ខេត្តកំពង់ឆ្នាំង ៖ រថយន្តហ៊ីយ៉ាន់ដាយដឹកត្រីប្រឡាក់មួយគ្រឿងបានក្រឡាប់បះជើងនៅកណ្ដាលថ្នល់បន្ទាប់ពីត្រូវរថយន្ត១គ្រឿងទៀតបុកពីក្រោយពេញទំហឹង ។ ហេតុការណ៍នេះបានកើតឡើងនៅវេលាម៉ោង០៤និង១៥នាទីព្រឹក ថ្ងៃទី២៧ ខែមេសា ឆ្នាំ២០១៨ នៅចំណុចមុខវត្តខ្សាមក្រុង ភូមិ២ សង្កាត់ខ្សាម ក្រុងកំពង់ឆ្នាំង ។
សមត្ថកិច្ចបានឲ្យដឹងថា មុនពេលកើតហេតុ មានរថយន្តម៉ាកហ៊ីយ៉ាន់ដាយមួយគ្រឿង ពាក់ផ្លាកលេខ ពោធិ៍សាត់ ៣A-៤៤៦៩ បើកបរដោយបុរសឈ្មោះ ហ៊ុយ ចាន់នី អាយុ៣៧ឆ្នាំ មានទីលំនៅភូមិសំរោង ឃុំក្បាលត្រាច ស្រុកក្រគរ ខេត្តពោធិ៍សាត់ បានបើកដល់ចំណុចកើតហេតុ ក៏បានឈប់រថយន្តចុះទៅបត់ជើង ភ្លាមនោះក៏មានរថយន្តមួយគ្រឿងទៀតម៉ាកហ៊ីយ៉ាន់ដាយដឹកស្វាយ ពណ៌ស ពាក់ផ្លាកលេខ កំពង់ចាម ៣A-១៨២៥ បើកបរដោយបុរសឈ្មោះ ផាន រឿន ភេទប្រុស អាយុ៣២ឆ្នាំ មានទីលំនៅភូមិអូររូង ឃុំក្រវ៉ាញ ស្រុកបារាយណ៍ ខេត្តកំពង់ធំ បានបើកមកពីក្រោយបុកពេញទំហឹង បណ្ដាលឲ្យរថយន្តឈប់ស្ងៀមក្រឡាប់បះជើងតែម្ដង សំណាងល្អមិនមាននរណាម្នាក់បានរងគ្រោះថ្នាក់ក្នុងហេតុការណ៍នោះទេ ។ ក្រោយកើតហេតុគេឃើញត្រីប្រឡាក់ជាច្រើនបានធ្លាក់ពេញលើថ្នល់ជាតិ ហើយត្រូវបានម្ចាស់យករថយន្តមកសាងត្រីដើម្បីដឹកបន្តទៅមុខទៀត ។
ប្រភពដដែលបានឲ្យដឹងថា ភាគីទាំងសងខាងធ្វើការសម្របសម្រួលគ្នា ដោយភាគីរងគ្រោះទារសំណងចំនួន៥,០០០ដុល្លារដើម្បីបញ្ចប់រឿង ប៉ុន្តែភាគីបង្កសុំត្រឹម២,០០០ដុល្លារ តែមិនត្រូវរូវគ្នាទើបសមត្ថកិច្ចស្ទុចយករថយន្តទាំង២គ្រឿងមករក្សាទុកនៅអធិការនគរបាលក្រុង ដើម្បីរង់ចាំចាត់ការតាមផ្លូវច្បាប់ ៕
ចែករំលែកព័តមាននេះ