ជំនួបកំពូលអន្តរកូរ៉េ… រញ្ជួយពិភពលោក
ប្រទេសកូរ៉េទាំង២ ៖ យោងតាមទីភ្នាក់ងារកូរ៉េព័ត៌មានខាងត្បូង YONHAP បានហៅការជួបគ្នាជាប្រវត្តិសាស្ត្រ រវាងប្រធានាធិបតីកូរ៉េខាងត្បូង លោក MOON JAE IN…
ប្រទេសកូរ៉េទាំង២ ៖ យោងតាមទីភ្នាក់ងារកូរ៉េព័ត៌មានខាងត្បូង YONHAP បានហៅការជួបគ្នាជាប្រវត្តិសាស្ត្រ រវាងប្រធានាធិបតីកូរ៉េខាងត្បូង លោក MOON JAE IN និងមេដឹកនាំកូរ៉េខាងជើង លោកគីម ជុងអ៊ុន ដែលបានចាប់ផ្តើម នាព្រឹកថ្ងៃទី២៧ មេសា ជាមួយការចាប់ដៃគ្នារវាងមេដឹកនាំទាំង២ នៅលើខ្សែបន្ទាត់ព្រំដែនដែលបែងចែកកូរ៉េទាំង២ បានក្លាយជារបត់ថ្មីមួយ ក្រោយការប្រឈមមុខដាក់គ្នាយ៉ាងតានតឹងអង្រួនឱ្យកក្រើកឧបទ្វីបកូរ៉េ ដោយសារក្រុមមហាអំណាចបានកំញើញដាក់គ្នាធ្វើឱ្យនិន្នាការពីសង្គ្រាមលោកលើកទី៣ បានគំរាមកំហែងដល់សន្តិសុខពិភពលោក ដោយសារតែនយោបាយនុយក្លេអ៊ែររបស់កូរ៉េខាងជើង ។
មានការកត់សម្គាល់ពីព្រឹត្តិការណ៍ជាប្រវត្តិសាស្ត្រនេះថា លោក MOON មកដល់តំបន់សន្តិសុខរួមនៅភូមិប៉ានមុនហ្សូមមុនលោកគីម ជុងអ៊ុន ដោយសារភាគីកូរ៉េខាងត្បូងគឺជាម្ចាស់ផ្ទះសម្រាប់ជំនួបកំពូលនេះ ។ បន្ទាប់ពីនេះបន្តិច លោកគីម ជុងអ៊ុន បានមកដល់ផ្នែកកូរ៉េខាងជើងនៃភូមិប៉ានមុនហ្សូម ។ លោកគីម ជុង
អ៊ុន ក៏បានដើរឆ្លងកាត់ព្រំដែនដែលធ្វើឱ្យរូបលោកក្លាយជាមេដឹកនាំកូរ៉េខាងជើងដំបូងគេដែលជាន់ទឹកដីកូរ៉េខាងត្បូងចាប់តាំងពីបញ្ចប់សង្គ្រាមកូរ៉េ១៩៥០-១៩៥៣មក និងនិយាយបានថាតាំងពីជីតា លោកគីម អុីលស៊ុង ឪពុកលោកគីម ជុងអុីល និងលោកគីម ជុងអ៊ុន ជាកូន។ជំនួបកំពូលអន្តរកូរ៉េនេះជាការជួបគ្នាកំពូល
លើកទី៣ រវាងមេដឹកនាំកូរ៉េទាំង២ តែពេលនេះជាលើកដំបូងដែលធ្វើលើទឹកដីកូរ៉េខាងត្បូង ។
តាមការផ្សាយបន្តផ្ទាល់គ្រប់បណ្តាញទូរទស្សន៍នានាដែលតាមដានពីជំនួបកំពូលនេះបានបង្ហាញថា ខណៈពេលមេដឹកនាំទាំង២ បានឈរចាប់ដៃគ្នាម្ខាងព្រំដែនម្នាក់ ដែលខណ្ឌចែកដោយគំនូសបេតុង ហើយលោកគីម ជុងអ៊ុន ក៏បានកន្លងបន្ទាត់ព្រំដែនចូលដីកូរ៉េខាងត្បូង ហើយក៏បានស្នើឱ្យលោក MOON ប្រធានាធិបតីកូរ៉េខាងត្បូងកន្លងបន្ទាត់ព្រំដែនចូលដីកូរ៉េខាងជើងវិញ ។ កាយវិការនេះបានធ្វើឱ្យមានការទះដៃអបអរសាទរផងដែរ ។ មេដឹកនាំកូរ៉េទាំង២សន្យាធ្វើការខិតខំប្រឹងប្រែងឱ្យទទួលបានលទ្ធផលល្អមុនពេលជួបគ្នាកំពូលជាមួយលោក MOON JAE IN លោកគីម ជុងអ៊ុន បានចារលើក្រាំងមាសមួយ ដោយលោកសរសេរថា ចាប់ពីពេលនេះទៅជាប្រវត្តិសាស្ត្រ ថ្មីមួយ ។ ជាចំណុចចេញដំណើរនៃសករាជសន្តិភាព នៃប្រវត្តិសាស្ត្រ ។ មេដឹកនាំទាំង២បានសន្យាខិតខំប្រឹងប្រែង ដើម្បីឱ្យសម្រេចបានការរីកចម្រើននៃការជួបគ្នា
កំពូលទ្វេភាគីនៅតំបន់សន្តិសុខរួមនៃភូមិប៉ានមុនហ្សូម ។ លោក MOON ថា ការជួបគ្នាថ្នាក់កំពូលនេះចាប់ពីពេលនេះតទៅជានិមិត្តរូបនៃសន្តិភាព ហើយពុំមែនជាការបែកបាក់គ្នាដោយសារទស្សនកិច្ចរបស់លោកគីម ជុងអ៊ុន ។
លោកគីម ជុងអ៊ុន ថ្លែងទៅកាន់លោក MOON ថា ពិតជាល្អណាស់ដែលបានជួបលោក ។ ខ្ញុំពុំអាចទប់ក្តីសប្បាយរបស់ខ្ញុំបានទេ ពេលយើងជួបគ្នានៅទីនេះនៅកន្លែងប្រវត្តិសាស្ត្រមួយ ។ លោក MOON ក៏សម្តែងក្តីរីករាយរបស់លោកដែរ ដោយថ្លែងថា យើងប្រឈមមុខនឹងកាលៈទេសៈប្រវត្តិសាស្ត្រមួយ ។
ពេលចាប់ផ្តើមកិច្ចប្រជុំផ្សាយបន្តផ្ទាល់មេដឹកនាំកូរ៉េខាងជើងថ្លែងថា ខ្ញុំនិយាយបែបនេះនៅមុខ លោកប្រធានាធិបតី MOON ព្រមទាំងអ្នកកាសែតជាច្រើននាក់ ។ ខ្ញុំបានពិភាក្សាគ្នាយ៉ាងល្អជាមួយលោកប្រធានាធិបតី MOON ដោយត្រង់ៗស្មោះស្ម័គ្រ ហើយទទួលបានលទ្ធផលល្អមួយ ។លោក MOON សម្តែងការអរគុណចំពោះលោកគីម ដែលយល់ព្រមចូលរួមក្នុងការជួបគ្នានេះ ។ លោកបន្តថា ពេលលោកគីម ជុងអ៊ុន ដើរឆ្លងកាត់ខ្សែបន្ទាត់យោធាប៉ានមុនហ្សូម ក្លាយជានិមិត្តរូបមួយនៃសន្តិភាព និងពុំមែនជាការបែកបាក់គ្នាទេ ។លោកគីម ជុងអ៊ុន គូសបញ្ជាក់ពីភាពចាំបាច់នៃកិច្ចព្រមព្រៀងមួយ ដែលនឹងពុំរលំរលាយ
ឡើយ ។ ខ្ញុំយល់ថា នេះជាភ័ព្វវាសនាមួយសម្រាប់យើងកាន់ដៃគ្នាដើរទៅមុខ ដោយសម្លឹងដល់អនាគតជាមួយការតាំងចិត្តពុំមែនត្រឹមទទួលបានលទ្ធផលដូចកាលពីគ្រាកន្លងទៅ ដែលពុំអាចអនុវត្តបាន ។
កូរ៉េទាំង២ធ្លាប់បានព្រមព្រៀងគ្នារំសាយនុយក្លេអ៊ែរ ហើយបង្កើតសន្តិភាពជាអចិន្ត្រៃយ៍មួយនៅឧបទ្វីបកូរ៉េនាឱកាសនៃជំនួបកំពូល២លើកមុនកាលពីឆ្នាំ២០០០ និងឆ្នាំ២០០៧ ។លោក MOON ថ្លែងថា ភ្នែក និងត្រចៀករបស់ពិភពលោកផ្តោតមកកាន់ទីនេះភូមិប៉ានមុនហ្សូម ហើយក៏ជាការទន្ទឹមរង់ចាំរបស់ប្រជាជនខាងត្បូង និងខាងជើង ព្រមទាំងពលរដ្ឋយើងរស់នៅឯបរទេស ។ ខ្ញុំសង្ឃឹមថា ការចរចារបស់យើងប្រព្រឹត្តទៅដោយត្រង់ៗដើម្បីយើងអាចសម្រេចបានកិច្ចព្រមព្រៀងមួយ ហើយផ្តល់កាដូធំមួយដល់ប្រជាជនយើង ព្រមទាំងប្រជាជនឯទៀតៗនៃពិភពលោកដែលចង់បានសន្តិភាព ។ ការពិភាក្សាគ្នានាពេលព្រឹកបានបញ្ចប់មុនពេលថ្ងៃត្រង់បន្តិច ដោយលោកគីម ជុងអ៊ុន ចូលទៅកូរ៉េខាងជើងវិញតាមរថយន្តលីម៉ូហ្ស៊ីនមួយអមដោយអង្គរក្សជាច្រើននាក់រត់តាមរថយន្ត ។ លោកគីម នឹងត្រូវមកកាន់ដែនដីកូរ៉េ
ខាងត្បូងវិញ ដើម្បីចូលរួមក្នុងព្រឹត្តិការណ៍ជាច្រើន ក្នុងនោះមានការដើរកម្សាន្តមិត្តភាពជាមួយលោក MOON ។ មេដឹកនាំទាំង២ដាំដើមឈើមួយដើមដែលកំណត់ពីការជួបគ្នាដំបូងនេះ ។ក្រោយកិច្ចប្រជុំនាវេលារសៀល លោក MOON រៀបចំពិធីជប់លៀងមួយជូនលោកគីម ។
មេដឹកនាំកូរ៉េទាំង២នឹងកំណត់ចុះហត្ថលេខាលើកិច្ចព្រមព្រៀងលើបញ្ហាសំខាន់៣ គឺការរំសាយនុយក្លេអ៊ែរ សន្តិភាព និងកិច្ចសហប្រតិបត្តិការអន្តរកូរ៉េ ។ គេរង់ចាំមើលសេចក្តីប្រកាសរួមជាប្រវត្តិសាស្ត្រមួយដែលនឹងបើកទំព័រថ្មីមួយក្នុងសភាពការណ៍សន្តិសុខតំបន់ ។ជួបគ្នាកំពូលអន្តរកូរ៉េ២លើកមុនបើកផ្លូវរកសន្តិភាព និងការបង្រួបបង្រួមជំនួបកំពូលនាថ្ងៃទី២៧ មេសា រវាងប្រធានាធិបតីកូរ៉េខាងត្បូង លោក MOON JAE IN និងមេដឹកនាំកូរ៉េខាងជើង លោកគីម ជុងអ៊ុន ផ្តោតលើប្រធានបទសំខាន់ការរំសាយនុយក្លេអ៊ែរដែលផ្ទុយនឹងការជួបគ្នាកំពូលអន្តរកូរ៉េ២លើកមុន គឺកាលពីឆ្នាំ២០០០ និងឆ្នាំ២០០៧ ដែលផ្តោតលើការបង្រួបបង្រួមរវាងកូរ៉េទាំង២ ។ការជួបគ្នាកំពូលឆ្នាំ២០០០ រវាងប្រធានាធិបតីកូរ៉េខាងត្បូងលោក KIM DAE JUNG និងមេដឹកនាំកូរ៉េខាងជើង លោកគីម ជុងអុីល ជាការជួបគ្នាដ៏មានអត្ថន័យ ព្រោះនោះជាការជួបគ្នាលើកដំបូងរវាងប្រមុខដឹកនាំកូរ៉េទាំង២ចាប់តាំងពីបញ្ចប់សង្គ្រាមកូរ៉េមក ។ ការជួបគ្នានៅក្រុងព្យុងយ៉ាងពីថ្ងៃទី១៣ ទៅ១៥ មិថុនា គឺពោរពេញដោយក្តីរំភើបបំផុតដោយចាប់ផ្តើមតាមរយៈការចាប់ដៃគ្នាយ៉ាងណែនរវាងមេដឹកនាំទាំង២ ។ មេដឹកនាំទាំង២ចាប់ដៃគ្នាលើកទៅលើម្តងម្នាក់ ក្រោយការចុះហត្ថលេខាលើសេចក្តីថ្លែងការណ៍រួម ហើយច្រៀងរួមគ្នានូវបទចម្រៀងមួយមានចំណងជើងថា «បំណងរបស់យើងគឺការបង្រួបបង្រួម» ។
ការជួបគ្នាកំពូលនេះបានបញ្ចប់តាមរយៈការចុះហត្ថលេខាលើសេចក្តីថ្លែងការណ៍រួមនាថ្ងៃទី១៥ មិថុនា ដែលអំពាវនាវឱ្យធ្វើការរួមគ្នាដើម្បីការបង្រួមបង្រួមឧបទ្វីបកូរ៉េ ដោះស្រាយបណ្តាបញ្ហាមនុស្សធម៌ដូចជាបញ្ហានៃសាច់ញាតិគ្រួសារដែលព្រាត់គ្នា ដោយសង្គ្រាមកូរ៉េ ហើយជំរុញកិច្ចសហប្រតិបត្តិការសេដ្ឋកិច្ច និងការផ្លាស់ប្តូរគ្នាលើគ្រប់វិស័យ ។ក្រោយការជួបគ្នាកំពូលនេះការផ្លាស់ប្តូរគ្នាអន្តរកូរ៉េមានការកើនឡើងយ៉ាងខ្លាំងដោយឈានទៅសម្រេចបង្កើតតំបន់ឧស្សាហកម្មរួមនៅទីក្រុងកាអឺសុងកូរ៉េខាងជើង ហើយពង្រីកកម្មវិធីទេសចរណ៍នៅភ្នំ MONT KUMGANG កូរ៉េខាងជើង ។ កូរ៉េទាំង២បានជួបគ្នាកំពូលលើកទី២ នៅក្រុងព្យុងយ៉ាងពីថ្ងៃទី២ ទៅទី៤ តុលា ឆ្នាំ២០០៧ រវាងប្រធានាធិបតីកូរ៉េខាងត្បូងលោក ROH MOO HYUN និងមេដឹកនាំកូរ៉េខាងជើង លោកគីម ជុងអុីល ។ លោក ROH ទៅកាន់កូរ៉េខាងជើងតាមផ្លូវគោកក្លាយជាមេដឹកនាំកូរ៉េខាងត្បូងដំបូងគេដើរឆ្លងកាត់ព្រំដែនរួម ។ រយៈពេល៣ថ្ងៃនៃការជួបគ្នាកំពូលឈានទៅសម្រេចបានសេចក្តីប្រកាសរួមមួយដែលអំពាវនាវឱ្យពង្រឹងកាន់តែខ្លាំងកិច្ចសហប្រតិបត្តិការសេដ្ឋកិច្ចទ្វេភាគី កាត់បន្ថយភាពតានតឹងនៅតាមព្រំដែន ហើយបង្កើតសន្តិភាពជាអចិន្ត្រៃយ៍នៅឧបទ្វីបកូរ៉េ។
មេដឹកនាំកូរ៉េទាំង២ ចុះហត្ថលេខាលើសេចក្តីថ្លែងការណ៍រួមសេចក្តីថ្លែងការណ៍រួមត្រូវបានចុះហត្ថលេខានារសៀលថ្ងៃទី២៧ មេសា រវាងមេដឹកនាំកូរ៉េទាំង២ ។ក្នុងសេចក្តីថ្លែងការណ៍រួមនោះ ប្រទេសទាំង២បានព្រមព្រៀងគ្នាបញ្ឈប់រាល់សកម្មភាពប្រទូស្តរ៉ាយ ក្នុងសមុទ្រ លើដី និងលើអាកាស ។ លើសពីនេះកូរ៉េទាំង២នឹងប្រកាសយកឆ្នាំ២០១៨នេះជាឆ្នាំបញ្ចប់សង្គ្រាមកូរ៉េ ហើយប្រែក្លាយកិច្ចព្រមព្រៀងឈប់បាញ់គ្នាទៅជា
កិច្ចព្រមព្រៀងសន្តិភាព ។មេដឹកនាំទាំង២សម្តែងពីឆន្ទៈប្រែក្លាយតំបន់ហាមមិនឱ្យមានកងទ័ពដែលបែងចែកប្រទេសទាំង២ ទៅជាតំបន់សន្តិភាពរួមនឹងពុំមានសង្គ្រាមឡើយ រវាងកូរ៉េទាំង២ ។ លើសពីនេះទៀត មេដឹកនាំទាំង២សន្យាធ្វើប្រតិបត្តិការរំសាយនុយក្លេអ៊ែរទាំងស្រុងនៅឧបទ្វីបកូរ៉េ ។ ភាគីទាំង២ ព្រមព្រៀងគ្នាថា បណ្តាវិធានការចាត់ដោយកូរ៉េខាងជើង ដើម្បីរំសាយនុយក្លេអ៊ែរមានសារសំខាន់បំផុត ហើយសម្រេចថានាពេលអនាគតកូរ៉េទាំង២ នឹងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីប្រកាន់ពាក្យសន្យាទាំងឡាយ ។ សេចក្តីថ្លែងការណ៍បន្តថា លោកប្រធានាធិបតី MOON នឹងទៅកាន់ក្រុងព្យុងយ៉ាងនារដូវស្លឹកឈើជ្រុះនេះ ។ ចំណែកលោកគីម ជុងអ៊ុន សន្យាថា នឹងមិនឱ្យមានការខុសឆ្គងនានាដូចកាលគ្រាកន្លងទៅទៀតឡើយ ៕
ចែករំលែកព័តមាននេះ