអ្នកគាំទ្រណាហ៊ានធ្វើដូចបុរសម្នាក់នេះទេ?
ចែករំលែកព័តមាននេះ