ខេត្តកំពង់ចាម ៖ ពិតជាគួរឲ្យអាណិតណាស់ដោយដូនចាស់ម្នាក់វ័យ៧៥ឆ្នាំ រស់នៅភូមិថ្មគោល ឃុំរអាង ស្រុកកំពង់សៀម ដោយដៃម្ខាងកាន់ឈើច្រត់ និងដៃម្ខាងទៀតទូលកញ្ច្រែងដាក់ស្វាយទុំដើរលក់ពីកន្លែងមួយទៅកន្លែងមួយ ក្រោមកំដៅថ្ងៃក្តៅហែងតាមផ្ទះល្វែងរបស់ពលរដ្ឋនៅជុំវិញផ្សារក្រុងកំពង់ចាម ដើម្បីចិញ្ចឹមចៅប្រុស-ស្រីរហូតដល់ទៅ៥នាក់។
ដូនចាស់ខាងលើឈ្មោះ អ៊ឹម វ៉ាត មានប្រសាសន៍ឲ្យដឹងនៅព្រឹកថ្ងៃទី២៤ មេសាថា គាត់ជាស្ត្រីមេម៉ាយម្នាក់មានកូនពីរនាក់ (ប្រុស១ ស្រី១) ហើយប្តីបានស្លាប់ចោលជាច្រើនឆ្នាំមកហើយ ដោយមានជីវភាពក្រីក្រផង គាត់តស៊ូដើរលក់នំនៅតាមភូមិចិញ្ចឹមកូនៗ រហូតដល់ធំដឹងក្តីមានប្រពន្ធកូនគ្រប់គ្នា ដោយកូនប្រុសបងទៅរស់នៅខេត្តមណ្ឌលគិរី ចំណែកកូនស្រីវិញបានកូនប្រុស-ស្រី៥នាក់ ហើយមិនដឹងជាយ៉ាងម៉េចនោះទេ បានរត់ចោលកូនបាត់ទុកឱ្យគាត់ត្រូវទទួលរាប់រងចិញ្ចឹមចៅៗដែលចៅតូចជាងគេអាយុ៨ខែ ។
លោកយាយបន្តថា ទុក្ខត្រួតលើទុក្ខ ក្រហើយចិញ្ចឹមចៅដល់ទៅ៥នាក់ទៀត ទោះបីជាជីវភាពក្រីក្រក៏ពិតមែន តែគាត់ប្រឹងប្រែងតស៊ូទៅទិញផ្លែស្វាយខ្ទីសចិនពីគេក្នុងភូមិមកបន្ទំសម្រាប់លក់ ។ រាល់ព្រឹកត្រូវជិះរ៉ឺម៉កម៉ូតូចេញពីផ្ទះនៅភូមិថ្មគោល ឆ្ពោះមកកាន់ផ្សារសាលាចិនក្នុងក្រុងកំពង់ចាម ហើយដើរទូលកញ្ច្រែងស្វាយលក់តាមផ្ទះ ដោយស្វាយទុំ១ផ្លែលក់បានតម្លៃ១.០០០រៀល ក្នុង១កញ្ច្រែងបាន១ផ្លូនផងដែរ។ ដោយសារតែគេឃើញគាត់ចាស់ ក៏នាំគ្នាជួយទិញអស់ៗពីកញ្ច្រែងតែម្តង ហើយបានប្រាក់ចំណេញពី៣ទៅ៤ម៉ឺនរៀលគ្រាន់នឹងចញ្ចឹមចៅៗ ។
លោកយាយបញ្ជាក់ថា សព្វថ្ងៃនេះចៅប្រុសបងគេអាយុ២៥ឆ្នាំហើយ ដោយបានស៊ីឈ្មួលបើករ៉ឺម៉កម៉ូតូឲ្យគេក្នុងក្រុងកំពង់ចាម គ្រាន់នឹងបានថវិកាខ្លះដោះស្រាយជីវភាពគ្រួសារ ប៉ុន្តែពេលខ្លះគាត់មិនស្រួលខ្លួនមិនបានលក់ ត្រូវចៅបងគេចេញទៅរកលុយមកទិញម្ហូបអាហារ ។ មានពេលមួយដោយសារតែអ្នកក្រុងកំពង់ចាម ឃើញគាត់ក្រក៏ជួយផ្តលកង់១គ្រឿងសម្រាប់ទុកឲ្យចៅជិះទៅរៀនផងដែរ ។ ស្ទើរតែពេញមួយជីវិតទៅហើយ គឺប្រកបរបរលក់ដូរនេះរហូតដល់វ័យ៧៥ឆ្នាំ នូវតែបន្តអាជីពដើរលក់ស្វាយ ពេលណាផុតរដូវនេះ គាត់នឹងទិញបន្លែគេដើរមកលក់តាមផ្ទះក្នុងក្រុងកំពង់ចាម ។ របរនេះនូវតែបន្តរកលុះត្រាណាដើរមិនរួច ក្នុងពេលខាងមុខទើបគាត់ឈប់រក បើពុំនោះទេចៅៗពិបាក នឹងត្រូវជួបការលំបាកហើយ ៕
ចែករំលែកព័តមាននេះ