ខេត្តកំពង់ឆ្នាំង ៖ កន្លងទៅកោះសន្តិភាព ធ្លាប់បានចុះផ្សាយរួចមកហើយស្តីពីកសិករពីរនាក់ប្តីប្រពន្ធបានចាប់មុខរបរភ្ញាស់កូនមាន់លក់ អាចបង្កើនជីវភាពគ្រួសារបានមួយកម្រិត ។ ប៉ុន្តែបន្ទាប់ពីមានការផ្សព្វផ្សាយ រួចមកធ្វើឲ្យគ្រួសារកសិករនោះកាន់តែល្បីជាបន្តបន្ទាប់រហូតដល់បច្ចុប្បន្ន ដោយពួកគាត់បានទទួលជោគជ័យ លើមុខរបរនេះ ។
ពួកគាត់បាននិយាយថា គាត់មិនអាចបំពេញសេចក្តីត្រូវការរបស់អតិថិជនបានទេ ហើយគាត់បានទម្លាក់ចោលភ្ញៀវកំម៉ង់ទិញខ្លះ ក្នុងខែមេសា និងឧសភានេះ ។
លោក ប៉ែន ចាន់ណា អាយុ៤០ឆ្នាំ និងភរិយាឈ្មោះ ប៊ី ធីរ៉េន អាយុ៣០ឆ្នាំ ជាកសិករប្រកបមុខរបរភ្ញាស់កូនមាន់ស្រែលក់ រស់នៅក្នុងភូមិក្បាលដំរី ឃុំច្រេស ស្រុកកំពង់ត្រឡាច បាននិយាយឱ្យដឹងថា ៖ ក្រុមគ្រួសាររបស់លោកបានចាប់ដៃគ្នាប្រកបរបរភ្ញាស់កូនមាន់ស្រែលក់មកដល់ពេលនេះ មានរយៈពេល៥ឆ្នាំហើយ ។
ប៉ុន្តែក្នុងឆ្នាំចុងក្រោយនេះ គាត់កាន់តែទទួលបានជោគជ័យលើមុខរបរនេះ ដោយបានការគាំទ្រពីអតិថិជនយ៉ាងច្រើន ដែលមានមកពីខេត្តកំពង់ចាម កំពត ព្រៃវែង តាកែវ កំពង់ស្ពឺ បាត់ដំបង និងខេត្តមួយចំនួនទៀត ។
បច្ចុប្បន្ននេះក្រុមគ្រួសារលោកអាចភ្ញាស់កូនមាន់ស្រែលក់បានក្នុង១ខែៗពី៣ពាន់ទៅ៤ពាន់ក្បាល ប៉ុន្តែចំនួននេះ មិនអាចបំពេញតាមការកំម្ម៉ង់ទិញរបស់អតិថិជនឡើយ ហើយគាត់បានសុំទោស អង្វរចំពោះអតិថិជនដែលមកក្រោយគេដោយប្រាប់ថា គាត់ផលិតកូនមាន់លក់មិនទាន់ទេ តែបានសន្យាលក់ឲ្យខែបន្ទាប់ទៀត ។
កសិកររូបនោះបានបញ្ជាក់ថា ពងមាន់ស្រែដែលគាត់ទិញចូល១គ្រាប់៨រយរៀល គាត់បានយកមកដាក់ទូរកំម្តៅភ្ញាស់ដោយចរន្តអគ្គិសនីរយៈពេលពី១៨ទៅ២១ថ្ងៃកូនមាន់បានញាស់ ហើយរយៈពេលត្រឹម១សប្តាហ៍ កូនមាន់ទាំងនោះនឹងចាប់លក់ហើយក្នុងតម្លៃ៣៧០០រៀល កូនមាន់១ក្បាល តែមុនចាប់លក់គាត់ត្រូវចាក់ថ្នាំវ៉ាក់សាំងជាមុន ។
លោកបានអំពាវនាវដល់ប្រជាពលរដ្ឋ បើចង់ទិញកូនមាន់មានសុខភាពល្អទៅចិញ្ចឹម ឬបងប្អូនខ្លះដែលចង់ចេះភ្ញាស់កូនមាន់ដូចគាត់ សូមមកទំនាក់ទំនងជាមួយគាត់តាមអាស័យដ្ឋានដូចខាងលើ ។
សូមបញ្ជាក់ដែរថា កសិកររូបនោះបច្ចប្បន្នមានពីរទូរសម្រាប់ភ្ញាស់កូនមាន់ ពាក់កណ្ដាលស្វ័យប្រវត្តិបានចំនួន៥ទូរ តែមិនអាចបំពេញសេចក្តីត្រូវការរបស់អតិថិជនបាន គាត់បានបង្កើនការភ្ញាស់កូនមាន់ស្រែឱ្យបានច្រើន ដើម្បីបំពេញសេចក្តីត្រូវការរបស់អតិថិជន ។ មុខរបរមួយនេះបើយើងគណនាជាមធ្យមគាត់លក់កូនមាន់បាន៣ពាន់កូន ក្នុងកូនមាន់១ក្បាលថ្លៃ៣៧០០រៀល នោះយើងឃើញចំណូលរបស់គាត់ ហើយបើយើងដកថ្លៃពងមាន់ទិញចូល៨រយរៀលក្នុង១គ្រាប់ បូករូមទាំងថ្លៃភ្លើងអគ្គីសនីក្នុង១ខែ៥៥ម៉ឺនរៀល នោះយើងនឹងឃើញប្រាក់ចំណេញគាត់ហើយ គឺមិនធម្មតាទេ ៕
ចែករំលែកព័តមាននេះ