ខេត្តត្បូងឃ្មុំ ៖ ផ្លូវដីដែលពិបាកនឹងធ្វើដំណើរក្នុងរដូវវស្សាត្រូវបែកភក់ដោយសារតែទឹកភ្លៀងហើយរដូវប្រាំងត្រូវហុយដែលពិបាកក្នុងការធ្វើដំណើរនៅតាមបណ្តាភូមិជាច្រើនក្នុងសង្កាត់សួង ក្រុងសួង តែដោយសារមានការយកចិត្តទុកដាក់ពីសំណាក់អាជ្ញាធរគ្រប់លំដាប់ថ្នាក់នោះផ្លូវថ្នល់ត្រូវបានប្រែក្លាយទៅជាផ្លូវបេតុងនិងចាក់កៅស៊ូជាច្រើនខ្សែជាមួយនោះមានដាក់អំពូលភ្លើងសម្រាប់បំភ្លឺនៅពេលរាត្រីថែមទៀត និងកំពុងតែធ្វើការអភិវឌ្ឍន៏បន្តបន្ទាប់ឲ្យកាន់តែមានភាពស្រស់ស្អាត ។
លោក ជួង ភារម្យ ចៅសង្កាត់សួងមានប្រសាសន៏ឲ្យដឹងនៅព្រឹកថ្ងៃទី២៦ ខែមេសា ឆ្នាំ២០១៨ ថាចាប់តាំងពីក្រោយការបោះឆ្នោតអាណត្តិទី៣តាមការសង្កេតនៅក្នុងសង្កាត់សួង ទាំងមូលមានការរីកចម្រើនដោយផ្លូវជាច្រើនខ្សែនៅតាមបណ្តាភូមិនានាត្រូវបានប្រែក្លាយមកជាផ្លូវបេតុង និងកៅស៊ូដើម្បីបង្កលក្ខណៈងាយស្រួលដល់ប្រជាពលរដ្ឋធ្វើដំណើរទៅវិញទៅមកហើយមានផ្លូវខ្លះត្រូវបានរៀបដាក់ប្រព័ន្ធលូដើម្បីការពារកុំឲ្យស្ទះទឹកលិចចូលផ្ទះរបស់អ្នកភូមិ ។
លោក ជួង ភារម្យ ចៅសង្កាត់សួងមានប្រសាសន៏រំលឹកថា ក្នុងអំឡុងឆ្នាំ២០១២រូបលោកបានចាប់ផ្តើមសាងសង់ផ្លូវបេតុងបាន១ខ្សែប្រវែង១១១៥ម៉ែត្រនៅក្នុងឆ្នាំដដែលបានចលនាសប្បុរសជនពីបងប្អូនអាជីវករលក់ដូរនៅផ្សារក្រុងសួង ដោយបានធ្វើផ្លូវកៅស៊ូបានចំនួន០៤ខ្សែប្រវែងជាង២០០០ម៉ែត្រតែក្រោយមកទៀតផ្លូវនេះត្រូវបានខូចខាតទៅវិញ ។
រហូតមកដល់ឆ្នាំ២០១៥ លោក ប្រាជ្ញ ចន្ទ គណៈអភិបាលខេត្តបានចុះមកពិនិត្យផ្ទាល់ដោយបានរៀបចំផ្លូវកសាងផ្លូវកៅស៊ូចំនួន២ខ្សែមានប្រវែង១៧៥០ម៉ែត្រនៅក្នុងភូមិកិល និងភូមិធ្លក ។ ហើយក្រោយមកទៀតត្រូវបានទេសរដ្ឋមន្ត្រីលោក ជា សុផារ៉ា បានជួយកសាងផ្លូវកៅស៊ូ១ខ្សែមានប្រវែង១៦០០ម៉ែត្រចាប់ពីសង្កាត់វិហារហ្លួងមកសង្កាត់សួងព្រមទាំងផ្លូវនៅតាមភូមិផ្សេងទៀត ។ បន្ទាប់មករូបលោកនឹងលោកអភិបាលក្រុងសួងបានស្នើសុំទៅលោកអភិបាលខេត្តក៏បានផ្តល់ផ្តល់ផ្លូវកៅស៊ូ៣ខ្សែមានប្រវែង៤៥០ម៉ែត្រ ក្នុងភូមិតូង ភូមិសួងកើត និងភូមិជ្រែបិទមាស ។
លោកចៅសង្កាត់សួងបញ្ជាក់ថា ដោយមានការយកចិត្តទុកដាក់ពីសំណាក់លោកអភិបាលខេត្តក៏បានជួយផ្តល់ផ្លូវកៅស៊ូ១ខ្សែទៀតនៅមុខសាលាក្រុងសួងប្រវែង៦០០ម៉ែត្រមានរៀបចំដាក់ប្រព័ន្ធលូ និងបង្គោលភ្លើងសម្រាប់បំភ្លឺនៅពេលរាត្រីផងដែរ ។ ផ្លូវនៅជុំវិញចំណតរថយន្តក្រុងសួងត្រូវបានម្ចាស់ចំណតរួមចំណែកអភិវឌ្ឍន៏ចាក់ផ្លូវបេតុងនៅជុំវិញដើម្បីឲ្យកាន់តែមានសោភ័ណ្ឌភាពបរិវេណនៅមុខសាលាក្រុងសួង បានរៀបចំក្រាលការ៉ូការូឡា និងធ្វើសួនច្បារដើម្បីទាក់ទាញពលរដ្ឋឲ្យមកលេង ។ កន្លងមកក្នុងពេលដែលមានការប្រលងប្រណាំងទីក្រុងស្អាតក្រុងសួងបានទទួលរំដួល១ទងផងដែរ ៕
ចែករំលែកព័តមាននេះ