ខេត្តព្រៃវែង ៖ កុមារាម្នាក់បានបាត់បង់ជីវិតភ្លាមៗ ដោយសារតែរន្ទះបាញ់ បន្ទាប់ពីរូបគេបានចេញពីផ្ទះ ដើរទៅវាលស្រែ ដើម្បីប្រមូលចំបើងយកមកផ្ទះ ខណៈដែលមេឃកំពុងធ្លាក់ភ្លៀង។ ហេតុការណ៍នេះបានកើតឡើងនៅថ្ងៃទី០១ ខែឧសភា…
ខេត្តព្រៃវែង ៖ កុមារាម្នាក់បានបាត់បង់ជីវិតភ្លាមៗ ដោយសារតែរន្ទះបាញ់ បន្ទាប់ពីរូបគេបានចេញពីផ្ទះ ដើរទៅវាលស្រែ ដើម្បីប្រមូលចំបើងយកមកផ្ទះ ខណៈដែលមេឃកំពុងធ្លាក់ភ្លៀង។ ហេតុការណ៍នេះបានកើតឡើងនៅថ្ងៃទី០១ ខែឧសភា ឆ្នាំ២០១៨ វេលាម៉ោង០២រសៀល នៅចំណុចភូមិតាអូក ឃុំរក្សជ័យ ស្រុកបាភ្នំ ខេត្តព្រៃវែង។ សមត្ថកិច្ចនៅមូលដ្ឋានបានឲ្យដឹងថា កុមារាដែលរងគ្រោះនៅក្នុងករណីគ្រោះធម្មជាតិនេះមាន ឈ្មោះ ហុន ខុត អាយុ១២ឆ្នាំ រស់នៅភូមិ ឃុំកើតហេតុខាងលើ។
បើតាមសម្តីអ្នកភូមិបានរៀបរាប់ប្រាប់ថា នៅមុនពេលកើតហេតុមានភ្លៀងធ្លាក់ លាយឡំនឹងផ្គររន្ទះយ៉ាងខ្លាំង ពេលនោះគេឃើញកុមាររងគ្រោះបានចេញទៅពីផ្ទះ ដើម្បីទៅប្រមូលចំបើង នៅវាលស្រែយកមកផ្ទះ ស្រាប់តែមានរន្ទះបាញ់មកចំកុមារខាងលើ បណ្តាលឲ្យស្លាប់ភ្លាមៗតែម្តង។ ក្រោយកើតហេតុសមត្ថកិច្ចបានចុះទៅពិនិត្យសាកសព និងធ្វើកំណត់ហេតុផងដែរ។ គួរបញ្ជាក់ថា នៅពេលមេឃរកកលភ្លៀង និងចាប់ផ្តើមភ្លៀង សូមបងប្អូនទាំងអស់ ពិសេសអ្នកនៅស្រែចម្ការ សូមមានការប្រុងប្រយ័ត្ន គួរគប្បីកុំធ្វើដំណើរនៅកណ្តាលវាល មិនត្រូវនៅក្បែរ វត្ថុដែលមានចំណាំងផ្លាត មិនត្រូវជ្រកក្រោមដើមឈើរដែលធំពេក មិនត្រូវកាន់លោហធាតុ មានចប ពូថៅ ។ល។ បើមានផ្គរន្ទះ គួរគប្បីអង្គុយស្ងៀម ក្នុងផ្ទះ នោះជាការប្រសើរ៕
ចែករំលែកព័តមាននេះ