រាជធានីភ្នំពេញ ៖ បុរសម្នាក់ត្រូវរថយន្តបើកពីក្រោយកិនចំក្បាលស្លាប់ភ្លាមៗនៅនឹងកន្លែង ចំណែកអ្នករួមដំណើរជាមួយ២នាក់ទៀត មិនមានរងរបួសឡើយ គ្រាន់តែរងកាលភិតភ័យ ខណៈអ្នកទាំងបីជិះរ៉ឹម៉កដឹកទ្រុងមាន់ត្រឡប់មកពីកំបូលវិញ គោលបំណងត្រឡប់ទៅផ្ទះវិញ ។ ហេតុការណ៍នេះបង្កភ្ញាក់ផ្អើលកាលពីម៉ោង២១និង១៥នាទីយប់ ថ្ងៃទី២៨ ខែមេសា ២០១៨ នៅចំណុចផ្លូវវេងស្រេង ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ។
ជនរងគ្រោះឈ្មោះ ហេង ងីម ហៅតឿ អាយុ៣២ឆ្នាំ មុខរបរអ្នកបោចមាន់ ស្នាក់នៅភូមិត្នោតជ្រំ៤ សង្កាត់បឹងទំពុន ខណ្ឌមានជ័យ រាជធានីភ្នំពេញ មានស្រុកកំណើតនៅភូមិក្បាលត្រាចឃុំស្រែចាក ស្រុកស្នួល ខេត្តក្រចេះ ។
ប្រភពនៅកន្លែងកើតហេតុបានប្រាប់ថា មុនកើតហេតុឃើញរ៉ឺម៉កខាងលើដឹកទ្រុងមាន់ពេញរ៉ឺម៉ក ដោយមានបុរស០៣នាក់ផង ពេលនោះជនរងគ្រោះបានអង្គុយផ្នែកខាងឆ្វេងដៃជាប់អ្នកបើក ខណៈមកដល់ចំណុចខាងលើ ឃើញរ៉ឺម៉ករ៉េចង្កូត បណ្តាលឲ្យធ្លាក់ជនរងគ្រោះ គាប់ជួនពេលនោះមានរថយន្តកូរ៉េពណ៌ស ខាងក្រោយមិនចាំស្លាកលេខ បើកមកពីក្រោយក៨កិនចំក្បាលបុរសដែលធ្លាក់នោះ បណ្តាលឲ្យស្លាប់ភ្លាមៗនៅនឹងកន្លែង ចំណែក២នាក់ទៀតមិនមានរងរបួសឡើយ គ្រាន់តែរងការភិតភ័យ ចំណែករថយន្តខាងលើក្រោយពី បង្កឲ្យមានអ្នកស្លាប់ហើយ បានបើករត់បាត់ស្រមោល ។
តាមសម្តីយុវជនអ្នកបើករ៉ឺម៉កខាងលើបានប្រាប់ថា មុនកើតហេតុខ្លួនអ្នកបើករួម និងបុរស២នាក់ទៀត ត្រូវបានថៅកែឲ្យដឹកមាន់យកទៅឲ្យម៉ូយ នៅផ្លូវជាតិលេខ៤ ក្នុងសង្កាត់កំបូល ក្រោយពីដាក់ម៉ូយហើយ បានបើកត្រឡប់ទៅផ្ទះវិញ ខណៈមកដល់ចំណុចខាងលើមានរថយន្តមួយគ្រឿងពណ៌ស ប្រភេទមានក្លុបផ្នែកខាងក្រោយ មិនចាំស្លាកលេខ បានបើកមកកៀរ បណ្តាលឲ្យធ្លាក់ជនរងគ្រោះចូលក្រោមរថយន្តតែម្តងទៅ ក្រោយកិនហើយរថយន្តបើកករត់បាត់ទៅ ។
ក្នុងហេតុការណ៍ដ៏រន្ធត់ខាងលើនេះ គេសង្កេតឃើញបុរសម្នាក់ដែលជាប្អូនជីដូនមួយអ្នកស្លាប់ក្រោយពីឃើញបងស្លាប់បែបនេះរន្ធត់ចិត្តខ្លាំងហើយក៏បានសន្លប់បាត់បង់ស្មារតីរហូតដល់បងប្អូនរឹតច្របាច់ឲ្យមួយសន្ទុះទើបដឹងខ្លួនឡើងវិញ ។ សពបុរសខាងលើត្រូវសមត្ថកិច្ចប្រគល់ឲ្យសាច់ញាតិដឹកយកទៅធ្វើបុណ្យនៅស្រុកកំណើត ៕
ចែករំលែកព័តមាននេះ