ខេត្តត្បូងឃ្មុំ ៖ សាកសពស្ត្រីខ្មែរអាយុ២៤ឆ្នាំ ត្រូវបានអ្នកភូមិប្រទះឃើញនៅក្នុងចម្ការពោតមួយកន្លែងនៅមាត់ទន្លេមេគង្គ នាព្រឹកថ្ងៃទី១ ឧសភា គឺជាអំពើឃាតកម្មរំលោភសេពសន្ថវៈរួចកាច់បំបាក់កបំបិទមាត់ ត្រូវបានលោកឧត្តមសេនីយ៍ទោ បែន រ័ត្ន…
ខេត្តត្បូងឃ្មុំ ៖ សាកសពស្ត្រីខ្មែរអាយុ២៤ឆ្នាំ ត្រូវបានអ្នកភូមិប្រទះឃើញនៅក្នុងចម្ការពោតមួយកន្លែងនៅមាត់ទន្លេមេគង្គ នាព្រឹកថ្ងៃទី១ ឧសភា គឺជាអំពើឃាតកម្មរំលោភសេពសន្ថវៈរួចកាច់បំបាក់កបំបិទមាត់ ត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្តចាត់ឱ្យនគរបាលបច្ចេកទេស និងនគរបាលព្រហ្មទណ្ឌកំរិតធ្ងន់ខេត្ត សហ ការជាមួយ នឹងកម្លាំងមូលដ្ឋានចុះស្រាវជ្រាវជាបន្ទាន់រហូតឈានដល់ចាប់បានជនសង្ស័យបន្តបន្ទាប់
២នាក់ ។
បងប្រុសបង្កើតរបស់នារីរងគ្រោះឈ្មោះ ទីនមុសា អាយុ២៨ឆ្នាំ បានរៀបរាប់ទាំងបង្ហូរទឹកភ្នែកថា នៅវេលាម៉ោង៧យប់ថ្ងៃទី៣០ មេសា ប្អូនស្រីឈ្មោះ អៃសះ បានប្រាប់ថា ចេញទៅស៊ីឈ្មួលអូសមាញ់ឱ្យគេ ដោយទទួលបានកំរៃក្នុង១យប់តំលៃ១ម៉ឺនរៀល ។ ចំណែកម្តាយរបស់គាត់បានចេញទៅស៊ីឈ្មួលធ្វើចំការឱ្យគេនៅខេត្តស្ទឹងត្រែង ជាប់ព្រំដែនជាមួយប្រទេសឡាវ និងឪពុកទៅរកស៊ីនៅប៉ោយប៉ែតជាប់ព្រំដែនថៃ។
ទីន មុសា ប្រាប់បន្តថា ប្អូនស្រីចេញទៅស៊ីឈ្មួលគេតាមទម្លាប់ធម្មតាទៅហើយ រហូតដល់ម៉ោង៧ព្រឹក ទើបត្រឡប់មកផ្ទះវិញជាមួយនឹងអ្នកជិតខាង២ទៅ៣នាក់ ។ ពេលខ្លះប្រាក់កំរៃស៊ីឈ្មួលមិនបាន១ម៉ឺនរៀលក៏មានដែរ ។ ទោះបីជាបែបនេះក្តីមិនមានជំរើសនោះទេដើម្បីជីវិតរស់ ស្រាប់តែនៅវេលាម៉ោង៦ព្រឹកថ្ងៃទី១ ឧសភា អ្នកភូមិម្នាក់បានរត់មកប្រាប់ថា«ប្អូនស្រីឈ្មោះអៃសះ ត្រូវបានគេសម្លាប់ក្នុងចំការពោត» ។ ពេលនោះ ក៏រត់ទាំងស្លុតចិត្តទៅមើល ឃើញប្អូនស្រីត្រូវបានគេសម្លាប់ តែមិនដឹងថាអ្នកណាម្នាក់ជាអ្នកសម្លាប់នោះទេ ។ បងប្រុសរបស់នាងរៀបរាប់ទៀតថា ភ្លាមៗនោះសពមិនត្រូវបានអាជ្ញាធរភូមិនិងសមត្ថ កិច្ចឱ្យយកមកផ្ទះទេ ដោយរង់ចាំការធ្វើកោសល្យវិច័យលើសាកសព រួចរាល់ទើបប្រគល់ឱ្យគ្រួសារ ។ បុរសជាបងបានអះអាងថា ប្អូនស្រីរបស់ខ្លួនមិនដែលមានបញ្ហាទំនាស់ជាមួយអ្នកណាទេ និងបាន សំណូម ពរដល់សមត្ថកិច្ចគ្រប់លំដាប់ថ្នាក់ជួយស្រាវជ្រាវតាមចាប់ឃាតករដែលបានសម្លាប់ប្អូនស្រីរបស់ខ្លួនមកផ្តន្ទាទោសតាមច្បាប់ផងដែរ ។
លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត មានប្រសាសន៍ឱ្យដឹងដែរថា ក្រោយពីមានករណីខាងលើនេះរូបលោកបានចាត់ឱ្យកម្លាំង ចុះទៅសហការជាមួយនឹងអធិការដ្ឋាននគរបាលស្រុកត្បូងឃ្មុំ បើកការស្រាវជ្រាវបន្ទាន់ ដោយចាប់បានជនសង្ស័យម្នាក់ ត្រូវបានបញ្ជូនមកសួរនាំនៅអធិការដ្ឋាននគរបាលស្រុក និងតាមចាប់ខ្លួនបក្សពួកម្នាក់ទៀតផងដែរ ។
អ្វីដែលលោកកត់សម្គាល់ និងភ្ញាក់ផ្អើលផងនោះ គឺអ្នកស្លាប់មានផ្ទៃពោះចំនួន៣ខែថែមទៀត ទំនងមានកូនជាមួយជន សង្ស័យ ទើបខ្លាចបែកការណ៍ក៏សម្លាប់នាង ។ សមត្ថកិច្ចនិយាយថា ជនសង្ស័យទាំងពីរនាក់ដែលឃាត់ខ្លួនបាននោះ ទោះបីជាមិនទាន់សារភាពក្តី ក៏មានភស្តុតាងស៊ីសង្វាក់នាំមកសាកសួរនៅអធិការដ្ឋាននគរបាលស្រុកត្បូងឃ្មុំ ។ ហេតុការណ៍ខាងលើកើតឡើងចន្លោះម៉ោង៨ ទៅ៩យប់ថ្ងៃទី៣០ មេសា នៅក្នុងចំការពោតរបស់ឈ្មោះ ពិន ញ៉ នៅភូមិទន្លេបិទលើ ឃុំទន្លេបិទជាកន្លែងស្ងាត់មិនមានផ្ទះពលរដ្ឋរស់នៅក្បែរនោះទេ ៕
ចែករំលែកព័តមាននេះ