ទីក្រុងបែរឡាំង ៖ កាលពីថ្ងៃចន្ទកន្លងមក ប្រទេសអាល្លឺម៉ង់បានបន្ថយក្តីសង្ឃឹមថា នឹងអាចរួចផុតពីការដាក់ពន្ធរបស់សហរដ្ឋអាមេរិកលើដែកថែប និងអាលុយមីញ៉ូម ប៉ុន្តែអាល្លឺម៉ង់បានស្នើឲ្យបន្តការចរចាពាណិជ្ជកម្ម បើទោះជាអាមេរិកអនុម័តពន្ធឬអត់ក្តី ។
គួរបញ្ជាក់ថា កាលពីខែមីនា សហរដ្ឋអាមេរិកបានដាក់ពន្ធ២៥%លើដែកថែប និង១០%លើអាលុយមីញ៉ូមនាំចូល ប៉ុន្តែប្រទេសនេះអនុញ្ញាតឲ្យសហភាពអឺរ៉ុបរួចផុតពីពន្ធជាបណ្តោះអាសន្ន រហូតដល់ថ្ងៃទី១ ខែឧសភា ។
សូម្បីតែលោកស្រីអធិការបតីប្រទេសអាល្លឺម៉ង់ Angela Merkel និងលោកប្រធានាធិបតីប្រទេសបារាំង Emmanuel Macron ក៏ហាក់មិនអាចបញ្ចុះបញ្ចូលលោកប្រធានាធិបតីអាមេរិក ដូណាល់ ត្រាំ ឲ្យអនុញ្ញាតដល់ប្រទេសក្នុងសហភាពអឺរ៉ុបរួចផុតពីការដាក់ពន្ធដែរ ។
ប្រសិនបើសហរដ្ឋអាមេរិកពិតជាមិនអនុញ្ញាតឲ្យសហភាពអឺរ៉ុបរួចផុតពីពន្ធនេះ រដ្ឋមន្ត្រីសេដ្ឋកិច្ច លោក Peter Altmaier បាននិយាយថា បណ្តាប្រទេសអឺរ៉ុបនឹងសម្រេចថា នឹងអនុម័តវិធានការឆ្លើយតបដែលបានរៀបចំទុក ។
ប៉ុន្តែមិនថាមានការអនុញ្ញាតឲ្យរួចពន្ធឬអត់ លោក Altmaier បាននិយាយថា ៖« បណ្តាប្រទេសអឺរ៉ុបគួរតែចរចាជាមួយសហរដ្ឋអាមេរិក ដើម្បីសម្រេចបាននូវកិច្ចព្រមព្រៀងកាត់បន្ថយពន្ធលើផលិតផលជាច្រើន ជាពិសេស ក្នុងវិស័យផលិតកម្ម » ។
លោក Joachim Lang ប្រធានគ្រប់គ្រងនៃសហព័ន្ធឧស្សាហកម្មប្រទេសអាល្លឺម៉ង់ បានជំរុញឲ្យសហភាពអឺរ៉ុបមិនអនុម័តរាល់វិធានការឆ្លើយតប ។
លោក Frank Sportolari ប្រធានសភាពាណិជ្ជកម្មអាមេរិកប្រចាំប្រទេសអាល្លឺម៉ង់ជឿជាក់ថា ដំណោះស្រាយបញ្ហាជម្លោះពន្ធនេះ នៅតែអាចសម្រេចបានផងដែរ ៕
ចែករំលែកព័តមាននេះ