រាជធានីភ្នំពេញ ៖ ជារឿងភ្ញាក់ផ្អើលខ្លាំងណាស់នៅពេលយុវជនសុខ លឹមហេង ដែលទើបមានអាយុ១៩ឆ្នាំ បានគ្រងតំណែងស្ដេចអុកអង្គរសង្ក្រាន្តប្រចាំឆ្នាំ២០១៨ បន្ទាប់ពីឆ្លងកាត់ការប្រកួតយ៉ាងស្វិតស្វាញជាមួយកីឡាករជើងខ្លាំងជាច្រើនរូបតាំងពីវគ្គជម្រុះនៅរាជធានីភ្នំពេញរហូតឈានដល់វគ្គផ្ដាច់ព្រ័ត្រហើយផ្ដួលកីឡាករជើងខ្លាំងល្បីឈ្មោះឈាវ បូរ៉ា ដែលធ្លាប់គ្រងតំណែងស្ដេចអុកអង្គរសង្ក្រាន្ត២ឆ្នាំជាប់គ្នាគឺនៅឆ្នាំ២០១៤-២០១៥ឱ្យចាញ់ទាំងមិនអស់ចិត្តនៅក្នុងការប្រកួតដណ្ដើមតំណែងស្ដេចអុកអង្គរសង្ក្រាន្តនៅក្រុងអង្គរ ខេត្តសៀមរាបកាលពីអំឡុងបុណ្យចូលឆ្នាំថ្មីប្រពៃណីជាតិខ្មែរដែលទើបតែកន្លងផុតទៅនាពេលថ្មីៗនេះ ។ តាមរយៈជ័យជម្នះមិនគួរឱ្យជឿនេះ ធ្វើឱ្យមហាជនមួយចំនួនចោទសួរគ្នាថា តើយុវជនវ័យក្មេងរូបនេះចេះលេងអុកតាំងពីពេលណាមកបានជាខ្លាំងពូកែម៉្លេះ?
ដើម្បីបំបាត់ចម្ងល់មួយនេះ កោះសន្តិភាពបានជួបយុវជនសុខ លឹមហេង តាមទូរស័ព្ទ
កាលពីម្សិលមិញដើម្បីសាកសួរពីបញ្ហានេះហើយប្អូនបានប្រាប់ថា តាមពិតទៅប្អូនមាននិស្ស័យចូលចិត្តលេងអុកតាំងពីអាយុ៦ឆ្នាំម៉្លេះ ជាពេលដែលទើបនឹងចូលរៀនថ្នាក់ទី១។ ទោះបីចូលចិត្តលេងល្បែងនេះក៏ពិតមែនតែប្អូនមិនងប់ងុលរហូតភ្លេចការរៀនសូត្រនោះទេដោយបែងចែកពេលវេលាច្បាស់លាស់ ។
សុខ លឹមហេង បន្តថា ការលេងអុក ទី១ជួយបង្កើនស្មារតីអ្នកលេងឱ្យមានភាពវៃឆ្លាត ចេះគិតគូរនិងមានគំនិតចាស់ទុំដូចលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាធ្លាប់បានមានប្រសាសន៍ហើយថា ការលេងអុកបើទោះជាយើងនៅវ័យក្មេងមែន តែបើចេះលេងធ្វើឱ្យយើងក្លាយខ្លួនជាអ្នកមានគំនិតចាស់ទុំ ។ ដូចដែលយើងបានដឹងហើយថា ការលេងអុកមុននឹងដើរត្រូវតែគិតគូរពីចំណុចដែលយើងត្រូវដើរឱ្យបានច្បាស់ ប្រៀបដូចមេទ័ពម្នាក់កំពុងដឹកនាំកូនទាហានធ្វើសឹកសង្គ្រាមអ៊ីចឹង បើមិនគិតគូរត្រឹមត្រូវទេច្បាស់ជាទទួលបរាជ័យមិនខានឡើយ ។ ទី២ ប៉ះពាល់ពេលវេលា ដូចដែលប្អូនបានលើកឡើងពីខាងដើមរួចមកហើយថាត្រូវបែងចែកពេលរៀនសូត្រនិងការលេងអុកឱ្យដាច់ពីគ្នា ។ បើសិនជាយើងគិតតែពីលេងមិនគិតមុខគិតក្រោយគឺប្រៀបបាននឹងការចំណាយពេលវេលាឥតប្រយោជន៍ ។
ជាក់ស្ដែងប្អូនបានយកពេលទំនេរពីការសិក្សាបន្តិចបន្តួចមកលេងអុកកម្សាន្តដើម្បីកុំឱ្យខួរក្បាលស្មុគស្មាញពេក ។ ប៉ុន្តែការព្យាយាមលេង រួមផ្សំជាមួយទេពកោសល្យអំណោយផលពីធម្មជាតិផងនោះធ្វើឱ្យរូបគេក្លាយជាអ្នកលេងអុកដ៏ពូកែម្នាក់។
ស្តេចអុកអង្គរសង្ក្រាន្តប្រចាំឆ្នាំ២០១៨រូបនេះក៏បានបញ្ជាក់ផងដែរថា មុននឹងគេសម្រេចចិត្តចុះឈ្មោះចូលរួមប្រកួតលើកទី១ឆ្នាំ២០១៦ គេធ្លាប់ទទួលការបង្ហាត់បង្រៀនលេងអុកពីគ្រូម្នាក់គឺលោក ងួន ធារាម ជាវិស្វករផ្នែកសំណង់ ។ ប៉ុន្តែការឈានជើងចូលប្រកួតលើកដំបូងទោះបីរូបគេធ្លាក់តាំងពីវគ្គជម្រុះក៏ពិតមែនក៏គេមិនព្រមដកថយឡើយ ដោយបានចុះឈ្មោះចូលរួមប្រកួតជាលើកទី២ម្ដងទៀតនៅឆ្នាំ២០១៧ហើយបានធ្លាក់ចេញពីការប្រកួតវគ្គជម្រុះ២០នាក់ចុងក្រោយ ។ ប៉ុន្តែនៅពេលប្រកួតជ្រើសរើសជើងឯកថ្នាក់ជាតិគេបានជាប់ចំណាត់ថ្នាក់លេខ៣ ។
នៅក្នុងការប្រកួតដណ្ដើមតំណែងស្ដេចអុកអង្គរសង្ក្រាន្តឆ្នាំ២០១៨ យុវជនសុខ លឹមហេង ប្រាប់ថា ទម្រាំបានឡើងមកដល់វគ្គជម្រុះ៨នាក់ចុងក្រោយគេបានឆ្លងកាត់ការប្រកួតជាច្រើនដំណាក់កាល ដោយបានជួបប្រកួតជាមួយជើងខ្លាំងជាច្រើនរូបតែគេបានផ្ដួលគូប្រកួតឱ្យចាញ់ជាបន្តបន្ទាប់ ។ អ្វីដែលធ្វើឱ្យពិភពអ្នកលេងអុកមានការចាប់អារម្មណ៍បំផុតនោះ គឺពេលដែលរូបគេបានជួបប្រកួតជាមួយស្ដេចអុកដ៏ល្បីគឺលោក ឈាវ បូរ៉ា នៅវគ្គផ្ដាច់ព្រ័ត្រឯខេត្តសៀមរាប គេបានយកឈ្នះក្នុងស្ថានភាពដ៏តឹងតែងបំផុត ។
តាមធម្មតានៅពេលជួបជាមួយជើងខ្លាំងបែបនេះ អ្នកលេងអុកភាគច្រើនតែងតែមានការតក់ស្លុត ប៉ុន្តែយុវជនសុខ លឹមហេង ប្រាប់ថា គេមិនតក់ស្លុតឡើយ គឺខិតខំពង្រឹងស្មារតីលេងដោយយកចិត្តទុកដាក់បំផុត ។ នៅពេលនោះគេបានគិតថា ការចាញ់ឈ្នះជារឿងធម្មតា សំខាន់ត្រូវមានឆន្ទះតាំងស្មារតីលេងឱ្យបានល្អទៅបានហើយ។ទីបំផុត យុវជនសុខ លឹមហេង បានផ្ដួលកំពូលស្ដេចអុក២សម័យកាលឈាវ បូរ៉ា ដើម្បីក្លាយជាស្ដេចអុកអង្គរសង្ក្រាន្តប្រចាំឆ្នាំ២០១៨ទាល់តែបាន។
គួរបញ្ជាក់ថា យុវជនសុខ លឹមហេង មកដល់ពេលនេះមានអាយុ១៩ឆ្នាំ ជានិស្សិត
វិទ្យាស្ថានវ៉ាន់ដាគណនេយ្យឆ្នាំទី១ ។ ឪពុកឈ្មោះសុខ ផល្លីម ម្ដាយឈ្មោះតាំង ណៃអ៊ីម ជាអាជីវកររស់នៅរាជធានីភ្នំពេញ៕
ចែករំលែកព័តមាននេះ