ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានព្រមានដាក់វិធានការចំពោះកម្លាំងនគរបាលណាដែលមិនគោរពវិន័យ និងច្បាប់ ដើរសេរីមិនធ្វើការងារដែលលើកឡើងក្នុងពិធីប្រជុំគោរពទង់ជាតិ នៅថ្ងៃទី២៣ ខែមេសា ឆ្នាំ២០១៨ នៅស្នងការដ្ឋាននគរបាលខេត្តបន្ទាយមានជ័យ ។
ក្រោយពេលគោរពទង់ជាតិ នៃព្រះរាជាណាចក្រកម្ពុជាហើយ លោកឧត្តមសេនីយ៍ទោ អាត់ ខែម បានមានប្រសាសន៍ទៅកាន់កងកម្លាំងថា កងកម្លាំងនគរបាលជាតិមានតួននាទី និងភារកិច្ចធ្វើការងារបម្រើប្រជាពលរដ្ឋ និងប្រទេសជាតិ ត្រូវការពារសន្តិសុខ និងសណ្តាប់ធ្នាប់បានល្អ ។
លោកបានបញ្ជាក់ថា មានកងម្លាំងនគរបាលខេត្ត ស្រុក ក្រុងមួយចំនួនធំ បានខិតខំប្រឹងប្រែងធ្វើការងារបម្រើប្រជាពលរដ្ឋ និងប្រទេសជាតិបានល្អប្រសើរ តែមានកម្លាំងនគរបាលមួយចំនួនតូច មិនគោរពច្បាប់ និងវិន័យកងកម្លាំង ដើរសេរីមិនធ្វើការងារប៉ះពាល់ដល់អង្គភាព ។
លោកឧត្តមសេនីយ៍ទោ អាត់ ខែម បានព្រមានដាក់វិធានការថា បើកម្លាំងនគរបាលខេត្ត ស្រុក ក្រុងណាមួយមិនគោរពវិន័យកងកម្លាំងនគរបាលជាតិទេ ដើរសេរីមិនធ្វើការត្រូវចាត់ការតាមច្បាប់កងកម្លាំងនគរបាលជាតិ ។ ពង្រឹងការងារដល់កងកម្លាំងនគរបាលខេត្តបន្ទាយមានជ័យ ទទួលបានជោគជ័យក្នុងការងារអង្គភាពដើម្បីបម្រើប្រជាពលរដ្ឋ និងសង្គមឲ្យបានល្អប្រសើរ ៕
ចែករំលែកព័តមាននេះ