ខេត្តបន្ទាយមានជ័យ ៖ រយៈពេលជាង១២ម៉ោង ជនល្មើសដែលអារ.កប្លន់យកម៉ូតូនិងទូរស័ព្ទ បានត្រូវកងរាជអាវុធហត្ថចាប់ខ្លួនបាន២នាក់ កាលពីវេលាម៉ោង១១និង១៥នាទីព្រឹកថ្ងៃទី២៨ មេសា នៅភូមិកណ្តាល ឃុំម៉ាឡៃ ស្រុកម៉ាឡៃ ។ ជនទាំង២នាក់នេះ ម្នាក់ឈ្មោះ គង់ ណាលីន ហៅដូង ភេទប្រុស អាយុ២២ឆ្នាំ និងម្នាក់ទៀតឈ្មោះ គឹម រតនៈ ភេទប្រុស អាយុ១៩ឆ្នាំ ទាំង២នាក់រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតឱ្យដឹងថា កាលពីវេលាម៉ោង១១យប់ថ្ងៃទី២៧ មេសា នៅភូមិសាមគ្គីមានជ័យ សង្កាត់ប៉ោយប៉ែត យុវជនម្នាក់ឈ្មោះ ឡាង សុចិន្តា ភេទប្រុស អាយុ១៧ឆ្នាំ រស់ភូមិខាងលើ បានត្រូវជនល្មើសអារកប្លន់យកម៉ូតូ១គ្រឿងម៉ាកMSX ពណ៌ស ស៊េរីឆ្នាំ២០១៥ ពាក់ផ្លាកលេខ បន្ទាយមានជ័យ ១N-៦២៨៧ និងទូរស័ព្ទម៉ាកOPPOមួយគ្រឿង។ ក្រោយមក សមត្ថកិច្ចបានចុះពិនិត្យស្រាវជ្រាវមុខសញ្ញា ដោយសហការជាមួយកងរាជអាវុធហត្ថស្រុកម៉ាឡៃ រហូតឈានដល់ឃាត់ខ្លួនជនសង្ស័យ២នាក់ និងដកហូតបានម៉ូតូ១គ្រឿងមកវិញ នៅវេលាម៉ោង១១និង១៥នាទីព្រឹកថ្ងៃទី២៨ ខែមេសា ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តថ្លែងថា នៅពេលឃាត់ខ្លួននាំមកសាកសួរ ឃាតករដៃដល់ទាំង២នាក់សារភាពថា ពួកគេពិតជាបានធ្វើសកម្មភាពអារ.កប្លន់យកម៉ូតូប្រាកដមែន ។ ពួកគេមានគម្រោងប្លន់សម្លាប់ជនរងគ្រោះយកម៉ូតូរយៈពេលជាង១សប្តាហ៍មកហើយ លុះពេលមានឱកាសឈ្មោះ គង់ ណាលីន ហៅដូង បានទូរស័ព្ទបបួលជនរងគ្រោះដែលជាមិត្តភក្តិចូលក្លិបដោយជិះម៉ូតូ១គ្រឿងគ្នា៣នាក់ ។ ក្រុមជននេះ សារភាពទៀតថា ពេលទៅដល់កន្លែងស្ងាត់ ឈ្មោះ គឹម រតនៈ ប្រាប់ថា ផ្លូវរអិលលំបាកក៏សុំចុះ ហើយឱ្យជនរងគ្រោះឌុបឈ្មោះ គង់ ណាលីន ហៅដូង ទៅមុន ។ នៅពេលនោះ ឈ្មោះ គង់ ណាលីន ហៅដូង ក៏បានក្រៀកកហើយធ្វើសកម្មភាពអារកជនរងគ្រោះតែមិនស្លាប់ ខ្លួន(គឹម រតនៈ)ក៏ឱ្យឈ្មោះគង់ ណាលីន ហៅដូង ចាប់ជើងជនរងគ្រោះហើយខ្លួនអារកបន្ថែម ។ បន្ទាប់មក ដោយគិតថាស្លាប់ក៏អូសទម្លាក់ចូលប្រឡាយក្បែរផ្លូវ ហើយយកម៉ូតូ១គ្រឿងនិងទូរស័ព្ទគេចខ្លួនទៅស្រុកម៉ាឡៃ តែក៏ត្រូវកងរាជអាវុធហត្ថចាប់ខ្លួននិងដកហូតម៉ូតូមកវិញ ឯទូរស័ព្ទជ្រុះបាត់ពេលបើកម៉ូតូគេចខ្លួន ។
សូមបញ្ជាក់ថា ការឈានដល់ចាប់ឃាត់ខ្លួនជនល្មើសជាង១២ម៉ោងក្រោយមកនេះ ដោយសារតែជនរងគ្រោះដែលត្រូវជនសង្ស័យអារកប្លន់យកម៉ូតូគ្រាន់តែសន្លប់មិនស្លាប់ និងរត់រកអ្នកជិតខាងឱ្យជួយនាំយកទៅសង្គ្រោះនៅមន្ទីរពេទ្យមិត្តភាពកម្ពុជា-ជប៉ុន មង្គលបុរី បានរួចពីសេចក្តីស្លាប់ ទើបឃាតកររត់មិនរួច ៕
ចែករំលែកព័តមាននេះ