ខេត្តព្រះសីហនុ ៖ កាលពីព្រឹកថ្ងៃទី៥ វិច្ឆិកា លោកឌួង សំអាត នាយខណ្ឌរដ្ឋបាលជលផលខេត្ត បានដឹកនាំមន្ត្រីជលផលចុះទៅណែនាំបង្ហាត់បង្ហាញពីវិធីសាស្ត្រនៃការចិញ្ចឹមត្រីដល់សហគមន៍ប្រជាពលរដ្ឋស្រុកស្ទឹងហាវ ។ ការបង្ហាត់បង្រៀនពីវិធីសាស្ត្រចិញ្ចឹមត្រីនេះបានប្រព្រឹត្តទៅនៅឃុំអូរត្រេះ ស្រុកស្ទឹងហាវ ដែលមានប្រជាពលរដ្ឋមកពីសហគមន៍ទាំងបីឃុំចូលរួមមានឃុំអូរត្រេះ ឃុំទំនប់រលក និងឃុំកំពេញ។ លោកឌួង សំអាត បានលើកឡើងពីរបៀបចិញ្ចឹមត្រីរបស់សហគមន៍ដែលបានទទួលជោគជ័យលើការចិញ្ចឹម គឺយើងត្រូវជីកស្រះឱ្យបានសមស្រប បន្ទាប់មកត្រូវបញ្ចូលទឹកទៅក្នុងស្រះ រួចដាក់ដីដំបូកនៅបាតស្រះ និងដាក់លាមកគោ ឬក្របីព្រមទាំងចិញ្ច្រាំដើមទន្ទ្រាងខែតដាក់រាយតាមមាត់ស្រះទុករយៈពេលពីរទៅបីសប្តាហ៍ ដើម្បីឱ្យកើតជាកូនជន្លេនក្រហម ហើយយើងចាប់ផ្តើមលែងពូជត្រី ឬកូនត្រី។
លោកបន្តថា នៅក្នុងស្រះគប្បីដាំត្រកួត ឬកញ្ឆែតផងដែរ ដើម្បីរក្សាលំនឹងសីតុណ្ហភាពនៅក្នុងទឹក និងជាជម្រកត្រីផង ។ លោកឌួង សំអាត បានបន្តថា ការចិញ្ចឹមត្រីអណ្តែងតាមបែបលក្ខណៈជីកក្រឡុកដាក់តង់ ឬចិញ្ចឹមក្នុងអាងគឺយើងត្រូវដាក់ទឹកចូល បន្ទាប់មកលែងពូជកូនត្រីអណ្តែង ចូលទៅក្នុងទឹកនោះ និងឱ្យចំណីបានទៀងទាត់ ហើយក្នុងការចិញ្ចឹមបែបនេះ ត្រូវមានការផ្លាស់ប្តូរទឹក ក្នុងទឹក១០០% ត្រូវបង្ហូរចេញ ៥០% និងដាក់ចូលវិញ៥០% ដែរ ។ លោកនាយខណ្ឌរដ្ឋបាលជលផលខេត្តព្រះសីហនុ ក៏បានពាំនាំបណ្តាំផ្ញើរបស់លោកបណ្ឌិត ចាន់ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកណៅ ធួក ប្រធានជលផលជូនដល់ប្រជាពលរដ្ឋ សុំឱ្យបងប្អូនចេះកែច្នៃមុខរបរចិញ្ចឹមត្រីដូចខាងលើ ដោយកុំរស់នៅពឹងផ្អែកតែលើធម្មជាតិ ត្រូវចេះ ស្រាវជ្រាវឯកសារនៃការចិញ្ចឹមត្រី រកបទពិសោធន៍ល្អៗ និងត្រូវចេះទំនាក់ទំនងគ្នាពីសហគមន៍មួយទៅសហគមន៍មួយទៀត ដើម្បីផ្លាស់ប្តូរបទពិសោធន៍គ្នាទៅវិញទៅមក។
លោកបានបន្តឱ្យដឹងទៀតថា បន្ទាប់ពីបានបង្ហាត់បង្ហាញពីវិធីសាស្ត្រនៃការចិញ្ចឹមត្រីដល់ប្រជាពលរដ្ឋសហគមន៍ទាំងបីឃុំនៅស្រុកស្ទឹងហាវ រួចមក លោកឌួង សំអាត និងសហការីជំនាញជលផលខេត្តព្រះសីហនុ បានបន្តដំណើរទៅស្រុកព្រៃនប់ទៀត ដើម្បីចូលរួមពិនិត្យមើលការចិញ្ចឹមត្រីឆ្ពង់ នៅក្នុងបែរ របស់សហគមន៍ស្រុកព្រៃនប់ និងបានផ្តល់ជូនកូនត្រីចំនួន១១.៣៥០សំរាប់ការចិញ្ចឹមក្នុងស្រះ និង៦.៥០០កូនទៀតសំរាប់ចិញ្ចឹមនៅក្នុងបែរ។
លោកនាយខណ្ឌ រដ្ឋបាលជលផលបានផ្តាំផ្ញើដល់ប្រជាពលរដ្ឋក៏ដូចជាសហគមកន៍ត្រូវប្រឹងប្រែងយកចិត្តទុកដាក់ធ្វើយា៉ងណាឱ្យបានទទួលជោគជ័យក្នុងការចិញ្ចឹមត្រីនោះ។ លោកបញ្ជាក់ថា បើសិនជាគំរោងសាកល្បងនៃការចិញ្ចឹមត្រីនេះ ទទួលបានជោគជ័យគ្រប់សហគមន៍ ពេលនោះហើយដែលជាការលើកទឹកចិត្តដល់អង្គការម្ចាស់គំរោងដែលជាអ្នកផ្តល់ថវិកាផ្គត់ផ្គង់នៃកម្មវិធីនេះ ។ ហើយក៏ជាការចូលរួមចំណែកការកាត់បន្ថយភាពក្រីក្ររបស់ប្រជាពលរដ្ឋជាមួយក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ៕
ចែករំលែកព័តមាននេះ