ខេត្តត្បូងឃ្មុំ ៖ សេចក្តីរាយការណ៍បឋមឱ្យដឹងថា សាកសពជានារីខ្មែរអ៊ិស្លាមម្នាក់ ត្រូវបានប្រជាពល
រដ្ឋប្រទះឃើញ នៅក្នុងចំការពោតមួយកន្លែងតាមមាត់ទន្លេមេគង្គ បង្កការភ្ញាក់ផ្អើលកាលពីព្រឹកថ្ងៃទី០១ ឧសភា នេះ ដោយកំពុងសង្ស័យថា អាចជាករណីឃាតកម្មរំលោភហើយកាច់បំបាក់.កសម្លាប់បំបិទមាត់ ។
សេចក្តីរាយការណ៍បន្តថា ក្រោយការប្រទះឃើញសាកសពនារីរងគ្រោះ ដែលមានអាយុ២៤ឆ្នាំរូបនេះ
ត្រូវបានលោកឧត្តមសេនីយ៍ទោ បែន រ័ត្ន ស្នងការនគរបាលខេត្ត ចាត់ឱ្យនគរបាលបច្ចេកទេស និងនគរបាលព្រហ្មទណ្ឌកំរិតធ្ងន់ខេត្ត សហការជាមួយកម្លាំងមូលដ្ឋានចុះស្រាវជ្រាវជាបន្ទាន់ រហូតឃាត់ខ្លួនបានជនសង្ស័យ២នាក់ជាបន្តបន្ទាប់គ្នា ហើយពេលនេះកំពុងធ្វើការសាកសួរ ដោយមិនទាន់បង្ហាញពីអត្តសញ្ញាណនោះទេ ។
ទាក់ទិនករណីខាងលើនេះដែរ បងប្រុសរបស់នារីរងគ្រោះបានប្រាប់សមត្ថកិច្ចទាំងបង្ហូរទឹកភ្នែកថា កាលពីវេលាម៉ោង៧យប់ថ្ងៃទី៣០ មេសា ប្អូនស្រីខ្លួន (នារីរងគ្រោះ) ប្រាប់គាត់ថា ចេញទៅស៊ីឈ្មួលអូសមោងឱ្យគេ ព្រោះម្តាយបានចេញទៅស៊ីឈ្មួលធ្វើចំការឱ្យគេនៅខេត្តស្ទឹងត្រែង ជាប់ព្រំដែនជាមួយប្រទេសឡាវ ហើយឪពុកទៅរកស៊ីនៅប៉ោយប៉ែត ជាប់ព្រំដែនថៃឯណោះ ។
គាត់បន្តថា ស្រាប់តែនៅវេលាម៉ោង៦ព្រឹកថ្ងៃទី០១ ឧសភា បែរជាមានអ្នកភូមិម្នាក់ដែលស្គាល់ បានរត់
មកប្រាប់ថា «ប្អូនស្រីត្រូវបានគេសម្លាប់ ដោយសាកសពនៅក្នុងចំការពោត» ។ ពេលនោះ គាត់ក៏ប្រញាប់
រត់ទៅមើលក៏ឃើញប្អូនស្រីខ្លួន ត្រូវបានគេសម្លាប់មែន ដោយមិនដឹងថា អ្នកណាសម្លាប់នោះទេ ។ ភ្លាមៗ សពមិនត្រូវបានអាជ្ញាធរភូមិ សមត្ថកិច្ចឱ្យសែងយកមកផ្ទះទេ ដោយរងចាំគេកោសល្យវិច័យសព រួចរាល់ទើបប្រគល់សពឱ្យ ។
ព័ត៌មានលម្អឹតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ