ទីក្រុងបាងកក ៖ ប្រធាននាយកដ្ឋានអាកាសយានដ្ឋានថៃបាននិយាយថា វិនិយោគិនចិនបានបង្ហាញចំណាប់អារម្មណ៍វិនិយោគលើអាកាសយានដ្ឋានតូចៗរបស់ថៃចំនួន៣ ដើម្បីធ្វើឲ្យអាកាសយានដ្ឋានទាំងនេះកាន់តែប្រសើរឡើង ។
ប្រធាននាយកដ្ឋានអាកាសយានដ្ឋាន លោក Darun Saengchai បាននិយាយថា ៖ «អាកាសយានដ្ឋានខេត្ត Buri Ram, Phetchabun និង Nakhon Rachasima ស្ថិតនៅក្នុងគោលដៅរបស់ក្រុមហ៊ុនចិនទាំងនេះ » ។
ប៉ុន្តែលោកមិនបានផ្តល់ព័ត៌មានលម្អិតទាក់ទងនឹងវិនិយោគិនចិនខាងលើទេ ដោយលោកនិយាយថា ក្រុមហ៊ុនទាំងនេះរួមមាន ក្រុមហ៊ុនអាកាសចរណ៍, អចលនទ្រព្យ និងក្រុមហ៊ុនរដ្ឋផងដែរ ។
លោកបន្ថែមថា វិនិយោគិនទាំងនេះនឹងទទួលបានជំនួយកម្ចីប្រាក់ជាមួយអត្រាការប្រាក់ទាបពីរដ្ឋាភិបាលចិន សម្រាប់គម្រោងនៅបរទេស ។
លោក Darun បន្តថា ក្រុមហ៊ុនបរទេសត្រូវតែចាប់ដៃគូជាមួយក្រុមហ៊ុនថៃ សម្រាប់គម្រោងកែច្នៃអាកាសយានដ្ឋាន ដែលនឹងប្រព្រឹត្តឡើងក្នុងទម្រង់ជាការចាប់ដៃគូរវាងវិស័យសាធារណៈ និងឯកជន ។
អាកាសយានដ្ឋានក្នុងខេត្តទាំង៣នេះ សុទ្ធតែស្ថិតក្រោមការគ្រប់គ្រងរបស់នាយកដ្ឋានខាងលើ។ អាកាសយានដ្ឋានទាំងនេះស្ថិតក្នុងផែនការបង្កើនគុណភាព និងសមត្ថភាពក្នុងចំណោមអាកាសយានដ្ឋានសរុប២៨ក្នុងតំបន់ ដើម្បីសម្របទៅនឹងកំណើនភ្ញៀវទេសចរមកកម្សាន្តនៅប្រទេសថៃ ។
លោក Darun និយាយថា ការដេញថ្លៃអាចនឹងធ្វើឡើងនៅដើមឆ្នាំក្រោយ ។ លោកថា ៖ «នៅចុងឆ្នាំនេះ នាយកដ្ឋាននឹងដាក់ពាក្យទៅកាន់ក្រសួងដឹកជញ្ជូន ដើម្បីទទួលបានការអនុញ្ញាតឲ្យក្រុមហ៊ុនប្រឹក្សាយោបល់ធ្វើការសិក្សាលម្អិតលើអាកាសយានដ្ឋានទាំង៣ ។ ប្រសិនបើដូចការគ្រោងទុកមែននោះ ការដេញថ្លៃនេះ អាចនឹងចាប់ផ្តើមនៅដើមឆ្នាំ២០១៩ » ៕
ចែករំលែកព័តមាននេះ