ខេត្តកំពង់ឆ្នាំង ៖ ក្នុងឱកាសបានទទួលសិទ្ធិធ្វើជាម្ចាស់ផ្ទះក្នុងពិធីរៀបចំបុណ្យទន្លេ ក្នុងខែមីនា ឆ្នាំ២០១៩ ខាងមុខនេះ អាជ្ញាធរខេត្តកំពង់ឆ្នាំង បានអំពាវនាវដល់ប្រជាពលរដ្ឋក្នុងក្រុងកំពង់ឆ្នាំង សូមចូលរួមទាំងអស់គ្នា ដើម្បីមុខមាត់ខេត្តយើងទាំងអស់គ្នា…
ខេត្តកំពង់ឆ្នាំង ៖ ក្នុងឱកាសបានទទួលសិទ្ធិធ្វើជាម្ចាស់ផ្ទះក្នុងពិធីរៀបចំបុណ្យទន្លេ ក្នុងខែមីនា ឆ្នាំ២០១៩ ខាងមុខនេះ អាជ្ញាធរខេត្តកំពង់ឆ្នាំង បានអំពាវនាវដល់ប្រជាពលរដ្ឋក្នុងក្រុងកំពង់ឆ្នាំង សូមចូលរួមទាំងអស់គ្នា ដើម្បីមុខមាត់ខេត្តយើងទាំងអស់គ្នា និងដើម្បីឲ្យកម្មវិធីដែលមិនធ្លាប់មាននេះ ទទួលបានជោគជ័យត្រចះត្រចង់ ។
លោក ស៊ុន សុវណ្ណារិទ្ធ អភិបាលរងខេត្តកំពង់ឆ្នាំង មានប្រសាសន៍ថា ដើម្បីឲ្យការរៀបចំបុណ្យទន្លេរបស់ខេត្តទទួលបានជោគជ័យ ក្នុងឆ្នាំ២០១៩ ខាងមុខនេះ ក្រៅពីការរៀបចំរបស់អាជ្ញាធរខេត្ត លោកក៏សូមសំណូមពរដល់ប្រជាពលក្នុងក្រុងកំពង់ឆ្នាំង សូមចូលរួមទាំងអស់គ្នាដោយក្រាលការ៉ូឡានៅតាមផ្លូវមុខផ្ទះរបស់ខ្លួន និងសូមសម្អាតតាមមុខផ្ទះ កុំចោលសំរាមផ្ដេសផ្ដាស និងការដាក់ហាលខោអាវតាមមុខផ្ទះជាដើម ។ លោកបានបញ្ជាក់ថា សម្រាប់អាជ្ញាធរខេត្ត ដែលបានទទួលសិទ្ធិធ្វើម្ចាស់ផ្ទះ ក្នុងការរៀបចំបុណ្យទន្លេខាងមុខនេះ បច្ចុប្បន្នអាជ្ញាធរខេត្ត បាននឹងកំពុងរៀបចំហេដ្ឋារចនាសម្ព័ន្ធនានាមាន ធ្វើផ្លូវបេតុង ពីចំណុចស្ពានថ្មជិតផ្សាលើ រហូតចំណុចដើមពោធិ៍ ផ្សារក្រោម និងបន្តចាក់រហូតដល់ចុងកោះ ។ ចំណែកនៅចំណុចមុខវត្តយាយទេព ត្រូវចាក់ដីបំពេញច្រាំងទន្លេបន្ថែម ដែលមានទំហំ១០០ម៉ែត្រគុណនិង៣៥០ម៉ែត្រ ។ ជាមួយគ្នានេះ ចាក់ដីធ្វើផ្លូវពីចំណុចចុងកោះ ទៅដល់កំពង់ផែថ្មី និងធ្វើផ្លូវក្រាលកៅស៊ូជុំវិញផ្សារថ្មី ធ្វើផ្លូវពីចំណុចផ្សារថ្មី រហូតដល់ស្ថានីយ៍ប្រេងតូតាល់ ផ្លូវជាតិលេខ៥ជាដើម ។ ជាមួយគ្នានេះ បញ្ហាសំរាម អាជ្ញាធរខេត្ត និងមន្ទីរពាក់ព័ន្ធបានសហការណ៍គ្នារៀបចំប្រជុំណែនាំដល់ម្ចាស់ភោជនីយ៍ដ្ឋាន អាហារដ្ឋាន ដើម្បីលុបបំបាត់សំរាម និងក្រដាស់អនាម័យពីលើតុ និងក្រោមតុឲ្យអស់ ក្នុងអំឡុងចាប់ខែឧសភា ដល់ខែសីហា ខាងមុខនេះ ។
យ៉ាងនេះក្តី ប្រជាពលរដ្ឋក្នុងខេត្តកំពង់ឆ្នាំង រំពឹងថា ក្រៅពីការរៀបចំធ្វើបុណ្យទន្លេ ខេត្តកំពង់ឆ្នាំង នឹងទទួលបានហេដ្ឋារចនាសម្ព័ន្ធផ្លូវថ្នល់ជាច្រើនកន្លែង ការតុបតែងកែលម្អ និងសួនច្បារក្នុងក្រុងផងនោះ ខេត្តកំពង់ឆ្នាំង ពិតជាមានសោភ័ណភាព និងផ្លូវស្អាតខ្វាត់ខ្វែងជាពុំខានឡើយ ៕
ចែករំលែកព័តមាននេះ