ខេត្តរតនគិរី ៖ មានករណីគ្រោះថ្នាក់ចរាចរណ៍មួយកើតឡើងដោយសារតែជិះម៉ូតូដឹកឈើទៅវៀតណាមធ្ងន់ពេក ដួលខ្លួនឯងបោកក្បាលនឹងឈើស្លាប់កាលពីវេលាម៉ោង៩ និង១៥នាទី លើកំណាត់ផ្លូវជាតិលេខ៧៨ ត្រង់ចំណុចចម្ការដូងប្រេង ស្ថិតក្នុងភូមិសោមធំ ឃុំសោមកានិញ ស្រុកអូរយ៉ាដាវ ខេត្តរតនគិរី។ បើតាមអ្នកដំណើរប្រាប់ឲ្យដឹងថា ពួកគាត់បានម៉ូតូដឹកឈើនេះមានទិសដៅពីលិចទៅកើតក្នុងល្បឿនយ៉ាងលឿន ផ្ទុកឈើ៥៦ដុំប្រភេទឈើសុក្រំ លុះដល់ចំណុចខាងលើដួលខ្លួនឯងបោកនឹងឈើស្លាប់ នៅកន្លែងកើតហេតុតែម្តង។
រីឯនគរបាលប៉ុស្តិ៍ឃុំសោមធំ ប្រាប់ឲ្យដឹងថា ជនរងគ្រោះមានឈ្មោះ សឿន ធួន ភេទប្រុសអាយុ២៥ឆ្នាំ ជនជាតិមានទីលំនៅ ភូមិតាកុកច្រាយ ឃុំបរខាំ ស្រុកអូរយ៉ាដាវ ខេត្តរតនគិរី។ ប្រភពព័ត៌មានខាងលើប្រាប់បន្តថា បន្ទាប់ពីធ្វើការត្រួតពិនិត្យរួចសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីខ្មែរ។ គួររំលឹកផងដែរថា ករណីគ្រោះថ្នាក់ចរាចរណ៍នៅស្រុកអូរយ៉ាដាវដោយសារម៉ូតូដឹកឈើ,រថយន្តដឹកឈើ មានច្រើនករណីបណ្តាលឲ្យស្លាប់មនុស្សច្រើននាក់ក្នុង១ខែៗ។ ប៉ុន្តែកន្លងមកសមត្ថកិច្ចមូលដ្ឋានលាក់បាំងព័ត៌មានព្រោះឈ្មួញដឹកឈើមានមន្ត្រីគ្រាក់ៗមួយចំនួនក្នុងខេត្តរតនគិរី កាងពីក្រោយ៕
ចែករំលែកព័តមាននេះ