រាជធានីភ្នំពេញ ៖ មកទល់ពេលនេះ កីឡាអុកចត្រង្គ ដែលគេនិយមប្រើពាក្យថា លេងអុកៗនោះ មានការពេញនិយមយ៉ាងខ្លាំងនៅតាមតៀមកាហ្វេ និងហាងកាត់សក់ ដោយនៅកន្លែងខ្លះគេឃើញម្ចាស់ហាងដាក់អុកក្ដារតូចធំ ដើម្បីទាក់ទាញអ្នកចូលចិត្តលេងឱ្យចេញចូលហាងរបស់ខ្លួន ។ មានហេតុផលមួយចំនួនដែលនាំឱ្យកីឡាប្រពៃណីមួយនេះពេញនិយមខ្លាំងនាពេលបច្ចុប្បន្ន ក្នុងនោះការបង្កើតឱ្យមានព្រឹត្តិការណ៍ប្រកួតដណ្ដើមតំណែងស្ដេចអុកអង្គរសង្ក្រាន្តរៀងរាល់ឆ្នាំនៅថ្ងៃបុណ្យចូលឆ្នាំខ្មែរក៏ជាធាតុផ្សំទាក់ទាញមួយមិនអាចប្រកែកបានផងដែរ។
ក្រុមអ្នកមានចំណូលចិត្តលេងអុកជាច្រើនបានឱ្យដឹងពីមូលហេតុស្រដៀងគ្នាថា ហេតុផលដែលនាំឱ្យកីឡាអុកមានការពេញនិយមលេងជាពិសេសនៅតាមតៀមកាហ្វេ ហាងកាត់សក់ និងកន្លែងមួយចំនួនទៀតនោះដោយសារតែកីឡាមួយនេះនៅពេលបានលេងគឺមិនមែនត្រឹមតែដើម្បីកម្សាន្តប៉ុណ្ណោះទេ ប៉ុន្តែក៏បែកគំនិតមានការចេះដឹងច្រើនដែរ ជាពិសេសគឺបែកបញ្ញាតែម្ដង ។ អ្នកបានប្រឡូកនឹងល្បែងមួយនេះបានអះអាងថា លេងអុកចត្រង្គមិនខុសពីលេងល្បែងបញ្ញា ឬរៀនពីក្បួនធ្វើសង្គ្រាមនោះទេ ដោយសារតែការលេងអុក គឺត្រូវប្រើគំនិត និងភាពរហ័សនៃបញ្ញា បើមិនដូច្នោះទេ គឺលេងមិនកើត។
លោក ឈាវ បូរ៉ា ដែលក្នុងពេលនេះបានក្លាយជាអគ្គលេខាធិការសហព័ន្ធកីឡាអុកចត្រង្គកម្ពុជាបានអះអាងថា ក្នុងពេលដំបូងលោកគ្រាន់តែជាក្មេងដែលចូលចិត្តមើលគេលេងអុកប៉ុណ្ណោះ ប៉ុន្តែនៅពេលបានប្រឡូកខ្លួនឯងទើបដឹងថាជក់ហើយបែកបញ្ញា ។
លោកថា អ្នកមិនចេះលេងអុកនឹងគិតថា នេះជាកីឡាដែលធុញព្រោះចំណាយពេលយូរហើយមើលទៅមិនគួរលេង ប៉ុន្តែនៅពេលបានលេងមិនសូវមានអ្នកណាក្រោកចេញនោះទេ អ៊ីចឹងហើយទើបអ្នកលេងអុករមែងមានគ្នាច្រើននាក់ដើម្បីផ្លាស់ប្ដូរដៃគូការពារភាគីម្ខាងណាលែងចង់លេងបន្ត គឺត្រូវមានអ្នកចូលលេងជំនួស ហើយបើប៉ះគូប្រកួតដែលលេងកាន់តែខ្លាំងគឺកាន់តែជក់ចិត្ត និងចង់លេងភ្លេចបាយភ្លេចទឹកក៏មាន។
ជាក់ស្ដែងបទចម្រៀង«សម្លកូនអុក»គឺបង្ហាញយ៉ាងច្បាស់ថា ល្បែងអុកពេញនិយមរហូតភ្លេចបាយភ្លេចទឹក ដោយសារតែល្បែងមួយនេះ បើអ្នកណាចេះលេង ហើយមានគ្នាលេង គឺលេងជក់តែម្ដង ដែលអាចនិយាយបានថាកីឡាមួយនេះ លេងហើយមិនចង់ងើប ។ គាប់ជួនជាអ្នកលេងភាគច្រើនចាប់ផ្ដើមភ្នាល់ប្រាក់ និងចង់ល្បងបញ្ញាដាក់គ្នាទៅវិញទៅមកផង ទើបលោកថា អ្នកបានលេងអុក គឺដឹងតែជាប់ចិត្តក្រោកលែងរួចមិនខុសពីការញៀនញ៉ាម ។
យ៉ាងណាមិញលោកថា អ្នកលេងអុកភាគច្រើនមិនសុទ្ធតែដើម្បីភ្នាល់ដាក់លុយនោះទេ តែជាការភ្នាល់បញ្ញាច្រើនជាង ទើបឱ្យតែដល់ម៉ោងម្ដងៗ គឺមិនខ្វះអ្នកចង់លេង ។ ដូចជាករណីរូបលោក ក្នុងពេលចេញលេងដំបូងៗ គឺគ្រាន់តែលេងជាមួយអ្នកចេះលេងធម្មតាៗប៉ុណ្ណោះ ប៉ុន្តែដល់ពេលចាប់ផ្ដើមចេះស្ទាត់ ហើយបានឈ្នះអ្នកចេះលេងយូរៗម្ដង គឺមិនខុសពីស្មៅយោងជើងបន់ឱ្យតែដល់ម៉ោងន្អាលរកគូប្រកួតមកលេងជាមួយតែម្ដង ។
លោកថា លេងអុក គឺដូចជារៀបក្រឡាសង្គ្រាម និងរៀបផែនការអ្វីមួយទាំងស្រុង ដោយត្រូវប្រើបញ្ញាទប់សត្រូវ ទប់ឧបសគ្គលើគ្រប់ចំណុច បើខុសតែមួយក្រឡាគឺនឹងចាញ់តែម្ដង ទើបតម្រូវឱ្យអ្នកលេងគិតគូរខ្លាំងណាស់ ហើយមិនខុសពីភ្នាល់បញ្ញាលើក្ដារតូចមួយ។
លោក ប៊ិន គាសេង កីឡាករជម្រើសជាតិនាពេលបច្ចុប្បន្ន ក៏បានបង្ហើបថា ហេតុផលនៃការលេងអុកក្នុងពេលជួបជុំ ក៏ដោយសារតែចង់ល្បងបញ្ញាដាក់គ្នាទៅវិញទៅមក និងចង់បំបែកក្រឡាឱ្យចេះដើរកាន់តែច្រើននៅពេលដោះដូរដៃគូនោះដែរ ។ លោកថា អ្នកបានប្រឡូកនឹងកីឡាមួយនេះមិនថាកីឡាករអាជីព ឬមិនអាជីពសុទ្ធតែចង់ឈ្នះដើម្បីបង្ហាញពីភាពប៉ិនប្រសប់របស់ខ្លួននៅក្នុងល្បែងមួយនេះមិនខុសគ្នាទេ ទើបអ្នកលេងភាគច្រើន គឺថាជាប់ចិត្ត ហើយលេងយ៉ាងងប់ងុលនៅពេលបានជួបអ្នកចេះលេងដូចគ្នាម្ដងៗ ។ អ្នកខ្លះតែងតែយកតៀមកាហ្វេ ហាងកាត់សក់ ធ្វើជាទីកន្លែងជួបជុំគ្នាលេងដោយសារម្ចាស់ហាងមានក្ដារអុកច្រើនដាក់ឱ្យលេងដើម្បីទាក់ទាញចាប់តាំងពីកីឡាមួយនេះកាន់តែពេញនិយម ។ មកទល់ពេលនេះ លោកថា កីឡាអុកកាន់តែមានអ្នកចង់លេងច្រើន មានអ្នកចេះស្ទាត់ច្រើន ហើយក៏មិនខ្វះដៃគូល្អផងដែរ ទើបកីឡាមួយនេះកាន់តែផុសផុលខ្លាំងនៅតាមតៀមកាហ្វេ និងហាងកាត់សក់ជាពិសេសនៅម្ដុំជុំវិញស្ដាតអូឡាំពិក ម្ដុំផ្សារដេប៉ូ និងម្ដុំមុខសាលាបាក់ទូកជាដើម ។
លោកថា អ្នកចេះអុកស្ទាត់មិនមែនអត់ប្រយោជន៍ដូចមុននោះទេគឺអាចលេងបំបែកគំនិតបានកាន់តែល្អ អាចឈ្នះពីការលេងភ្នាល់ និងសំខាន់គឺបានបង្ហាត់បន្ត ចាប់តាំងពីមានការបើកកន្លែងបណ្ដុះបណ្ដាលលេងអុក។ លោកធ្លាប់បង្ហើបក្នុងបទសម្ភាសន៍ថា អ្នកចេះអុកស្ទាត់បើទោះជាលេងជាមួយគេដោយមិនភ្នាល់ដាក់លុយ ក៏អាចភ្នាល់យកកាហ្វេបាយព្រឹកបានដែរ ទើបលោកយល់ថា អ្នកចូលចិត្តលេងកាន់តែច្រើនខុសពីមុន។
គួរបញ្ជាក់ថា លោកអគ្គលេខាធិការសហព័ន្ធកីឡាអុកចត្រង្គកម្ពុជា ឈាវ បូរ៉ា បញ្ជាក់ថា កីឡាមួយនេះកាន់តែមានការរីកចម្រើនជាងមុន ដោយលោក និងអ្នកលេងស្ទាត់ទាំង
អស់បានបង្កើតផែនការបណ្ដុះអ្នកជំនាញសម្រាប់ផែនការស៊ីហ្គេមលើកទី៣២ ក្នុងឆ្នាំ២០២៣នៅកម្ពុជានោះផង ។ លោកថា នេះជាកីឡាប្រពៃណីរបស់ខ្មែរដែលរំពឹងទទួលបានមេដាយពីការប្រកួតច្រើន ខណៈដែលប្រទេសដែលត្រូវមកចូលរួមប្រកួត ក៏បានមកទទួលការបណ្ដុះបណ្ដាលជំនាញលេងអុកពីអ្នកជំនាញកម្ពុជាជាការត្រៀមខ្លួនទុកមុនដែរ ។ លោកបានបន្ថែមថា ថ្មីៗកន្លងទៅនេះ សហព័ន្ធបានទទួលការអនុញ្ញាតពីក្រសួងអប់រំ យុវជន និងកីឡារៀបចំការប្រកួតជ្រើសរើសជើងឯកថ្នាក់ជាតិ ជាលើកដំបូងរបស់ខ្លួនដើម្បីសម្រិតសម្រាំងកីឡាករជម្រើសជាតិ ហើយជាលទ្ធផលសហព័ន្ធជ្រើសរើសបានកីឡាករខ្លាំងៗចំនួន៦រូប គ្រូបង្គោល១រូប និងគ្រូជំនួយ១រូប។
បច្ចុប្បន្ន សហព័ន្ធមានក្លិបចំនួន៨ ក្នុងនោះក្លិបចំនួន២នៅខេត្តសៀមរាប និងកំពត និងរាជធានីភ្នំពេញមាន៦ក្លិប ។ ម្ចាស់ជ័យលាភីស្តេចអុកចត្រង្គអង្គរសង្ក្រាន្តពីរសម័យកាលកាលពីឆ្នាំ២០១៤ និង២០១៥រូបនេះ បញ្ជាក់ថា ប្រភេទកីឡាអុកចត្រង្គជាកីឡាប្រពៃណីមួយ ដែលប្រជាជនខ្មែរនិយមចូលចិត្តលេងច្រើនស្ទើរតែនៅគ្រប់កន្លែងជាពិសេសនៅតាមតៀមកាហ្វេ ហាងកាត់សក់ ឬហាងតូចៗក៏មានអុកលេងដែរ ។ ដូច្នេះទៅថ្ងៃអនាគតលោកសង្ឃឹមថា នឹងអាចជ្រើសរើសធនធានកីឡាករល្អៗបានច្រើន ខណៈសហព័ន្ធមានគម្រោង ជ្រើសរើសកីឡាករជម្រើសជាតិបន្ថែមទៀតនៅឆ្នាំ២០១៩ខាងមុខ៕
ចែករំលែកព័តមាននេះ