ទីក្រុងមូស្គូ ៖ ខណៈអង្គការនៃប្រទេសនាំចេញប្រេង (OPEC) ខិតខំធ្វើឲ្យទីផ្សារប្រេងមានលំនឹង ក្រុមហ៊ុនផលិតប្រេងអាមេរិកកំពុងតែទាញយកអត្ថប្រយោជន៍ទៅវិញ ដោយអាមេរិកបាននាំចេញប្រេងក្នុងកម្រិតច្រើនជាងគេទៅកាន់តំបន់អឺរ៉ុប ។ គួរបញ្ជាក់ថា កាលពីឆ្នាំមុន…
ទីក្រុងមូស្គូ ៖ ខណៈអង្គការនៃប្រទេសនាំចេញប្រេង (OPEC) ខិតខំធ្វើឲ្យទីផ្សារប្រេងមានលំនឹង ក្រុមហ៊ុនផលិតប្រេងអាមេរិកកំពុងតែទាញយកអត្ថប្រយោជន៍ទៅវិញ ដោយអាមេរិកបាននាំចេញប្រេងក្នុងកម្រិតច្រើនជាងគេទៅកាន់តំបន់អឺរ៉ុប ។
គួរបញ្ជាក់ថា កាលពីឆ្នាំមុន OPEC និង ប្រទេសរុស្ស៊ី បានព្រមព្រៀងគ្នាកាត់បន្ថយផលិតកម្មប្រេងប្រមាណ១,៨លានធុងក្នុង១ថ្ងៃដើម្បីធ្វើឲ្យទីផ្សារមានលំនឹង ។
មកដល់ពេលនេះ ការព្រមព្រៀងខាងលើបានជួយឲ្យតម្លៃប្រេងកើនឡើងយ៉ាងច្រើន ហើយកំណើនផលិតកម្មនៅសហរដ្ឋអាមេរិកកំពុងតែធ្វើឲ្យប្រទេសរុស្ស៊ី នីហ្សេរីយ៉ា និងប្រទេសផលិតប្រេងដទៃទៀតនៅតំបន់អឺរ៉ុបជួបប្រទះបញ្ហាក្នុងការនាំចេញ ។
ពាណិជ្ជករម្នាក់បាននិយាយថា ៖« អាមេរិកកំពុងតែដាក់លក់ប្រេងរបស់ខ្លួនទៅគ្រប់ទីកន្លែង។ វាបានធ្វើឲ្យក្រុមហ៊ុនប្រេងក្នុងស្រុកស្ថិតនៅក្រោមសម្ពាធយ៉ាងខ្លាំង » ។
នៅឆ្នាំនេះ ទិន្នផលប្រេងអាមេរិកនឹងកើនឡើងរហូតដល់១០,៧លានធុងក្នុង១ថ្ងៃ គឺខ្ពស់ជាងប្រទេសផលិតប្រេងធំៗដូចជា រុស្ស៊ី និងអារ៉ាប៊ីសាអូឌីត ។
នៅខែមេសានេះ សហរដ្ឋអាមេរិកអាចនឹងនាំចេញប្រេងទៅកាន់តំបន់អឺរ៉ុបប្រមាណ៥៥ម៉ឺនធុងក្នុង១ថ្ងៃ ដែលនេះគឺជាកម្រិតខ្ពស់ជាងគេក្នុងប្រវត្តិសាស្ត្រ ។
ចាប់ពីខែមករា ដល់ខែមេសា សហរដ្ឋអាមេរិកបាននាំចេញប្រេងច្រើនជាងឆ្នាំមុនទៅទៀត រហូតដល់៤ដង ឬស្មើ៦,៨លានតោន ។
តាមប្រភពមួយចំនួនថា ការនាំចេញប្រេងពីសហរដ្ឋអាមេរិកទៅកាន់អឺរ៉ុប នឹងបន្តកើនឡើង ដែលធ្វើឲ្យប៉ះពាល់ដល់ប្រេងនាំចេញពីប្រទេសក្នុង OPEC និងរុស្ស៊ី ជាដើម ។
កាលពីឆ្នាំ២០១៧ អឺរ៉ុបបាននាំចូលប្រេងពីអាមេរិក៧% ប៉ុន្តែចំនួននេះនឹងកើនឡើងដល់ប្រមាណ១២%ក្នុងឆ្នាំ២០១៨ ។ ទីផ្សារនាំចេញសំខាន់ៗរួមមាន ប្រទេសអង់គ្លេស, អ៊ីតាលី និងហូឡង់ ជាដើម ៕
ចែករំលែកព័តមាននេះ