រាជធានីភ្នំពេញ ៖ កូនប្រុសលោកអេង ឆៃអ៊ាង អតីតអនុប្រធានគណបក្សសង្គ្រោះជាតិបានប្រកាសថា បង្កើតគណបក្សនយោបាយថ្មីមួយ ដើម្បីចូលរួមការបោះឆ្នោតឆ្នាំ២០១៨នេះ ដោយដាក់ឈ្មោះថា«គណបក្សសម្តេចឪ» ។
កូនប្រុសច្បងរបស់អ្នកនយោបាយដែលគាំទ្របក្សប្រឆាំងលោកអេង រតនា ដែលរួចផុតពីការហាមឃាតមិនឲ្យធ្វើនយោបាយបានសរសេរនៅលើបណ្តាញសង្គមហ្វេសប៊ុកនៅថ្ងៃទី២៧ ខែមេសាថា «គណបក្ស «សម្តេចឪ» និងឡូហ្កោ អ៊ុនតាក់ នឹងដំណើរការជាផ្លូវការ ។ ខ្ញុំនឹងឆាប់ចុះបញ្ជី ដើម្បីឲ្យទាន់បញ្ជីរៀបចំបេក្ខជនពីគ.ជ.ប ។ អតីតភាពល្បីៗពីអតីតគណបក្សប្រឆាំងធំជាងគេនឹងចូលរួមជាមួយខ្ញុំ » ។
លោកបន្តថា យុវជនជាច្រើននឹងអាចមានមុខនៅក្នុងបញ្ជីបេក្ខជនតំណាងរាស្ត្រ ឬក៏អាចបានកៅអីតំណាងរាស្ត្រតែម្តង ។ ខ្ញុំនឹងជួបលោក សាម អ៊ីន ដើម្បីបង្កើតសម្ព័ន្ធធំមួយ រួចបញ្ចុះបញ្ចូលគាត់ឲ្យមកឈរនៅខាងគណបក្សរបស់ខ្ញុំវិញ តែឈ្មោះបក្សគាត់អាចនៅរក្សាដដែលបាន ហើយបេក្ខជននៅមណ្ឌលផ្សេងក៏នៅតែអាចដាក់បានដដែលសម្រាប់បក្សរបស់គាត់ ។ ភ្នំពេញជាមណ្ឌលដែលគណបក្សប្រឆាំងខ្លាំង និងជាប់យូរបំផុត ។ ការប្រកាសបង្កើតគណបក្សរបស់កូនប្រុសអតីតមន្ត្រីជាន់ខ្ពស់បក្សប្រឆាំងធ្វើឡើងបន្ទាប់ពីកូនប្រុសលោកគង់ គាំ គឺលោកគង់ មុនីកាបានបង្កើតគណបក្សថ្មីមានឈ្មោះថា « គណបក្សឆន្ទៈខ្មែរ » ដើម្បីចូលរួមប្រកួតប្រជែងការបោះឆ្នោតជ្រើសតាំងអ្នកតំណាងរាស្ត្រនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។
នៅលើបណ្តាញសង្គមលោកអេង រតនៈក៏បានសរសេទៀតថា គណបក្សថ្មីក្រោមគំនិតផ្តួចផ្តើមរបស់លោក ត្រូវការលក្ខន្តិកៈ ដើម្បីចុះឈ្មោះគណបក្សនយោបាយ គឺត្រូវការស្នាមមេដៃបួនពាន់នាក់ ។
លោកបញ្ជាក់ថា «ខ្ញុំជឿថា មនុស្សចំនួនបួនពាន់នាក់នឹងគាំទ្រខ្ញុំ ដើម្បីបង្កើតបក្សមួយនេះចូលរួមការបោះឆ្នោត ។ ខ្ញុំចាប់ផ្តើមពីមូលដ្ឋានដាច់ស្រយាលភាគខាងលិច ។ ចាប់ផ្តើមពីសៀមរាប និងបាត់ដំបង ។ នៅសៀមរាបលោកជិន សុខង៉េង នឹងជាអ្នកដឹកនាំ ។ គាត់នឹងរកមនុស្សដាក់ ដើម្បីបំពេញបញ្ជី ។ ខាងបាត់ដំបងខ្ញុំរកបាន ។ ខ្ញុំនឹងឈរលេខមួយនៅទីនេះ ។ បេក្ខជននាយករដ្ឋមន្ត្រីជាស្ត្រីខ្ញុំសូមលាក់ឈ្មោះ ទុកសិន» ។
ការបង្កើតគណបក្សថ្មី ដើម្បីចូលរួមប្រកួតប្រជែងសន្លឹកឆ្នោតនេះដែរ លោកអេង រតនៈក៏បានគូសញ្ជាក់ថា «ខ្ញុំជឿជាក់ថា យើងនឹងអាចទទួលបានលើសពី 50% +1 បូកនឹងបក្សផ្សេងទៀត បង្កើតរដ្ឋាភិបាលត្រីភាគី ដឹកនាំដោយគណបក្សសម្តេចឪ ដែលមានស្ត្រីជានាយករដ្ឋមន្ត្រី» ។
សូមជម្រាបថា មួយរយៈពេលនេះបន្ទាប់ពីឃើញស្ថានការនយោបាយនៅកម្ពុជាមួយរយៈពេលចុងក្រោយនេះមានភាពមិននឹងននោះ ពិសេសការរំលាយគណបក្សសង្គ្រោះជាតិដោយតុលាការកំពូលនោះក្រុមអ្នកស្នេហ៍បាននាំគ្នាបង្កើតគណបក្ស ដើម្បីចូលរួមបោះឆ្នោតនៅពេលខាងមុននេះដូចជា គណបក្សខ្មែរតែមួយ ដែលមានប្អូនប្រុសលោកកែម ឡីជាប្រធាន គណបក្សឆន្ទៈខ្មែររបស់កូនប្រុសលោកគង់ គាំ គណបក្សជាតិនិយមជាដើម ៕
ចែករំលែកព័តមាននេះ