រាជធានីភ្នំពេញ ៖ កម្មវិធីប្រកួតប្រដាល់អន្តរជាតិនៅលើសង្វៀនទូរទស្សន៍MyTVថ្ងៃសុក្រទី២៧ មេសា ស្អែកនេះ គណៈកម្មការរៀបចំការប្រកួតបានផ្ដល់ឱកាសឱ្យកីឡាករជើងខ្លាំងកម្ពុជា២រូប ជួបប្រកួតជាមួយកីឡាករថៃ ។ អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបហាក់មានវិជ្ជាគុនពិបាកផ្ដួលអ៊ីចឹងនោះ។
ការប្រកួតដែលនឹងចាប់ផ្ដើមឡើងនៅវេលាម៉ោង៨យប់ស្អែកនេះ កីឡាករកម្ពុជា មាស សុជាតិ មកពីក្លិបឃ្លាំងមឿងកីឡាខេត្តពោធិសាត់ដែលមានប្រវត្តិប្រកួត៨០ដង ឈ្នះ៦៦ដង ស្មើ១ដង ចាញ់១៣ដង និងផ្ដួលគូប្រកួតឱ្យសន្លប់បាន២២ដង ត្រូវជួបប្រកួតជាមួយកីឡាករថៃឈ្មោះភីតសាយឈុន ធីដេតឡូងើន ក្នុងប្រភេទទម្ងន់៦៥គីឡូក្រាម ។
កីឡាករថៃរូបនេះមានប្រវត្តិប្រកួត៨០ដង ឈ្នះ៦០ដង ស្មើ៣ដង ចាញ់១៧ដង និងធ្លាប់ផ្ដួលគូប្រកួតឱ្យសន្លប់បាន១២ដង ។ រវាងមាស សុជាតិ និងកីឡាករថៃជាគូប្រកួតទោះបីមានប្រវត្តិឡើងសង្វៀនស្មើគ្នាក៏គេពិបាកទស្សន៍ទាយលទ្ធផលទុកមុនដែរ ដោយសារពួកគេមិនធ្លាប់ជួបគ្នាទើបតែលើកនេះប៉ុណ្ណោះ ។
ចំណែកហ៊ីម សេរី មកពីក្លិបតាព្រហ្មមានជ័យ មានប្រវត្តិប្រកួត៨៥ដង ឈ្នះ៦៨ដង ស្មើ៤ដង ចាញ់១២ដង និងផ្ដួលគូប្រកួតឱ្យសន្លប់១៨ដង ត្រូវជួបប្រកួតជាមួយកីឡាករថៃឈ្មោះភិតសុគន្ធ ប៉េឡេបុរីរ៉ាំ ក្នុងប្រភេទទម្ងន់៥១គីឡូក្រាម ។ កីឡាករថៃរូបនេះមានប្រវត្តិប្រកួត៩៧ដង ឈ្នះ៧៦ដង ស្មើ៤ដង ចាញ់១៧ដង និងផ្ដួលគូប្រកួតឱ្យសន្លប់២៥ដង ដូច្នេះថ្វីដៃប្រកួតនៅលើសង្វៀនរបស់គេមិនអន់ឡើយ។
ចាំមើលហ៊ីម សេរី អាចតស៊ូបានដល់ទឹកទីប៉ុន្មានក្នុងជំនួបប្រកួតជាមួយកីឡាករជើងខ្លាំងថៃរូបនេះ?
នៅលើសង្វៀនដដែលសម្រាប់គូប្រកួតមិត្តភាពរវាងកីឡាករកម្ពុជា និងកម្ពុជាវិញក៏សុទ្ធតែជាជើងខ្លាំងក្នុងពិភពប្រដាល់ផងដែរ ។
កីឡាករ ណែម ហៀង មកពីក្លិបតាព្រហ្មមានជ័យ ត្រូវជួបប្រកួតជាមួយកីឡាករ ខាំ ហ៊ាមកពីក្លិបរ៉ាហាប់ស្វាយប៉ាក និងកីឡាករ ផាន់ ពិសិដ្ឋ មកពីក្លិបពុទ្ធសេរីវង្សពោធិសែនជ័យ ប្រកួតជាមួយកីឡាករ កឿម សុវណ្ណនឿត មកពីក្លិបឃ្លាំងមឿងកីឡា ខេត្តពោធិ៍សាត់៕
ចែករំលែកព័តមាននេះ