ខេត្តរតនគិរី ៖ ទឹកជ្រោះអូរស៊ិនលែរ៍មានចំងាយ ប្រមាណជា៣០គីឡូម៉ែត្រពីក្រុងបានលុង ស្ថិតនៅក្នុងភូមិបី ស្រុកឃុំសេដា ស្រុកលំផាត់ ខេត្តរតនគិរី គឺជារមណីយដ្ឋានទេសចរធម្មជាតិស្រស់បំព្រងមួយ ដែលតែងផ្តល់នៅ…
ខេត្តរតនគិរី ៖ ទឹកជ្រោះអូរស៊ិនលែរ៍មានចំងាយ ប្រមាណជា៣០គីឡូម៉ែត្រពីក្រុងបានលុង ស្ថិតនៅក្នុងភូមិបី ស្រុកឃុំសេដា ស្រុកលំផាត់ ខេត្តរតនគិរី គឺជារមណីយដ្ឋានទេសចរធម្មជាតិស្រស់បំព្រងមួយ ដែលតែងផ្តល់នៅ ភាពសប្បាយ រីករាយដក់ជាប់អារម្មណ៍ដល់អ្នកទេសចរណ៍គ្រប់ៗរូប ។
រមណីយដ្ឋាននោះគ្របដណ្តប់ទៅដោយព្រៃស្រោង ពណ៌បៃតង ហ៊ុមព័ទ្ធជុំជិតដោយជួរភ្នំ និងខ្ពង់រាប ប្រកបដោយភាពសុខដុមរមនា ពីធម្មជាតិសម្រាប់សត្វព្រៃគ្រប់ប្រភេទ ហើយលឺសំលេងខ្ញៀវខ្ញារពីបក្សាបក្សី ។
រមណីយដ្ឋានទឹកធ្លាក់នេះធ្លាប់តែលាក់ខ្លួនបំពួនអាត្មាកណ្តាលទ្រូងព្រៃ ជាយូមកហើយ ទើបតែពេលថ្មីៗនេះទេដែលបណ្តាញផ្លូវគមនាគមន៍ត្រូវបានអភិវឌ្ឈន៍តភ្ជាប់ទៅដល់តំបន់ទឹកធ្លាក់ដ៏អស្ចារ្យមួយនេះ ដោយងាយស្រួលតាមយាន្តយន្តគ្រប់ប្រភេទ ពីមុនមក ដ្ឋានមួយនេះនៅឆ្ងាយដាច់ស្រយាលខ្លាំងណាស់ ដោយសារមានស្ថានភាពផ្លូវយ៉ាងលំ បាក តែបច្ចុប្បន្នទីដ៏សែនឆ្ងាយនោះ បានក្លាយជាជិតដោយសារ មានការអភិវឌ្ឍន៍ផ្លូវលំដល់ទីតាំងនោះតែម្តង ។
កាលពីមុនមានភ្ញៀវទេសចរណ៍ជាតិ និងអន្តរជាតិទៅដល់ទីនោះតាមរយៈរថយន្តធនខ្ពស់ៗ អ្នកបើកបរប្រកបដោយទេពកោសល្យ ដោយល្បឿនយឺតៗតាមផ្លូវក្នុងព្រៃបត់បែនដូចពស់លូន ហើយកន្លែងខ្លះ ត្រូវឆ្លងកាត់អូរតូចៗផងដែរ ។
ដំណើរកម្សាន្តទៅទីនោះ គឺអាចចំណាយពេលពេញមួយថ្ងៃ និងត្រូវត្រៀមរៀបចំកញ្ចប់ម្ហូបអាហារ និងភេសជ្ជៈផងដែរ ព្រោះនៅទីនោះគ្មានអ្វីលក់ដូរទាំងអស់។
តែផ្ទុយពីបច្ចុប្បន្នមានសន្តិសុខសណ្តាប់ធ្នាប់ល្អ ទាំងផាសុខភាព អនាម័យសេវាគ្រប់សព្វបែបយ៉ាងមានការដាក់តាំងលក់ម្ហូប អាហាគ្រប់ភេទ និងវត្ថុអនុស្សាវរីយ៍ផ្សេងៗ មានតម្លៃសមរម្យអ្នកលក់ប្រកបដោយកាយវិការស់រាយរាក់ទាក់ក្រៃលែង ។
ទេសភាពទីនោះមានទឹកធ្លាក់ប្រាំពីរជាន់ទស្សន័យភាពដ៏ ស្អាតត្រកាលនេះស្ថិត កណ្តាល ព្រៃដែលអភិរក្សថែរក្សាយ៉ាងល្អ ពីសហគមន៍ ជនជាតិដើមភាគតិចកន្លែង ខ្លះ សូម្បីតែ ពន្លឺព្រះអាទិត្យក៏ពិបាក និងចាំងឆ្លុះកាំរស្មីចូលដល់ផង ។
ចំណែកនៅរដូវប្រាំងចរន្តទឹកហូរមានសភាពយឺតល្មមដែលអាចឲ្យយើងហែលលេង បានយ៉ាងស្រួល ។
រីឯនៅរដូវភ្លៀងចរន្តទឹកហូរខ្លាំងលឿនកួចខ្មួលខ្មាញ់និងធ្វើឲ្យពិបាកមុជកម្សាន្ត ប៉ុន្តែមានជម្រៅទឹកខ្លះរាក់ ខ្លះជ្រៅតាមថ្នាក់ទាបខ្ពស់ ។
រមណីយដ្ឋានទឹកធ្លាក់អូរស៊ិនលែរ៍មិនត្រឹមតែផ្តល់ភាពស្រស់ស្អាតសម្រាប់ដំណើរកម្សាន្ត ក្នុងព្រៃប៉ុណ្ណោះទេ ប៉ុន្តែវាហាក់បីដូចជា កន្លែងរង់ចាំការ ស្រាវជ្រាវ អំពីសម្រស់ ធម្មជាតិផ្សេងៗ រួមទាំងទឹកធ្លាក់ដទៃទៀតនៅជុំវិញនោះផងដែរ ៕
ចែករំលែកព័តមាននេះ