រាជធានីភ្នំពេញ ៖ អាជ្ញាធរខណ្ឌដូនពេញ បានអះអាងថា រហូតមកដល់ពេលនេះ អ្នកជិះបញ្ច្រាស នៅ រង្វង់មូល និងសួនច្បារវិមានឯករាជ្យ នៅតែបន្តកើតមានជារៀងរាល់ថ្ងៃ បើទោះបីជាសមត្ថកិច្ច និងអាជ្ញា ធរដាក់ពង្រាយកម្លាំងប្រចាំការ ចាំស្ទាក់ចាប់ទាំងយប់ទាំងថ្ងៃក៏ដោយ។ មន្ត្រីរដ្ឋបាលខណ្ឌ ដូនពេញ ដែលស្និទ្ធជាមួយលោក សុខ ពេញវុធ អភិបាលខណ្ឌនេះ បានឲ្យកោះសន្តិ ភាពដឹងតាមរយៈទូរស័ព្ទ នារសៀលថ្ងៃទី២៩ មេសា ២០១៨នេះថា អាជ្ញាធរខណ្ឌ បានសហការជាមួយមន្ទីរសាធារណការ និងដឹកជញ្ជូន និងកងកម្លាំងសមត្ថកិច្ច បានចុះអនុវត្តនូវយុទ្ធនាការឃាត់ម៉ូតូ និងរថយន្តបើកជិះបញ្ច្រាស ទិសដៅចរាចរណ៍នៅរង្វង់មូល និងសួនច្បារវិមានឯករាជ្យ និងកំណាត់ផ្លូវព្រះសុរាម្រឹត ក្បែរតំបន់វិមាន ឯករាជ្យ ស្ថិតក្នុងសង្កាត់ចតុមុខ ខណ្ឌដូនពេញ ដើម្បីអប់រំ និងព្រមានឲ្យប្រជាពលរដ្ឋគោរពច្បាប់ ចរាចរណ៍ឲ្យបានគ្រប់ៗគ្នា។
មន្ត្រីដដែលបានបន្តថា យុទ្ធនាការឃាត់ម៉ូតូ និងរថយន្តបើកបញ្ច្រាស ទិសដៅចរាចរណ៍នៅវិមានឯករាជ្យនោះ បានចាប់ផ្តើមកាលពីថ្ងៃទី៣១ ខែធ្នូ ឆ្នាំ២០១៧ រហូតមកដល់ថ្ងៃទី២៨ ខែមេសា ឆ្នាំ២០១៨នេះ មានរយៈពេល៤ខែ ក្រុមការងារចាប់ និងឃាត់បានចំនួន២៥១៤គ្រឿង ក្នុងនោះម៉ូតូមានចំនួន២១៧១គ្រឿង រ៉ឺម៉កម៉ូតូកង់បីចំនួន២៥៣គ្រឿង និងរថយន្តមានចំនួន៩០គ្រឿង ដើម្បីផាកពិន័យ និងព្រមានឲ្យរាងចាលតែម្តង។ មន្ត្រីរដ្ឋបាលខណ្ឌដូនពេញដដែលបានឲ្យដឹងទៀតថា សម្រាប់នៅថ្ងៃទី២៨ ខែមេសា ឆ្នាំ២០១៨ ចាប់ពី ម៉ោង៧ព្រឹក ដល់ម៉ោង១០យប់ កម្លាំងគណៈបញ្ជាការឯកភាពខណ្ឌដូនពេញ បានសហការជាមួយ មន្ទីរសាធារណៈការ និងដឹកជញ្ជូនរាជធានីភ្នំពេញ និងការិយាល័យចរាចរណ៍ជើងគោក
នៃស្នងការដ្ឋាននគរបាលរាជធានីភ្នំពេញ បន្តអនុវត្តយុទ្ធនាការឃាត់ម៉ូតូ និងរថយន្ត បើកបញ្ច្រាសទិសដៅចរាចរណ៍ នៅរង្វង់មូលជុំវិញវិមានឯករាជ្យ និងផ្លូវព្រះសុរាម្រឹត ស្ថិតក្នុងសង្កាត់ចតុមុខ ខណ្ឌដូនពេញ បានចាប់ និងឃាត់ម៉ូតូបានចំនួន៥គ្រឿង និងបានញ្ជូនទៅការិយាល័យចរាចរណ៍ ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការអប់រំណែនាំបន្តទៅតាមនីតិវិធីតែម្តង។ គួររំលឹកថា កាលពីយប់ថ្ងៃទី៣១ ធ្នូ ២០១៧ ដែលជាយប់ឆ្លងឆ្នាំឈានចូលឆ្នាំ២០១៨ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បញ្ជាឲ្យអាជ្ញាធរខណ្ឌដូនពេញ សហការជាមួយមន្ត្រីជុំ នាញពាក់ព័ន្ធ ដាក់កម្លាំងប្រចាំការ ដើម្បីចាប់ឃាត់ម៉ូតូ និងរថយន្តដែលបើកបរបញ្ច្រាសទិស នៅតំបន់រង្វង់មូលវិមានឯករាជ្យ និងធ្វើការអប់រំឲ្យពួកគាត់គោរពច្បាប់ចរាចរណ៍៕
ចែករំលែកព័តមាននេះ