ខេត្តកំពត ៖ ហួសពីការថ្លែងទៅហើយ ដែលបុរសជាកូនចិត្តខ្មៅម្នាក់បានចាក់សម្លាប់ម្តាយរបស់ខ្លួន ដោយមិនញញើតដៃហើយគេចខ្លួនបាត់ ។ ជននេះក៏ត្រូវបានគេសង្ស័យថាញៀនថ្នាំផងដែរ ។ នេះជាភាពអាណោចអាធ័មមួយសម្រាប់ស្ត្រីជាម្តាយ ដែលស្លាប់បិទភ្នែកមិនជិតដោយសារតែឈាមមួយតំណក់របស់ខ្លួនក្លាយជាឃាតករប្រល័យសង្ខារខ្លួនជាម្តាយ…
ខេត្តកំពត ៖ ហួសពីការថ្លែងទៅហើយ ដែលបុរសជាកូនចិត្តខ្មៅម្នាក់បានចាក់សម្លាប់ម្តាយរបស់ខ្លួន
ដោយមិនញញើតដៃហើយគេចខ្លួនបាត់ ។ ជននេះក៏ត្រូវបានគេសង្ស័យថាញៀនថ្នាំផងដែរ ។ នេះជាភាពអាណោចអាធ័មមួយសម្រាប់ស្ត្រីជាម្តាយ ដែលស្លាប់បិទភ្នែកមិនជិតដោយសារតែឈាមមួយតំណក់របស់ខ្លួនក្លាយជាឃាតករប្រល័យសង្ខារខ្លួនជាម្តាយ ។ ចំណែកកូនប្រុសវិញក៏បានបង្ហាញពីការសាហាវព្រៃផ្សៃបំផុត ។
ហេតុការណ៍កើតឡើង កាលពីវេលាម៉ោង៦និង៣០នាទីយប់ថ្ងៃទី២២ មេសា ។ ស្ត្រីរងគ្រោះជាម្ដាយត្រូវបានចាក់ច្រើនកាំបិតស្លាប់នៅលើ ផ្ទះ ។ ស្ត្រីជាម្តាយឈ្មោះ រៀម ហែអាយុ៥០ឆ្នាំ នៅភូមិដំណាក់កន្ទួត ឃំុដំណាក់កន្ទួតខាងត្បូង ស្រុកកំពង់ត្រាច ខេត្តកំពត ។ លោក ណុប នឿន នាយរងប៉ុស្តិ៍ដំណាក់កន្ទួតខាងត្បូងបានឱ្យដឹងថា នៅពេលវេលាកើតហេតុនោះប្ដីស្ត្រីរងគ្រោះបានទៅគិតគូររៀបចំធ្វើបុណ្រនៅឯផ្ទះឪពុកមា នៅតែប្រពន្ធនិងកូនប្រុសឈ្មោះ សុខ រឿន ។ ពេលបុរសជាប្ដីស្ត្រីរងគ្រោះត្រឡប់មកដល់ផ្ទះវិញនៅវេលាម៉ោងជិត១០យប់ ស្រាប់តែឃើញឈាមហូរធ្លាក់ពីលើផ្ទះជោកជាំដី ។ លុះឡើងទៅដល់លើផ្ទះក៏ឃើញប្រពន្ធស្លាប់ ដោយការចាក់នឹងកាំបិតត្រូវកនិងដើមទ្រូងជាច្រើនកន្លែង ។
លោកនាយរងប៉ុស្តិ៍និយាយប្រាប់ឱ្យដឹងទៀតថា កូនប្រុសដែលចាក់សម្លាប់ម្ដាយនោះជាប់ពាក់ព័ន្ធគ្រឿងញៀន ព្រោះជននោះទើបតែបងប្អូនយកពីខេត្តពោធិ៍សាត់មកទេ ដោយសារតែនៅខេត្តពោធិ៍សាត់នោះ អុកឡុកខ្លាំងពេកព្រោះតែការបែកថ្នាំ រហូតកើតមានហិង្សាផងដែរ ទើបនាំឱ្យមករស់នៅជាមួយឪពុកម្តាយវិញ ។
ទោះជាបែបណាជនបង្កដែលត្រូវជាកូននោះបានគេចខ្លួនបាត់ទៅហើយមិនទាន់ដឹងរត់ទៅដល់ទីណាទេ ។ នេះជាករណីទី២ហើយក្នុងខែមេសានេះដែលកូនសម្លាញ់ឪពុកនិងម្តាយរបស់ខ្លួន ដែលលើកទី១ស្ត្រីជាកូនវាយសម្លាប់ឪពុកដោយសារតែការបាត់លុយ៣០០០រៀលនៅស្រុកកៀនស្វាយ ខេត្តកណ្តាល និងលើកទី២ គឺកូនប្រុសចាក់សម្លាប់ម្តាយនេះឯង ដោយសារតែរោគញៀនថ្នាំ ៕
ចែករំលែកព័តមាននេះ